អង្គការសុខភាពពិភពលោក ហៅកាត់ WHO បានអះអាង កាលពីថ្ងៃអង្គារថា មនុស្សជាង ៣៥០០នាក់បានស្លាប់ ដោយសារមេរោគរលាកថ្លើម ជារៀងរាល់ថ្ងៃ។

ទិន្នន័យថ្មីពីប្រទេសចំនួន ១៨៧ បានបង្ហាញថា ចំនួនអ្នកស្លាប់ដោយសារជំងឺវីរុសរលាកថ្លើម បានកើន ដល់១.៣លាននាក់ ក្នុងឆ្នាំ២០២២។ ៨៣ ភាគរយនៃអ្នកស្លាប់ គឺមានផ្ទុកជំងឺរលាកថ្លើមប្រភេទ B ហើយ ១៧ភាគរយ គឺផ្ទុកជំងឺរលាកថ្លើមប្រភេទ C ។

លោកស្រី Meg Doherty ប្រធានកម្មវិធីមេរោគអេដស៍ ជំងឺរលាកថ្លើម និងជំងឺឆ្លងតាមផ្លូវភេទ របស់ WHO បានប្រាប់សន្និសីទសារព័ត៌មានថា នេះគឺជានិន្នាការគួរឱ្យព្រួយបារម្ភ។

ប្រធាន WHO និយាយថា ថា ការស្លាប់កំពុងកើនឡើង ដោយសារតែមានមនុស្សតិចតួចពេក ដែលមានជំងឺរលាកថ្លើមហើយ ត្រូវបានគេធ្វើរោគវិនិច្ឆ័យ និងព្យាបាលទាន់ពេល។ ការលើកឡើងនេះស្របនឹងការរកឃើញរបស់នាយកដ្ឋានបង្ការជំងឺឆ្លង CDC របស់អាមេរិកដែលថា មនុស្សជាច្រើននាក់ដែលមានជំងឺរលាកថ្លើម មិនមានរោគសញ្ញា និងមិនដឹងថា ពួកគេឆ្លងមេរោគនោះទេ។ ប្រភពបាបន្តថា ការសេពគ្រឿងស្រវឹងច្រើន ការលេបថ្នាំ និងលក្ខខណ្ឌវេជ្ជសាស្ត្រមួយចំនួន អាចបណ្តាលឱ្យរលាកថ្លើម។ រោគសញ្ញា អាចរួមមានគ្រុនក្តៅ អស់កម្លាំង បាត់បង់ចំណង់អាហារ ចង្អោរ ក្អួត ឈឺពោះ ឈឺសន្លាក់ ជាដើម៕

ប្រភពពី AFP ប្រែសម្រួល៖ សារ៉ាត