រដ្ឋបាលខេត្តបាត់ដំបង និងមន្ទីរជំនាញ អបអរនៃទិវា ពលកម្ម អន្តរជាតិ ១ ឧសភា
បាត់ដំបង៖ រដ្ឋបាលខេត្ត និងមន្ទីរកាងារ និងបណ្ដុះបណ្ដាល វិជ្ជាជីវៈខេត្តបាត់ដំបង កាលពីព្រឹកថ្ងៃទី៦ ខែឧសភាបានរៀប ចំពិធីជួបសំណេះសំណាលជាមួយកម្មករ និយោជិត រោងចក្រ ចិន នៃក្រុមហ៊ុន ហ្វីនិក អ៊ិនដាស្រ្ដៀល ឯ.ក ក្នុងឱកាសខួប អនុស្សាវរីយ៍លើកទី១៣៨ ទិវាពលកម្មអន្តរជាតិ១ឧសភា ឆ្នាំ២០២៤ក្រោមប្រធានបទ“សហគ្រាសមួយ ជាសហគមន៍ សុខសាន្តមួយ” ក្រោមអធិបតីភាពលោក ទីន សារ៉ាវុធ អភិបាលរងខេត្តបាត់ដំបង។
![](https://asset.ams.com.kh/central/media/2024/05/2-33-1024x675.jpg)
លោក មាស ដារ៉ា ប្រធានមន្ទីរការងារ និងបណ្តុះបណ្តាលវិជ្ជា ជីវៈខេត្តបាត់ដំបងបានរំលេចពីប្រធានបទថា កាលពីថ្ងៃទី ២៣ខែធ្នូឆ្នាំ២០២៣ ក្រសួងការងារ និងបណ្តុះបណ្តាលវិជ្ជាជីវៈ បានចេញប្រកាសស្តីពី៖ការកំណត់ លក្ខខណ្ឌវិនិច្ឆ័យ” សហគ្រាសមួយ ជាសហគមន៍ សុខសាន្តមួយ” ដែលមាន គោលបំណង ផ្តោតនូវការចូលរួមលើកកម្ពស់សុខដុមនីយកម្ម ក្នុងទំនាក់ទំនងវិជ្ជាជីវៈ និង ដើម្បីសំដៅបង្កើតនូវវប្បធម៌ អនុលោមភាពតាមច្បាប់ ដើម្បីពង្រឹងប្រសិទ្ធភាពនៃយន្តការ ដោះស្រាយវិវាទការងារក្រៅប្រព័ន្ធតុលាការ ដើម្បីពង្រឹងរបប សន្តិសុខសង្គម និង ការបង្កើនផលិតភាពការងារ តាមរយៈ ការ រៀបចំនូវយុទ្ធនាការនៅទូទាំងប្រទេស ចាប់ពីឆ្នាំ២០២៤តទៅ ។
![](https://asset.ams.com.kh/central/media/2024/05/3-32-1024x572.jpg)
បើតាម លោក មាស ដារ៉ា ឱ្យដឹងថា មន្ទីរការងារ និងបណ្តុះ បណ្តាលវិជ្ជាជីវៈ ខេត្តបាននិងកំពុងគ្រប់គ្រងសហគ្រាស គ្រឹះស្ថានចំនួន ៨១២ សហគ្រាស មានកម្មករ និយោជិត សរុបចំនួន១៦ ២៦៨នាក់ (ស្ត្រី ៦ ៩៤៩នាក់)។ក្នុងនោះ ក៏មានកម្មករ និយោជិតបរទេសចំនួន ៥៣៣នាក់(ស្ត្រី ១១០នាក់)។សហគ្រាស គ្រឹះស្ថាន ដែលបានចុះបញ្ជីមាន ចំនួន៥១០សហគ្រាស ស្មើនឹង៦៥ភាគរយនិងសហគ្រាស ដែលបានបោះឆ្នោតជ្រើសរើសប្រតិភូបុគ្គលិកមាន ១៤២ សហគ្រាស ស្មើនឹង២៨ភាគរយដែលមានប្រតិភូពេញសិទ្ធិ ចំនួន១៩៧នាក់និងប្រតិភូជំនួយចំនួន១៩៧នាក់។
![](https://asset.ams.com.kh/central/media/2024/05/4-28-1024x627.jpg)
ក្នុងឱកាសសំណេះសំណាលលោក ទីន សារ៉ាវុធ អភិបាលរង ខេត្តបាត់ដំបងបានជំរុញឱ្យសហគ្រាសទាំងអស់នៅក្នុងខេត្តបាត់ដំបង ត្រូវធ្វើការប្រកួតប្រជែងគ្នា ដើម្បីដណ្ដើមយក ពាន រង្វាន់នៅក្នុងសហគ្រាសរបស់ខ្លួន ដែលជាពានជ័យ លាភី “សហគ្រាសមួយ ជាសហគមន៍សុខសាន្តមួយ៖ ពីសម្ដេច ធិបតី ហ៊ុន ម៉ាណែត នាយករដ្ឋមន្រ្តីកម្ពុជា។
![](https://asset.ams.com.kh/central/media/2024/05/5-21-1024x633.jpg)
លោកក៏បានក្រើនរម្លឹកដល់កម្មករ និយោជិតទាំងអស់ត្រូវជួយ ផ្សព្វផ្សាយដល់យុវជនមកពីគ្រួសារក្រីក្រី និងមានហានិភ័យ ឱ្យនាំគ្នាមកចុះឈ្មោះចូលរៀនជំនាញបច្ចេកទេសវិជ្ជាជីវៈ តាមវិទ្យាស្ថានទាំងបី ដែលមានក្នុងខេត្តបាត់ដំបង ដើម្បី ទទួលបានជំនាញមួយច្បាស់លាស់ ខណៈគ្រឹះស្ថានបណ្ដុះ បណ្ដាលជំនាញបច្ចេកទេសវិជ្ជាជីវៈទាំងបី កំពុងបើកទទួលសិស្សជាយុវជនឱ្យចុះឈ្មោះចូលរៀនជារៀងរាល់ថ្ងៃ៕ ( អត្ថបទ-រូបភាព៖ អ៊ុក សំអាន បប.)
![](https://asset.ams.com.kh/central/media/2024/05/6-16-1024x578.jpg)