ឡុងដ៍៖ ក្រុមហ៊ុនអាកាសចរណ៍អៀរឡង់ Ryanair នៅថ្ងៃចន្ទសប្តាហ៍នេះនិយាយថា ប្រាក់ចំណេញសុទ្ធរបស់ខ្លួនធ្លាក់ចុះរហូតដល់ ៩៣ភាគរយ ក្នុងត្រីមាសទី៣ ឆ្នាំ២០២៣ ដោយសារតែតម្លៃប្រេងឥន្ធនៈកើនឡើងខ្ពស់។

ក្រុមហ៊ុនអាកាសចរណ៍អៀរឡង់ Ryanair បញ្ជាក់ថា ប្រាក់ចំណេញសុទ្ធរបស់ខ្លួន ធ្លាក់ចុះមកត្រឹម ១៤.៨លានអឺរ៉ូ ឬប្រហែល ១៦លានដុល្លារ ក្នុងរយៈពេលបីខែចុងក្រោយនៃឆ្នាំ២០២៣។ នាយកប្រតិបត្តិក្រុមហ៊ុនអាកាសចរណ៍អៀរឡង់នេះ គឺលោក Michael O’Leary និយាយថា Ryanair កំពុងបង្រួមការព្យាករណ៍អំពីប្រាក់ចំណេញសុទ្ធប្រចាំឆ្នាំរបស់ខ្លួន ចាប់ពីចន្លោះ ១.៨៥ពាន់លានអឺរ៉ូប និង ១.៩៥ពាន់លានអឺរ៉ូ។

តួលេខនេះធ្លាក់ចុះបន្តិច បើធៀបនឹងការរំពឹងទុកពីមុន ដែលមានចាប់ពីចន្លោះ ១.៨៥ពាន់លានអឺរ៉ូប ទៅ ២.០៥ពាន់លានអឺរ៉ូ។ ការចរាចរណ៍ដឹកអ្នកដំណើរកើនឡើង ៧ភាគរយ ដល់ ៤១.៤លាននាក់ បើទោះបីជាតម្លៃជាមធ្យមខ្ពស់ជាងមុន ការណ៍នេះជួយទូទាត់លើការចំណាយកើនឡើងផ្សេងៗទៀត។

ពាក់ព័ន្ធនឹងបញ្ហានេះ លោក O’Leary បានស្តីបន្ទោសទៅលើសង្រ្គាមរុស្ស៊ី និងអ៊ុយក្រែននៅអឺរ៉ុប, សង្គ្រាមអ៊ីស្រាអែល និងក្រុមហាម៉ាសនៅមជ្ឈិមបូព៌ា ក៏ដូចជាការពន្យារពេលការដឹកជញ្ជូនយន្តហោះប៊ូអ៊ីងជាដើម។ ជាពិសេស ក្នុងត្រីមាសទី៣ឆ្នាំមុន ការចំណាយលើថ្លៃប្រេងឥន្ធនៈរបស់ Ryanair បានកើនឡើង ៣៥ភាគរយ បើទោះបីជាប្រាក់ចំណូលកើនឡើង ១៧ភាគរយក៏ដោយ៕

ប្រភព៖ AFP ប្រែសម្រួលដោយ៖ ឈឹម ទីណា