វ៉ាស៊ីនតោន៖ នាយកប្រតិបត្តិក្រុមហ៊ុនសេវាកម្មហិរញ្ញវត្ថុដ៏ធំរបស់អាមេរិក JPMorgan Chase លោក Jamie Dimon នៅថ្ងៃចន្ទនេះព្រមានថា អតិផរណាអាចនឹងបន្តកើនឡើងក្នុងរយៈពេលយូរជាងការរំពឹងទុក ដែលទំនងជាបង្កផលប៉ះពាល់ដល់កំណើនសេដ្ឋកិច្ចរបស់សហរដ្ឋអាមេរិក។

នៅក្នុងលិខិតប្រចាំឆ្នាំរបស់ខ្លួនផ្ញើទៅកាន់ភាគទុនិក នាយកប្រតិបត្តិក្រុមហ៊ុន JPMorgan Chase លោក Dimon បានចង្អុលទៅលើសម្ពាធអតិផរណា ដែលទំនងជាប៉ះពាល់ទំនុកចិត្តរបស់ទីផ្សារភាគហ៊ុន អំពីទស្សនវិស័យកំណើន ហើយអាចនាំឱ្យមានអត្រាការប្រាក់កាន់តែខ្ពស់។ លោក Dimon បានលើកឡើងពីការផ្លាស់ប្តូរគោលនយោបាយពាណិជ្ជកម្ម និងការចំណាយលើសេដ្ឋកិច្ចបៃតង គឺជាកត្តាជំរុញដល់កំណើនអតិផរណារបស់សហរដ្ឋអាមេរិក ទោះបីជាមានសូចនាករសេដ្ឋកិច្ចជាច្រើនដែលនៅតែល្អក៏ដោយ។

បន្ថែមលើនេះ លោក Dimon ក៏បានលើកឡើងពីបរិយាកាសភូមិសាស្ត្រនយោបាយ ដែលមិនច្បាស់លាស់ផងដែរ ក្នុងនោះរួមមានសង្គ្រាមរុស្ស៊ី និងអ៊ុយក្រែន ក៏ដូចជាជម្លោះនៅតំបន់មជ្ឈិមបូព៌ា។
សូមរម្លឹកថា កាលពីឆ្នាំមុន ក្រុមហ៊ុន JPMorgan Chase (JPM) ទទួលបានប្រាក់ចំណេញច្រើនជាងអ្វីដែលខ្លួនធ្លាប់មានពីមុន។

ជាក់ស្តែងក្រុមហ៊ុនផ្តល់ប្រាក់កម្ចីធំជាងគេនៅសហរដ្ឋអាមេរិកមួយនេះ បានរាយការណ៍ថា ខ្លួនទទួលបានប្រាក់ចំណូលសុទ្ធប្រចាំឆ្នាំរហូតដល់ ៤៩.៦ពាន់លានដុល្លារ ដែលនេះជាចំនួនច្រើនបំផុតមិនធ្លាប់មាននៅក្នុងប្រវត្តិសាស្ត្រ នៃឧស្សាហកម្មធនាគារអាមេរិក នេះបើយោងតាមការចេញផ្សាយពីគេហទំព័រ finance.yahoo៕

ប្រភព៖ AFP ប្រែសម្រួលដោយ៖ ឈឹម ទីណា