ភ្នំពេញ៖ លោក ទូច សុឃៈ សុខៈអ្នកនាំពាក្យរងក្រសួងមហាផ្ទៃបានអោយដឹងថា ក្នុងយៈពេល៧ថ្ងៃ ពោលគឺចាប់ពីថ្ងៃទី៥ ដល់ថ្ងៃទី១១ ខែកម្ភៈ ឆ្នាំ២០២៤ កម្លាំង នគរ បាលជាតិ បន្តប្រតិបត្តិការបង្ក្រាបបទល្មើសគ្រឿងញៀនបានចំនួន ១៣៣ករណី។

បើតាម លោក ទូច សុឃៈ សុខៈ ក្នុងកិច្ចខិតខំប្រឹងប្រែងបំពេញតួនាទី និង ភារកិច្ច ដើម្បីសេចក្ដីសុខនិងភាពកក់ក្ដៅជូនប្រជាពលរដ្ឋ កម្លាំងនគរបាលជាតិ ទាំងកម្រិត អគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានី-ខេត្ត អធិការដ្ឋាន នគរបាលក្រុង ស្រុក ខណ្ឌ និងប៉ុស្តិ៍រដ្ឋបាលឃុំ-សង្កាត់ ទូទាំងប្រទេស បានឃាត់ ខ្លួនជនសង្ស័យសរុបចំនួន២៩៤នាក់។

ការប្រយុទ្ធប្រឆាំងគ្រឿងញៀនខុសច្បាប់ គឺជាកិច្ចការអាទិភាពមួយ ក្នុចចង្កោម ការងារអាទិភាពចំនួន៦ ដែលឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ដៅយកមកអនុវត្តចាប់ពីដើមនីតិកាលទី៧ ស្របតាមមរតក គោលនយោបាយភូមិ-ឃុំ-សង្កាត់មានសុវត្ថិភាព និងគោលការណ៍ដឹកនាំ របស់ សម្ដេច ហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ។

ឈរលើគោលការណ៍មនុស្សគ្រប់រូបមានសិទ្ធិ និងទំនួលខុសត្រូវដូចគ្នាចំពោះមុខច្បាប់ និងជាពិសេសដោយមានការ ដាក់ចេញគោលការណ៍ «សម្អាតផ្ទះយើង» ប្រកបដោយ ភាពម៉ឺងម៉ាត់របស់ សម្ដេចធិបតីនាយករដ្ឋមន្រ្តី  ឯកឧត្តមអភិសន្តិបណ្ឌិត ស សុខា បានអនុវត្ត ការធ្វើតេស្តរកសារធាតុញៀនលើមន្រ្តីនគរបាលជាតិ និងមន្រ្តី ពន្ធនាគារ ក្រសួងមហាផ្ទៃ រហូតឈានដល់ការសម្រេចបណ្ដេញមន្រ្តីមួយចំនួន តូចចេញ ពីក្របខ័ណ្ឌ បន្ទាប់ពីរកឃើញថាបានប្រើប្រាស់គ្រឿងញៀន៕

ដោយ ប៊ុនធី/ភារ៉ា