តៃប៉ិ៖ ក្រសួងការពារជាតិកោះតៃវ៉ាន់ នៅថ្ងៃព្រហស្បតិ៍នេះ និយាយថា យន្តហោះយោធាចិនចំនួន ៣២គ្រឿង ត្រូវបានគេប្រទះឃើញហោះឆ្វែលជុំវិញកោះនេះក្នុងរយៈពេល២៤ម៉ោង ដែលនេះជាចំនួនច្រើនបំផុតលើកទីពីរក្នុងឆ្នាំនេះ។

ក្រសួងការពារជាតិកោះតៃវ៉ាន់បានបញ្ជាក់ថា ក្នុងរយៈពេល២៤ម៉ោងចុងក្រោយ គិតត្រឹមម៉ោង ៦៖០០នាទីព្រឹកថ្ងៃព្រហស្បតិ៍នេះ ក្រសួងការពារជាតិតៃវ៉ាន់ ក៏បានប្រទះឃើញនាវាចម្បាំងចិន ៥គ្រឿងធ្វើសកម្មភាព ក្បែរកោះតៃវ៉ាន់ផងដែរ។

ក្រសួងបន្ថែមថា ក្នុងចំណោមយន្ដហោះចម្បាំងទាំង ៣២គ្រឿង មាន១៣គ្រឿងបានហោះឆ្លងកាត់ខ្សែបន្ទាត់កណ្ដាល នៃច្រកសមុទ្រតៃវ៉ាន់ ហើយកងកម្លាំងប្រដាប់តៃវ៉ាន់ កំពុងតាមឃ្លាំមើលស្ថានការណ៍ និងបានដាក់ពង្រាយយន្ដហោះ និងនាវាល្បាត ព្រមទាំងដំណើរការប្រព័ន្ធការពារ ដែនអាកាស ដើម្បីចាប់សញ្ញាសកម្មភាពរបស់យន្ដហោះចម្បាំងចិន។

វត្តមានយន្តហោះ និងនាវារបស់ប្រទេសចិននេះ កើតឡើងបន្ទាប់ពីការបោះឆ្នោតជ្រើសរើសប្រធានាធិបតីតៃវ៉ាន់ កាលពីថ្ងៃទី១៣ ខែមករា ដែលទទួលជ័យជំនះដោយអនុប្រធានាធិបតីបច្ចុប្បន្ន គឺលោក Lai Ching-te ដែលទីក្រុងប៉េកាំងមិនចូលចិត្ត។

សូមរម្លឹកថា កាលពីចុងខែមករា និងដើមខែកុម្ភៈឆ្នាំនេះ ក្រសួងការពារជាតិកោះតៃវ៉ាន់ក៏បានប្រទះឃើញវត្តមានយន្តហោះចម្បាំងចិនចំនួន ៣៣គ្រឿងហោះឆ្វែលជុំវិញកោះតៃវ៉ាន់ផងដែរ ដែលនេះជាចំនួនខ្ពស់បំផុតក្នុងឆ្នាំ២០២៤៕ ប្រភព៖ AFP ប្រែសម្រួលដោយ៖ ឈឹម ទីណា