ការ៉ាកាស៖ គ្រូបង្រៀន បុគ្គលិកសាធារណៈ និងអ្នកចូលនិវត្តន៍ នៅប្រទេសវេណេហ្ស៊ុយអេឡារាប់រយនាក់ បាននាំគ្នាធ្វើបាតុកម្ម តវ៉ាទាមទារដំឡើងប្រាក់ខែ និងលក្ខខណ្ឌការងារល្អប្រសើរ។

ក្រុមបាតុករ ដែលរួមមានទាំងមន្ត្រីចូលនិវត្តន៍នៅឆ្នាំនេះផងដែរនោះ បានអះអាងថា ប្រាក់ចំណូលរបស់ពួកគេត្រូវបានបំផ្លាញ ដោយសារតែវិបត្តិនៅក្នុងប្រទេសនេះ។

ប្រធានសមាគមសាស្រ្តាចារ្យនៃសាកលវិទ្យាល័យ Central លោក Jose Gregorio Alfonso មានប្រសាសន៍ថា «យើងកំពុងរង់ចាំ និងទាមទារឱ្យមានការដំឡើងប្រាក់បៀវត្សរ៍គោល និងប្រាក់ឈ្នួល»។

លោកបានបន្តថា «មិត្តភក្តិរបស់ខ្ញុំបាននិយាយក្នុងអំឡុងពេលបាតុកម្មថា គ្រូចាស់ៗ ចូលនិវត្តន៍ ដែលមានពុកចង្ការពណ៌ស អំឡុងពេលបុណ្យណូអែល ពួកគាត់បានក្លែងខ្លួន ធ្វើជាលោកតា សាន តាក្លូស ដើម្បីរកប្រាក់បន្ថែម ហើយខ្លះទៀត ត្រូវតែលក់អាហារ ទើបអាចរស់បាន»។

បាតុករម្នាក់ទៀត ដែលជាមន្ត្រីចូលនិវត្តន៍ ឈ្មោះថា Rosa Marcano បាននិយាយថា «យើងមិនអាចរស់នៅ ជាមួយនឹងប្រាក់ ៣ ដុល្លារ បានទេ … យើងកំពុងទាមទារឱ្យយើងបង្កើនប្រាក់ចំណូលរបស់យើង ដើម្បីឱ្យមានប្រាក់សោធននិវត្តន៍ សមរម្យ» ។

រដ្ឋាភិបាលវ៉េណេហ្ស៊ុយអេឡា របស់ប្រធានាធិបតី Nicolás Maduro បានដាក់ការស្តីបន្ទោសវិបត្តិនេះថា បណ្តាលមកពីទណ្ឌកម្មអន្តរជាតិ ដែលប៉ះពាល់ដល់ប្រាក់ចំណូលជាតិ ហើយប៉ះពាល់ដល់អត្ថប្រយោជន៍ការងារ។

ប្រទេសវ៉េណេហ្ស៊ុយអេឡា គឺជាប្រទេសដែលកំពុងជួបអតិផរណាខ្ពស់បំផុតមួយ នៅលើពិភពលោក។ នៅឆ្នាំ ២០២៣ បានឈានដល់ ១៩៣% នេះបើតាមការប៉ាន់ស្មាន ពីខាងវិស័យឯកជន។

សហជីពបានបញ្ជូនឯកសារ ទៅក្រសួងសាធារណៈ ទាមទារឱ្យគោរពសិទ្ធិធ្វើបាតុកម្ម និងសកម្មភាពរបស់មេដឹកនាំសហជីព។ មេដឹកនាំសហជីពដែលភាគច្រើនត្រូវបានឃុំខ្លួន ក្រោមការចោទប្រកាន់ពីបទ «សមគំនិត»។

គួរបញ្ជាក់ថា បាតុកម្មមួយទៀតត្រូវបានគេគ្រោងថា នឹងធ្វើឡើង នៅថ្ងៃទី ១៥ ខែមករា ចំថ្ងៃ Maestro Day នៅប្រទេសវ៉េណេស៊ុយអេឡា៕ ប្រភពពី AFP ប្រែសម្រួល៖ សារ៉ាត