គៀវ៖ ប្រធានាធិបតីអ៊ុយក្រែន លោក Volodymyr Zelensky បានទៅសួរសុខទុក្ខកងទ័ពអ៊ុយក្រែននៅជួរមុខ ហើយបានប្រគល់មេដាយដល់ពួកគេផងដែរ។ ជាការចុះជួប ចំពេលមានព័ត៌មានច្បាស់ការណ៍ថា មេទ័ពដ៏មានប្រជាប្រិយម្នាក់ អាចនឹងត្រូវបណ្តេញចេញក្នុងពេលឆាប់ៗនេះ។

ក្នុងពេលមានវត្តមាននៅតំបន់ Zaporizhzhya កាលពីថ្ងៃអាទិត្យ លោក Zelensky បាននិយាយថា លោកទៅទីនោះ គឺដើម្បីគាំទ្រ និងផ្តល់រង្វាន់ដល់ទាហាន ដែលលោកហៅថា «អ្នកចម្បាំងរបស់អ៊ុយក្រែន»។ លោកបានបន្តថា ទាហានជួរមុខទាំងនេះប្រឈមមុខនឹងបេសកកម្មដ៏លំបាក ដើម្បីវាយបកលើសត្រូវ និងការពារប្រទេសអ៊ុយក្រែន។

ដំណើរទស្សនកិច្ចរបស់ប្រធានាធិបតីទៅកាន់សមរភូមិជួរមុខនេះ កើតឡើងចំពេលមានភាពមិនប្រាកដប្រជាអំពីជោគវាសនារបស់លោកមេទ័ព Valery Zaluzhny ។ ថ្មីៗនេះ មានព័ត៌មានចង្អុលបង្ហាញថា រដ្ឋាភិបាលអ៊ុយក្រែនបានជូនដំណឹងដល់សេតវិមាន អំពីផែនការបណ្តេញមេបញ្ជាការយោធាកំពូលរបស់ប្រទេស ដែលមើលការខុសត្រូវលើសង្គ្រាមប្រឆាំងនឹងកងកម្លាំងកាន់កាប់របស់រុស្ស៊ី។ គេជឿថា ជាការប៉ុនប៉ងបណ្តេញ លោក Zaluzhny។ មេទ័ពរូបនេះធ្លាប់បានប៉ះទង្គិចជាមួយ លោក Zelensky លើបញ្ហាជាច្រើន បន្ទាប់ពីអ៊ុយក្រែនបានបើកការវាយលុក កាលពីឆ្នាំមុន ហើយពេលនោះ បរាជ័យក្នុងការដណ្តើមយកទឹកដីភាគច្រើន ដែលគ្រប់គ្រងដោយរុស្ស៊ីមកវិញ។

ក្នុងករណីដែលលោក Zaluzhny ត្រូវបានបណ្តេញចេញមែន គេជឿថា អាចនឹងប៉ះពាល់ដល់ការប្រយុទ្ធដណ្តើមការកាន់កាប់ទីតាំងនៅតាមបណ្តោយជួរមុខជាង១ពាន់គីឡូម៉ែត្រ ដែលពួកគេកំពុងប្រយុទ្ធជាមួយទាហានរុស្ស៊ីនោះ៕

ប្រភពពី AFP ប្រែសម្រួល៖ សារ៉ាត