ក្រុមហ៊ុន Tesla គ្រោងនឹងបញ្ជូនក្រុមបច្ចេកទេស ទៅកាន់ប្រទេសឥណ្ឌា នៅក្នុងខែមេសានេះ ដើម្បីសិក្សាទីតាំងសម្រាប់រោងចក្រផលិតរថយន្តអគ្គិសនី ដែលមានតម្លៃ ចន្លោះពី ២ទៅ៣ពាន់លានដុល្លារ។ នេះបើតាមកាសែត Financial Times។

តាមរយៈបណ្តាញសង្គម X កាលពីថ្ងៃពុធ លោក Elon Musk មហាសេដ្ឋីបច្ចេកវិទ្យា ដែលជាម្ចាស់ក្រុមហ៊ុន Tesla បានប្រកាសថា លោកនឹងជួបនាយករដ្ឋមន្ត្រីឥណ្ឌា លោក Narendra Modi ឆាប់ៗនេះ។ គម្រោងជួបគ្នានេះ ត្រូវបានប្រកាសឡើង ស្របពេលដែលឥណ្ឌាកំពុងចង់ផ្តោតការវិនិយោគ លើរថយន្តអគ្គិសនី ឬ EV។

កាលពីខែមុន ប្រទេសឥណ្ឌាបានកាត់បន្ថយពន្ធលើការនាំចូលរថយន្តអគ្គិសនី សម្រាប់ក្រុមហ៊ុនផលិតរថយន្ត EV ពិភពលោក ហើយថែមទាំងបានប្តេជ្ញាវិនិយោគ ៥០០លានដុល្លារ លើរថយន្តប្រភេទ EV នេះ ហើយគ្រោងនឹងចាប់ផ្តើមផលិតកម្មក្នុងស្រុក នៅរយៈពេលបីឆ្នាំខាងមុខ។

លោក Elon Musk មិនបានផ្តល់កាលបរិច្ឆេទ ច្បាស់លាស់ សម្រាប់ដំណើរទស្សនកិច្ចនៅប្រទេសឥណ្ឌានោះទេ។ ក៏ប៉ុន្តែ ប្រព័ន្ធផ្សព្វផ្សាយឥណ្ឌាបានរាយការណ៍ថា ដំណើរទស្សនកិច្ចនេះ អាចធ្វើឡើង នៅថ្ងៃទី២២ ខែមេសា៕

ប្រភពពី AFP ប្រែសម្រួល៖ សារ៉ាត