ភ្នំពេញ៖ លោក ប៉ែន វុទ្ធី បានថ្លែងថា ការប្រកួតជ្រើសរើសជើងឯកថ្នាក់ ជាការប្រកួតកម្រិតខ្ពស់ ដើម្បីស្វែងរកធនធានកីឡាល្អៗត្រៀមតំណាង ជាតិចូលរួមក្នុងព្រឹត្តិការណ៍អន្តរជាតិ។

ថ្លែងក្នុងពិធីបិទការប្រកួត កីឡាប៊ូលីង ជ្រើសរើសជើងឯកថ្នាក់ជាតិ ប្រចាំ ឆ្នាំ២០២៣លោក ប៉ែន វុទ្ធី ប្រធាននាយកដ្ឋានអប់រំកាយ និង កីឡានៃ ក្រសួងអប់រំ យុវជន និងកីឡា បានបញ្ជាក់ថា ការរៀប ចំប្រកួតជ្រើសរើសជើងឯកថ្នាក់ជាតិ នាពេលនេះ គឺដើម្បីស្វែងរក កីឡាករ កីឡាការិនីឆ្នើមៗ និងមានទេពកោសល្យសម្រាប់ចូលរួម ការប្រកួតជាលក្ខណៈអន្តរជាតិនានានា ពិសេស ស៊ីហ្គេម លើកទី៣៣ ដែលប្រទេសថៃទទួលធ្វើជាម្ចាស់ផ្ទះ នៅក្នុងឆ្នាំ២០២៥ខាងមុខនេះ។ជាមួយគ្នានោះ លោក ក្នុងនាមនាយកដ្ឋានជំនាញក៏បានកោតសរសើរ និងវាយតម្លៃខ្ពស់ចំពោះការខិតខំរៀបចំរបស់សហព័ន្ធកីឡាប៊ូលីងកម្ពុជា និងកីឡាករ កីឡាការិនីមកពីបណ្តាក្លឹបទាំងអស់ ដែលចូលរួមប្រកួត បានបញ្ចេញអស់ពីសមត្ថភាព និងឈរលើគោលការណ៍កីឡា ដើម្បី ជំរុញឱ្យព្រឹត្តិការណ៍ទាំងមូលដំណើរការដោយរលូននិងជោគជ័យ។

ប្រធាននាយកដ្ឋានអប់រំកាយខាងលើ បានសង្កត់ធ្ងន់ថា រាជរដ្ឋា ភិ បាល កម្ពុជាអាណត្តិទី៧ បានដាក់ចេញនូវយុទ្ធសាស្ត្របញ្ចកោណ-ដំណាក់ កាលទី១ ដោយផ្តោត លើការអភិវឌ្ឍធនធានមនុស្ស ក្រសួង អប់រំ ក៏ បានកែទម្រង់អនុវិស័យអប់រំកាយ និងកីឡា ឈានទៅរកគុណភាព ដណ្ដើមមេដាយការប្រកួតកីឡាស៊ីហ្គេមឆ្នាំ២០២៥ នៅប្រទេសថៃ។
លោកបានរំលឹកថា ព្រឹត្តិការណ៍ដ៏សំខាន់កន្លងមក និងជាប្រវត្តិសាស្ត្រ គឺកម្ពុជាធ្វើជាម្ចាស់ផ្ទះនៃការរៀបចំព្រឹត្តិការណ៍កីឡាស៊ីហ្គេម លើក ទី៣២ ឆ្នាំ២០២៣ ដោយទទួលបានជោគជ័យដ៏ត្រចះត្រចង់ និង ទទួល បានការកោតសរសើរលើឆាកអន្តជាតិ។
ដោយឡែក លោក ឆាយ កៀក អគ្គលេខាធិការ សហព័ន្ធកីឡា ប៊ូលីង កម្ពុជា បានបញ្ជាក់ឱ្យដឹងថា ការប្រកួតកីឡាប៊ូលីងជើងឯក ថ្នាក់ ជាតិប្រចាំឆ្នាំ២០២៣នេះ មានប្រតិភូ គ្រូបង្វឹក កីឡាករ កីឡាការិនី ចូលរួមសរុបចំនួន ៤២នាក់ ក្នុងនោះកីឡាករ ២០នាក់ និងកីឡា ការិនី១១នាក់មកពីកក្លឹបចំនួន៥ ដែលការប្រកួតប្រជែង បានធ្វើ ឡើងរយៈពេល១០ថ្ងៃ។ លោក អះអាងថា ថ្វីដ្បិតនេះជាការ ប្រកួត ជ្រើសរើសជើងឯកថ្នាក់ជាតិលើកដំបូង ប៉ុន្តែកីឡាករកីឡាការិនី ចូល រួមសុទ្ធសឹងតែមានគុណភាព ដែលអាចឱ្យសហព័ន្ធជ្រើសរើស យក ទៅបំពាក់បំប៉នបន្ថែមត្រៀមចូលរួមការប្រកួតកម្រិតអន្តរជាតិនៅពេលខាងមុខ។
គួរបញ្ជាក់ថា សម្រាប់ជ័យលាភី ក្លឹបប្រូប៊ូលស្ព័រ ឈរនៅចំណាត់ ថ្នាក់លេខ១ ដោយដណ្តើមបានមេដាយសរុប១៣គ្រឿងក្នុងនេះ មាស៤ ប្រាក់៤ និងសំរឹទ្ធ៥។លេខ២ ក្លឹបប៊្លូអូអ៊ីអនសែនសុខ មេដាយសរុប៥គ្រឿង មាស២ ប្រាក់២ និងសំរឹទ្ធ១។លេខ៣ ក្លឹបប៉ូលិសប៊ូលីង ឈ្នះមេដាយសរុប ៥គ្រឿង មាស១ ប្រាក់១ និងសំរឹទ្ធ៣។ លេខ៤ ក្លឹបប៊ូលអូអ៊ីអនសុធារស មេដាយមាស ១ និងប្រាក់១ ខណៈក្លឹបប៊ូសស្ទ័រប៊ូលីង ឈ្នះមេដាយមាស១ និងមេដាយប្រាក់១គ្រឿង៕

ដោយ៖ ជាវ ចន្ធូ