ភ្នំពេញ៖ ក្រសួងបរិស្ថានបានឱ្យដឹងថា៖កាលពីថ្ងៃទី១៨ ខែមីនា ឆ្នាំ២០២៤ ក្រុមការងារចំនួន ១០ក្រុម ដែលមានកម្លាំងសរុប ៧៨៩នាក់ បានបន្តសកម្មភាព ចុះបង្រ្កាបការកាប់រុករានដីព្រៃរបស់រដ្ឋ នៅក្នុងស្រុកភ្នំក្រវាញ និងស្រុកវាលវែង ខេត្តពោធិ៍សាត់ ជាលទ្ធផលសម្រេចបានឃ្លុំដីបាន ១៧៧,៧៤ហ.ត និងបានដកហូត ផាល ត្រាក់ទ័រ ៤គ្រឿង កាំភ្លើងបាញ់ខ្យល់ ១គ្រឿង ម៉ាស៊ីនកាត់ស្មៅ ០៤គ្រឿង ម៉ាស៊ីនបាញ់ថ្នាំ ០១គ្រឿង ម៉ូតូ ២គ្រឿង។

ប្រភពខាងលើនេះបានបញ្ជាក់បន្ថែមថា៖ក្រុមចម្រុះបាន រុះរើ រោងប្រក់សង្ក័សី ១៧ខ្នង រោងតង់កៅស៊ូ ១២ខ្នង រោងប្រក់ស្លឹក ៥ខ្នង និងដើមដំឡូង ៥៧០បាច់ ដើមចេក ៩០គុម្ភ ព្រមទាំង បានបង្គោលរបឯង ៣១០ដើម។

គួរបញ្ជាក់ថា ប្រតិបត្តិការនៃកម្លាំងចម្រុះ នៅខេត្តពោធិ៍សាត់ បានធ្វើឡើង យ៉ាងក្តៅគគុក តាមបញ្ជារបស់រាជរដ្ឋាភិបាលកម្ពុជា ឱ្យមានការពង្រឹងការគ្រប់គ្រងធនធានធម្មជាតិ។

កិច្ចប្រជុំបន្ទាន់មួយ បានរៀបចំឡើងក្រោមអធិបតីភាព ឯកឧត្តមនាយឧត្តមសេនីយ៍ សៅ សុខា ប្រធានគណៈកម្មការថ្នាក់ជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ និង ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន នាថ្ងៃទី១០ ខែមីនា ឆ្នាំ២០២៤ បានដាក់ចេញការអន្តរាគមន៍បន្ទាន់ ដោយបញ្ជូនកម្លាំងថ្នាក់ជាតិ សហការជាមួយបញ្ជាការកងឯកភាពខេត្ត ចុះទប់ស្កាត់កុំឱ្យមានការទន្រ្ទាន រុករាន កាន់កាប់ដីក្នុងតំបន់ធម្មជាតិ ឱ្យទាន់ពេលវេលា និងថែរក្សាសម្បត្តិធម្មជាតិសម្រាប់មនុស្សជាតិ៕

ដោយ ៖ ម៉ាដេប៉ូ