ភ្នំពេញ ៖ ក្នុងពិធីសំណេះសំណាលជាមួយសិស្ស និស្សិត ជ័យ លាភីអាហារូបករណ៍ទៅសិក្សានៅប្រទេសបារាំង និង នូវែលសេឡង់ នាទីស្តីការក្រសួងអធិការកិច្ចកាលពី ព្រឹក ថ្ងៃទី៣ ខែមករា ឆ្នាំ២០២៤ ឯកឧត្តម ហួត ហាក់ រដ្ឋមន្ត្រី ក្រសួងអធិការកិច្ច បានរំលេចអំពីតួនាទី និងកាតព្វកិច្ចរបស់ យុវជនចំពោះប្រទេសជាតិ នៅពេលបំពញការសិក្សានៅ បរទេស ។

ឯកឧត្តមបញ្ជាក់ថា ក្រៅពីការសិក្សា ប្រជាជនកម្ពុជាម្នាក់ ឬនិស្សិតម្នាក់ ជាទូតសុឆន្ទៈតំណាងកម្ពុជា ក្នុងការបង្ហាញ ពីវប្បធម៌ ទេសចរណ៍ ការអភិវឌ្ឍ និងស្ថានភាពពិតរបស់ ប្រទេសកម្ពុជាឱ្យពិភពលោកបានស្គាល់ ។ចំណែកតួនាទី របស់ យុវជនពេលបញ្ចប់ការសិក្សាចំពោះប្រទេសជាតិគឺ ត្រឡប់មកវិញប្រកបដោយសុវត្ថិភាព មានសមត្ថភាព ក្នុងការ រួមចំណែកចូលរួមជាមួយរាជរដ្ឋាភិបាលក្នុងការអភិវឌ្ឍប្រទេស ទៅតាមជំនាញរៀងៗខ្លួន ។ក្នុងករណីប្អូនៗមានបញ្ហា ឬសំណូមពរអ្វីមួយនៅក្រៅប្រទេស សូមទំនាក់ទំនង ទៅ ស្ថានឯកអគ្គរាជទូតព្រះរាជាណាចក្រកម្ពុជា ប្រចាំនៅ ប្រទេស ដែលប្អូនៗរស់នៅ។

ក្នុងបរិយាកាសនេះដែរ ឯកឧត្តមរដ្ឋមន្រ្តី បានកោតសរសើរ អបអរសារទរ និងវាយតម្លៃខ្ពស់ចំពោះសមត្ថភាព របស់ ប្អូនៗជ័យលាភីអាហារូបករណ៍អ៊ីរ៉ាស្មូស (ERASMUS) ទៅប្រទេសបារាំង និងរដ្ឋាភិបាលនូវែលសេឡង់ ទៅ ប្រទេសនូវែលសេឡង់ ។

ក្នុងឱកាសនេះដែរ ឯកឧត្តមរដ្ឋមន្រ្តី មាន ប្រសាសន៍ទាក់ទង ទៅនឹងមូលហេតុនៃការប្តូរឈ្មោះពីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចមកជា ក្រសួងអធិការកិច្ច ដែលជាអនុវត្តនូវ “យុទ្ធសាស្រ្តបញ្ចកោណ-ដំណាក់ កាល ទី១”។

ឯកឧត្តមរដ្ឋមន្រ្តីក៏បានផ្តល់ជូនសៀវភៅអានជាអនុស្សាវរីយ៍ ចំនួនបីក្បាលក្នុងម្នាក់ៗ រួមមាន៖ទី១.កំពូលស្ថាបនិក និងបិតាសន្តិភាពរបស់កម្ពុជា (សម្តេចតេជោ), ទី២.ទឹក ចិត្តអ្នកជួយសង្គ្រោះ (សម្តេច កិត្តិព្រឹទ្ធបណ្ឌិត) និងទី៣ .កូនប្រុសច្បងដ៏មានឥទ្ធិពល (សម្តេចធិបតី) ។ឯកឧត្តម បញ្ជាក់ថា សៀវភៅទាំងបីនេះ នឹងជាត្រីវិស័យដ៏សំខាន់ដែល ប្អូនៗអាចដកស្រង់សម្រាប់ជាបទពិសោធជីវិត និងជា មូលដ្ឋាន ដើម្បីតម្រង់អនាគតរបស់ ខ្លួនលើវិថីការងារ ដែល ប្អូនៗជ្រើសរើស៕
ដោយ៖ ហេង សម្បត្តិ