ការលក់លំនៅដ្ឋានថ្មីនៅសហរដ្ឋអាមេរិកធ្លាក់ចុះលើសពីការំពឹងទុក
វ៉ាស៊ីនតោន៖ យោងតាមទិន្នន័យរបស់រដ្ឋាភិបាល ដែលចេញផ្សាយនៅថ្ងៃចន្ទបានឱ្យដឹងថា ការលក់ផ្ទះថ្មីរបស់សហរដ្ឋអាមេរិក បានធ្លាក់ចុះលើសពីការរំពឹងទុកនៅក្នុងខែកុម្ភៈ ឆ្នាំ២០២៤។
នាយកដ្ឋានពាណិជ្ជកម្មអាមេរិកនិយាយថា ការលក់ផ្ទះថ្មីលក្ខណៈគ្រួសារ មានអត្រាប្រចាំឆ្នាំចំនួន ៦៦២,០០០យូនីតកាលពីខែកុម្ភៈ ធ្លាក់ចុះ ០.៣ភាគរយ បើធៀបនឹងខែមករា មានចំនួន ៦៦៤,០០០យូនីត។ រីឯតម្លៃលក់ជាមធ្យមនៃអចលនទ្រព្យថ្មីដែលបានលក់ក្នុងខែកុម្ភៈ មានចំនួន ៤០០,៥០០ដុល្លារ ទាបជាងខែមករា។
![](https://asset.ams.com.kh/central/media/2024/03/photo_2024-03-26_15-03-06-1-1024x681.jpg)
តួលេខធ្លាក់ចុះបន្តិចបន្តួចនេះ កើតឡើងដោយសារអត្រាប្រាក់កម្ចីទិញផ្ទះនៅតែមានកម្រិតខ្ពស់ក្នុងរយៈពេលប៉ុន្មានឆ្នាំចុងក្រោយនេះ។ ហើយស្ថានភាពនេះដែរ ក៏ធ្វើឱ្យម្ចាស់លំនៅដ្ឋានស្ទាក់ស្ទើរដាក់លក់អចលនទ្រព្យរបស់ពួកគេនៅលើទីផ្សារផងដែរ ដែលនាំឱ្យមានកង្វះការផ្គត់ផ្គង់។
ប្រសិនបើប្រៀបធៀបនឹងឆ្នាំមុន ការលក់ផ្ទះថ្មីលក្ខណៈគ្រួសារ មានចំនួនខ្ពស់ជាង ៥.៩ភាគរយនៅក្នុងខែកុម្ភៈ។ ទោះយ៉ាងណាក៏ដោយ អ្នកវិភាគព្រមានថា តួលេខលក់ផ្ទះថ្មីអាចមានការប្រែប្រួល។ លោក Oliver Allen សេដ្ឋវិទូជាន់ខ្ពស់អាមេរិកនៅក្រុមហ៊ុន Pantheon Macroeconomics រំពឹងថា ការធ្លាក់ចុះនៃអត្រាប្រាក់កម្ចីទិញផ្ទះនៅឆ្នាំនេះ នឹងនាំទៅរកការរស់ឡើងវិញ នៃតម្រូវការកម្ចីទិញផ្ទះ។
![](https://asset.ams.com.kh/central/media/2024/03/photo_2024-03-26_15-03-07-2-1024x682.jpg)
គិតត្រឹមថ្ងៃទី២១ ខែមីនា ឆ្នាំ២០២៤ កម្ចីទិញផ្ទះក្នុងអត្រាថេររយៈពេល ៣០ឆ្នាំជាមធ្យមមានចំនួន ៦.៨៧ភាគរយ នេះបើយោងតាមក្រុមហ៊ុនហិរញ្ញវត្ថុអាមេរិក Freddie Mac។ តួលេខនេះ ខ្ពស់ជាងកាលពីខែមីនា ឆ្នាំ២០២១ នៅពេលដែលអត្រាមានចន្លោះពី ៣ ទៅ ៣.២ភាគរយ៕
![](https://asset.ams.com.kh/central/media/2024/03/photo_2024-03-26_15-03-07-1024x682.jpg)
ប្រភព៖ AFP ប្រែសម្រួលដោយ៖ ឈឹម ទីណា