(កោះកុង)៖ លោកជំទាវ ចម ក្រស្នា អគ្គនាយិកាក្រុមហ៊ុន សោម៉ា គ្រុប និងជា ប្រធាន Soma Initiative បានលើកទឹកចិត្តដល់សិស្សានុសិស្ស ទាំងអស់ ឱ្យខិតខំ រៀនសូត្រ តស៊ូ ព្យាយាម ដើម្បីអនាគតខ្លួនឯង គ្រួសារ និងសង្គម ដោយកុំយកទឹក សមុទ្រ ជារនាំងឧបសគ្គក្នុងការឆ្លងកាត់ទៅរកភាពរុងរឿង តាមរយៈការសិក្សា បន្តនៅថ្នាក់ឧត្តមសិក្សា និងត្រឡប់មកជួយភូមិ ឃុំរបស់ខ្លួនវិញ ។

នេះជាប្រសាសន៍លើកឡើងក្នុងឱកាសដឹកនាំបុគ្គលិក និងនិស្សិតពេទ្យ ស្ម័គ្រចិត្ត ចុះធ្វើសកម្មភាពមនុស្សធម៌ដល់ប្រជាពលរដ្ឋ និងសិស្សានុសិស្ស ប្រមាណ ៧០០នាក់ នៅលើកោះស្ដេច ភូមិកោះស្ដេច ឃុំកោះស្ដេច ស្រុកគិរីសាគរ ខេត្តកោះកុង ។

ជាមួយនឹងការកោតសរសើរ និងថ្លែងអំណរគុណចំពោះការស្វាគមន៍យ៉ាងរាក់ទាក់ ពីអាជ្ញាធរដែនដី លោកជំទាវអគ្គនាយិកា លោកជំទាវក៏បានផ្ដល់ជាអនុសាសន៍ ដល់ប្រជាជនឱ្យយកចិត្តទុកដាក់ជាមួយសុខភាព និងរស់នៅប្រកបដោយ អនាម័យ ខ្ពស់ ហើយចូលរួមសកម្មភាពនានាជាមួយអាជ្ញាធរដើម្បីអភិវឌ្ឍសង្គម និងមូលដ្ឋាន ឱ្យកាន់តែប្រសើរ ។

សកម្មភាពដែលលោកជំទាវ ចម ក្រស្នា អគ្គនាយិកាក្រុមហ៊ុន សោម៉ា គ្រុប និងជាប្រធាន Soma Initiative ដឹកនាំបុគ្គលិក និងនិស្សិតពេទ្យស្ម័គ្រ ចិត្ត ចុះធ្វើសកម្មភាពមនុស្សធម៌ដល់ប្រជាពលរដ្ឋ និងសិស្សានុសិស្សប្រមាណ ៧០០នាក់ មានដូចជា ៖
១. ការពិនិត្យព្យាបាល និងអប់រំសុខភាពទូទៅជូនប្រជាជនប្រមាណ២០០នាក់ នៅមណ្ឌលសុខភាពគិរីសាគរ
២. ការអប់រំអនាម័យ បរិស្ថាន និងចែកសម្ភារសិក្សាដែលជាអំណោយរបស់ឯកឧត្តម សុខ ពុទ្ធិវុធ និងលោកជំទាវ ហ៊ុន ម៉ាលី ដល់សិស្សានុសិស្សនៃសាលាបឋមសិក្សាកោះស្ដេចប្រមាណជាង៣០០នាក់។
៣. ការតម្រង់ទិសក្នុងការជ្រើសរើសមុខវិជ្ជានៅថ្នាក់ឧត្តមសិក្សា និងអាជីពការងារទៅថ្ងៃអនាគតដល់សិស្សានុសិស្សនៃវិទ្យាល័យកោះស្ដេចប្រមាណជាង២០០នាក់។
៤. ការចូលរួមសិក្សាស្វែងយល់ពីការអភិរក្សធនធានក្រោមទឹក ដើម្បីអភិវឌ្ឍន៍វិស័យទេសចរណ៍ប្រកបដោយចិរភាព និងលើកកំពស់ជីវភាពប្រជាជន។

លោក សាយ ង៉ែត បានថ្លែងក្នុងនាមរដ្ឋបាលស្រុក និងអាជ្ញាធរមូលដ្ឋានសំដែង នូវការស្វាគមន៍យ៉ាងកក់ក្ដៅ និងថ្លែងអំណរគុណយ៉ាងជ្រាលជ្រៅជូនចំពោះ លោកជំទាវ អគ្គនាយិកាដែលបានសម្រេចជ្រើសរើសកោះស្ដេច ជាគោលដៅ សម្រាប់កម្មវិធីសប្បុរសធម៌ក្នុងដើមឆ្នាំ២០២៤នេះ ហើយបានរួមចំណែកជាមួយ រដ្ឋបាលស្រុកក្នុងការផ្ដល់ នូវការប្រឹក្សា និងអប់រំ សុខភាពជូនប្រជាជន និងចែក រំលែកបទពិសោធន៍ ចំណេះដឹងដល់សិស្សានុសិស្ស និងការចាប់ អារម្មណ៍ មក លើការងារអភិរក្សធនធានបាតសមុទ្ររបស់រដ្ឋបាលឃុំកោះស្ដេច ជាពិសេស សហគមន៍នេសាទសម្រស់កោះស្ដេច។

គួររំឭកផងដែរថា ក្រៅតែពីការងារអាជីវកម្មដែលគ្របដណ្ដប់លើវិស័យទាំង៦ ក្រុមហ៊ុន សោម៉ា គ្រុប និងបុត្រសម្ព័ន្ធបានបង្កើតគម្រោងបង្កើត និងចែករំលែកគុណតម្លៃមួយដែលមានឈ្មោះថា Soma Initiative (សោម៉ា អ៊ីនីស៊ីអេទីវ) ដើម្បីចែករំលែកគុណតម្លៃរបស់ខ្លួនតាមរយៈកម្មវិធីចំនួន០៣រួមមាន ការអប់រំ សុខភាពអនាម័យ និងកិច្ចការបរិស្ថាន ៕

ដោយ / គ្រី សម្បត្តិ