ភ្នំពេញ៖ នៅខែសីហា ខាងមុខនេះ ក្រុមហ៊ុនអាកាសចរណ៍ខ្មែរ អ៊ែរ អេស៊ា ខេមបូឌា( Air Asia Cambodia )នឹងបើកដំណើរការហោះហើរពីរាជធានីភ្នំពេញទៅកាន់ ប្រទេសថៃ ម៉ាឡេស៊ី និងប្រទេសសិង្ហបុរី។ ជាការបើកឆាកឆ្ពោះទៅរកទីផ្សារអន្តរជាតិដំបូងបង្អស់ ដែលក្រុមហ៊ុនសន្យាថានឹងលក់សំបុត្រក្នុងតម្លៃទាបសមរម្យ។

តាមរយៈឯកឧត្តម ស៊ីន ចាន់សិរីវុត្ថា អ្នកនាំពាក្យអាកាសចរណ៍ស៊ីវិលកម្ពុជា លោក ណម វិស្សុត ប្រធាននាយកប្រតិបត្តិក្រុមហ៊ុន Air Asia Cambodia បានឲ្យដឹងថា ក្រុមហ៊ុននឹងកាត់ចំណាយដែលមិនចាំបាច់ ហើយប្រើបុគ្គលិកដែលមានប្រសិទ្ធភាពការងារខ្ពស់ ពោលគឺមនុស្សម្នាក់អាចធ្វើការបានច្រើនមុខ ដែលយុទ្ធសាស្ត្រនេះជាផ្នែកមួយជួយបន្ទាបតម្លៃសំបុត្រហោះហើរទៅបរទេសឲ្យមានតម្លៃធូរថ្លៃ។ ក៏ប៉ុន្តែ នាយកប្រតិបត្តិរូបនេះ មិនទាន់បញ្ជាក់នៅឡើយពីតម្លៃជាក់លាក់។

ឯកឧត្តម ស៊ីន ចាន់សិរីវុត្ថា បានប្រាប់ទូរទស្សន៍អប្សរាបន្ថែមថា បន្ទាប់ពីហោះទៅប្រទេសថៃ ម៉ាឡេស៊ី និងសិង្ហបុរី គោលដៅអន្តរជាតិបន្ទាប់គឺ វៀតណាម ចិន និងឥណ្ឌា។ លោកលើកឡើងថា ការបើកជើងហោះហើរទៅក្រៅប្រទេសនឹងបង្កើនសមត្ថភាពប្រកួតប្រជែងរបស់អាកាសចរណ៍ខ្មែរ ជាមួយក្រុមហ៊ុនអាកាសចរណ៍បរទេស។
លោក ធួន ស៊ីណាន ប្រធាន សមាគម ទេសចរណ៍ អាស៊ី ប៉ា ស៊ី ហ្វិ ក លើកឡើងថា ការបើកជើងហោះហើរទៅមកដែលមានតម្លៃសមរម្យ មិនត្រឹមតែផ្តល់ជម្រើសសន្សំសំចៃដល់ប្រជាជនក្នុងស្រុកប៉ុណ្ណោះទេ តែ នឹងជួយទាក់ទាញទេសចរអន្តរជាតិឱ្យចូលមកប្រទេសកម្ពុជាកាន់តែច្រើនផងដែរ។

Air Asia Cambodia បានចាប់ផ្តើមជើងហោះហើរនៅក្នុងស្រុកដំបូង កាលពីថ្ងៃទី២ ឧសភា ដោយហោះទៅមករវាងរាជធានីភ្នំពេញ និងខេត្តសៀមរាប និងរវាងខេត្តសៀមរាប និងព្រះសីហនុ។ តម្លៃសំបុត្រនៅពេលនេះ គឺក្រោម៣០ដុល្លារក្នុងមួយកៅអីដែលជាតម្លៃរួមទាំងពន្ធ។ ក្នុងរយៈពេល ៥ឆ្នាំខាងមុខ លោក ណម វិស្សុត នាយកប្រតិបត្តិ Air Asia Cambodia គ្រោងទិញបន្ថែមយន្តហោះចំនួន ១៦គ្រឿងទៀត ដើម្បីពង្រីកការហោះហើរទៅច្រើនប្រទេសផ្សេងទៀតក្រៅតំបន់អាស៊ាន រួមទាំង កូរ៉េខាងត្បូងផង។

សូមបញ្ជាក់ថា បច្ចុប្បន្នកម្ពុជា មានក្រុមហ៊ុនអាកាសចរណ៍ខ្មែរចំនួន៥ ដែលបានចុះបញ្ជីប្រតិបត្តិការធ្វើអាជីវកម្មហោះហើរ។ ក្រុមហ៊ុនទាំងនោះមាន ខេមបូឌាអង្គរ អ៊ែរ, ខេមបូឌា អ៊ែរ វេ, ស្កាយអង្គរអ៊ែរ ឡានម៉ី អ៊ែរ ឡាញ និង Air Asia Cambodia។ នេះបើយោងតាម ឯកឧត្តម ស៊ីន ចាន់សិរីវុត្ថា៕
ដោយៈទួន សុផល