ភ្នំពេញ៖ ឯកឧត្តម រដ្ឋមន្ដ្រី ឌិត ទីណារដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទបានមានប្រសាសន៍ថា«សូមស្វាគមន៍ លោក គ្រី ម៉ះផល ត្រឡប់មកកាន់មាតុប្រទេសវិញ ។ ១ឆ្នាំ ៤ខែ និង ១០ថ្ងៃ គឺជារយៈពេលដ៏យូរសម្រាប់មន្ដ្រីកម្ពុជាស្អាតស្អំម្នាក់ ដែលរងការចោទប្រកាន់ដោយអយុត្តិធម៌ ពីសំណាក់រដ្ឋអាជ្ញា និងទីភ្នាក់ងារមច្ឆជាតិ និង ព្រៃឈើ អាមេរិក ។

ជាមួយគ្នានេះ ឯកឧត្តមរដ្ឋមន្រ្តី បានថ្លែងផងថា ខ្ញុំបាទ សូមគោរពថ្លែងអំណរគុណ ដល់ សម្ដេចតេជោ ហ៊ុន សែន និង សម្ដេចធិបតី ហ៊ុន ម៉ាណែត ព្រមទាំង ក្រសួង ស្ថាប័ន ពាក់ព័ន្ធទាំងអស់ដែលយកចិត្តទុកដាក់ និង សហការគាំទ្រ ក្នុងដំណើរការស្វែងរកយុត្តិធម៌ ជូន លោក គ្រី ម៉ះផល ។ យុត្តិធម៌ សម្រាប់មន្ដ្រីស្អាតស្អំ មិនអាចកាត់ថ្លៃបានទេ ។

គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ បានសាទរចំពោះ លោក គ្រី ម៉ះផល ដែលបានទទួលយុត្តិធម៌ពីតុលាការ អាមេរិក។ ជាមួយគ្នានេះ ក្រសួងក៏បាន ធ្វើការថ្កោលទោសចំពោះទង្វើរបស់ទីភ្នាក់ងារមច្ឆជាតិនិងសត្វព្រៃអាមេរិក ដែលរំលោភអំណាច និងពុំគោរពតាមឧត្តមានុវត្តអន្តរជាតិក្នុងការអនុវត្តច្បាប់ឆ្លងដែន។
ក្រៅពីនេះក្រសួងកសិកម្មក៏បានលើកឡើងពីកិច្ចខិតខំប្រឹងប្រែងស្វែងរកយុត្តិធម៌ជូនមន្ត្រី ពីសំណាក់រាជរដ្ឋាភិបាលកម្ពុជា គឺជាសក្ខីភាពបង្ហាញថា មន្ត្រីកម្ពុជាស្អាតស្អំ មិនអាចត្រូវរំលោភបំពានបានឡើយ ទោះស្ថិតនៅក្នុងកាលៈទេសៈ និងពីសំណាក់មជ្ឈដ្ឋានណាក៏ដោយ ។

ក្រសួងកសិកម្មបានឱ្យដឹងដែរថា លោក គ្រី ម៉ះផល ប្រធាននាយកដ្ឋានសត្វព្រៃ និងជីវចម្រុះ នៃរដ្ឋបាលព្រៃឈើ ត្រូវបានតុលាការរដ្ឋហ្គូរីដា សហរដ្ឋអាមេរិក សម្រេចកាលពី ថ្ងៃទី២២ ខែមីនា ឆ្នាំ២០២៤ ថាគ្មានទោសដូចការចោទប្រកាន់នៅក្នុងសំណុំរឿងសមគំនិតក្នុងការរត់ពន្ធសត្វស្វាក្តាមទៅ សហរដ្ឋអាមេរិកនោះទេ ៕

ដោយ ៖ ម៉ាដេប៉ូ