ត្រឹម៣ខែ ឡានអគ្គិសនីវៀតណាម VinFast រកបានជាង ៣០០លានដុល្លារ
ហាណូយ៖ ក្រុមហ៊ុនផលិតរថយន្តអគ្គិសនីកំពូលរបស់វៀតណាម VinFast នៅថ្ងៃពុធនេះ បានឱ្យដឹងថា ប្រាក់ចំណូលរបស់ខ្លួនក្នុងរយៈពេល៣ខែដំបូងនៃឆ្នាំ២០២៤ មានចំនួន ៣០២.៦លានដុល្លារ កើនឡើងជិត ២៧០ភាគរយ បើធៀបនឹងរយៈពេលដូចគ្នាក្នុងឆ្នាំ២០២៣។
ក្រុមហ៊ុន VinFast បានបញ្ជាក់នៅក្នុងឯកសារមួយបញ្ជូនទៅកាន់គណៈកម្មការមូលបត្រអាមេរិក (SEC) ថា ប្រាក់ចំណូលរបស់ខ្លួនក្នុងរយៈពេល៣ខែដំបូងនៃឆ្នាំ២០២៤នេះ មានចំនួន ៣០២.៦លានដុល្លារ កើនឡើងជិត ២៧០ភាគរយ បើធៀបនឹងរយៈពេលដូចគ្នាក្នុងឆ្នាំ២០២៣។ រថយន្តអគ្គិសនី VinFast សរុបចំនួន ៩,៦៨៩គ្រឿង ត្រូវបានចែកចាយនៅក្នុងត្រីមាសទី១ ឆ្នាំ២០២៤ កើនឡើងច្រើនជាង ៤ដង បើធៀបនឹងឆ្នាំមុន។
![](https://asset.ams.com.kh/central/media/2024/04/photo_2024-04-18_17-06-55-1024x570.jpg)
យ៉ាងណាមិញ ក្រុមហ៊ុន VinFast ក៏បានរាយការណ៍ពីការខាតបង់សុទ្ធចំនួន ៦១៨.៣លានដុល្លារ កើនឡើង ៣.៥ភាគរយពីមួយឆ្នាំទៅមួយឆ្នាំ ដោយតួលេខនេះ ធ្លាក់ចុះច្រើនជាង ១២ភាគរយ បើធៀបនឹងត្រីមាសមុន។ ទោះបីជាយ៉ាងណា ក្រុមហ៊ុន VinFast នៅតែបន្តរក្សាគោលដៅរបស់ខ្លួន នោះគឺការចែកចាយរថយន្តអគ្គិសនីរហូតដល់ ១០០,០០០គ្រឿងនៅក្នុងឆ្នាំ២០២៤នេះ។
គួរបញ្ជាក់ថា ក្រុមហ៊ុនផលិតរថយន្តអគ្គិសនីក្នុងស្រុកដំបូងគេរបស់វៀតណាមនេះ កំពុងព្យាយាមវាយលុកចូលទៅក្នុងទីផ្សារអន្តរជាតិ ស្ថិតក្នុងគោលបំណងប្រកួតប្រជែងជាមួយក្រុមហ៊ុនផលិតរថយន្តអគ្គិសនីកំពូលៗនៅលើពិភពលោក មានដូចជា Tesla និង BYD ជាដើម។
ជាក់ស្តែង ចាប់តាំងពីដើមឆ្នាំ២០២៤មក VinFast បានបន្តពង្រីកខ្លួននៅលើទីផ្សារអន្តរជាតិ ដោយបានចុះហត្ថលេខាជាមួយវិនិយោគិននៅក្នុងប្រទេសឥណ្ឌូនេស៊ី ថៃ និងអូម៉ង់ ក៏ដូចជាចាប់ផ្តើមសាងសង់រោងចក្រផលិតរថយន្តអគ្គិសនីនៅក្នុងប្រទេសឥណ្ឌា៕ ប្រភព៖ AFP ប្រែសម្រួលដោយ៖ ឈឹម ទីណា
![](https://asset.ams.com.kh/central/media/2024/04/photo_2024-04-18_17-06-53-1024x675.jpg)