(ភ្នំពេញ)៖ ឯកឧត្តម លី កុសល រដ្ឋលេខាធិការ ក្រសួងការពារជាតិ និងជាប្រធានសហព័ន្ធកីឡាវាយសីកម្ពុជា បានថ្លែងបញ្ជាក់ ក្រោយបញ្ចប់ការប្រកួតកីឡាសីពានរង្វាន់ Yonex Main Vision Cambodia Championship 2024 នា ល្ងាចថ្ងៃទី២៨ ខែ មករា ឆ្នាំ២០២៤ម្សិលមិញនេះថា ការប្រកួតនេះ សហព័ន្ធបានចាប់ដៃជាមួយក្រុមហ៊ុនYonexក្នុងគោលបំណងចម្រាញ់ជ្រើសរើសយកធនធានកីឡាករវ័យក្មេងអាយុក្រោម១២ដែលមានទេពកោសល្យខ្ពស់ចំនួន៦នាក់យកមកផ្គត់ផ្គង់ហ្វឹកហាត់ត្រៀមនិងចូលរួមប្រកួតផ្សេងៗ ដើម្បីពង្រឹងនិងអភិវឌ្ឍសមត្ថភាពឆ្ពោះទៅចូលរួមក្នុងព្រឹត្តិការណ៍កីឡាយុវជនអាស៊ីក្នុងឆ្នាំ២០២៩ដែលកម្ពុជាធ្វើជាម្ចាស់ផ្ទះ ។

ឯកឧត្តម ប្រធានសហព័ន្ធ អះអាងទៀតថា ការប្រកួតនេះក្រៅពីចម្រាញ់ជ្រើសរើសយកកីឡាករវ័យក្មេងទាំងនេះ វាក៏ជាព្រឹត្តិការណ៍ប្រកួតមួយ ដើម្បីចម្រាញ់រកកីឡាករកីឡាការិនីដែលមានសក្កានុពលឆ្ពោះទៅស៊ីហ្គេម លើកទី៣៣ នៅប្រទេសថៃក្នុងឆ្នាំ២០២៥ និងត្រៀមចូលរួមការប្រកួតអន្តរជាតិផ្សេងៗផងដែរ។មួយវិញទៀត ការប្រកួតនេះ គឺជាការបញ្ជាក់អំពីកិច្ចសហការគ្នាក្នុងជំហានអភិវឌ្ឍរួមគ្នាលើការឧបត្ថម្ភគាំទ្រចំគោលដៅឲ្យទទួលបានលទ្ធផលរីកចំរើនជឿនលឿន ធ្វើយ៉ាងណាដណ្តើមឲ្យបានមេដាយមាសជូនជាតិពីការប្រកួតកម្រិតអន្តរជាតិ។
ឯកឧត្តម ប្រធានសហព័ន្ធ បានថ្លែងអរគុណដល់កីឡាករ កីឡាការិនី ដែលបានប្រកាន់ជំហរអត្តចរិកសុភាពរាបសារថ្លៃថ្នូរ មាន សីលធម៌ល្អ និងគោរពបទបញ្ញាប្រកួតបានត្រឹមត្រូវ ក្នុងស្មារតី FairPlay។ជាមួយគ្នានោះ

ឯកឧត្តម ក៏អរគុណចំពោះ ចៅក្រម អាជ្ញាកណ្ដាលដែលបានប្រកាន់ខ្ជាប់ការគោរពក្រមសីលធម៌ វិជ្ជាជីវៈរបស់ខ្លួន ខិតខំអនុវត្ត បានត្រឹមត្រូវតាម Rules and Regulation របស់ Badminton អន្តរជាតិ មានភាពយុត្តិធម៌ មិនលំអៀង តាំងពីដើមរហូតដល់ចប់ការប្រកួត។ទន្ទឹមនេះ សូមថ្លែងអំណរគុណដល់ដៃគូររៀបចំការប្រកួតក្រុមហ៊ុន Yonex ដែលបានផ្តួចផ្តើម និងស្វះស្វែងរកប្រភពធនធានដំណើរការណ៍ការប្រកួតនេះបានរលូន តាមការគ្រោងទុក។

សូមជម្រាបជូនថា ក្រោយការប្រកួតកីឡាករជ័យលាភីអាយុក្រោម១២ឆ្នាំ ចំនួន០៦នាក់ នឹងត្រូវបានក្រុមហ៊ុនទទួលផ្គត់ផ្គង់ការហ្វឹកហាត់ ដើម្បីក្លាយជាកីឡាករបន្តវេនត្រៀមចូលរួមព្រឹត្តិការណ៍កីឡាយុវជនអាស៊ីឆ្នាំ២០២៩ ដែលកម្ពុជាទទួលធ្វើជាម្ចាស់ផ្ទះ៕

រូបភាព និងអត្ថបទ ៖ ជាវ ចន្ធូ