បុរសអាយុ៤៤ឆ្នាំម្នាក់ ត្រូវបានពស់ស្រកាចាស់ ចឹក បណ្តាលឱ្យស្លាប់ក្នុងហេតុការណ៍មួយ ដែលគិតថាពស់នោះជាពស់ថ្លាន់។ ករណីស្លាប់ដោយសារពស់ស្រកាចាស់ចឹកស្លាប់បុរស ឈ្មោះ សឿ សឿន បានកើតឡើងនៅម៉ោង១២កន្លះរសៀល ថ្ងៃទី១៤ ខែឧសភា ឆ្នាំ២០២៤ រស់នៅភូមិគោកចាន់ ឃុំល្វាក្រាំង ស្រុកវ៉ារិន ខេត្តសៀមរាប។

យោងតាមសមត្ថកិច្ច បុរសឈ្មោះ សឿ សឿន នោះ ពេលបានឃើញពស់ស្រកាចាស់ ដែលមានភិនភាគដូចពស់ថ្លាន់ ដែលបានវារចូលរន្ធ ក៏បបួលប្អូនបង្កើតនឹងក្មួយប្រុសទៅចាប់ ដែលស្ថិតនៅចម្ងាយពីផ្ទះប្រវែង ៤០០ម៉ែត្រ។

បុរសឈ្មោះ សឿ សឿន នោះ ត្រូវគេនិយាយថា គាត់លូកដៃចូលរន្ធ ដើម្បីចាប់ពស់ ដោយគិតស្មានថាពស់ថ្លាន់ ប៉ុន្តែសត្វពស់នោះបានចឹកដៃឆ្វេង ចំម្រាមកណ្តាល ក្រោយទាញយកពស់នោះចេញពីរន្ធ និងក្រោយមកទើបបានដឹងថាជាពស់ស្រកាចាស់។

សាច់ញាតិបានប្រញាប់ដឹកបុរសឈ្មោះ សឿ សឿន មកផ្ទះ និងបានដឹកបន្តទៅមណ្ឌលសុខភាពល្វាក្រាំង ប៉ុន្តែគាត់បានស្លាប់នៅតាមផ្លូវតែម្ដង។