អ្នកនៅរស់គោរពវិញ្ញាណក្ខន្ធនៅស្តូបតម្កល់អដ្ឋិធាតុជនរងគ្រោះក្នុងទិវាជាតិនៃការចងចាំ នៅវត្តអំពែភ្នំ
កំពង់ស្ពឺ៖ក្នុងឱកាសទិវាជាតិនៃការចងចាំ ២០ ឧសភា លោក សរ សុពុត្រា អភិបាលរងខេត្ត និងជាប្រធានសហភាពសហព័ន្ធយុវជនខេត្តកំពង់ស្ពឺ រួមមាន ព្រះសង្ឃ មន្រ្តីរាជការ កងកម្លាំងប្រដាប់អាវុធ ប្រជាពលរដ្ឋ សិស្សានុសិស្ស ឧទ្ទិសកុសលនិងគោរពវិញ្ញាណក្ខន្ធជននៅស្តូបតម្កល់អដ្ឋិធាតុជនរងគ្រោះក្នុងរបបប្រល័យពូជសាសន៍ ប៉ុល ពត នៅវត្តអំពែភ្នំ ក្រុងច្បារមន ខេត្តកំពង់ស្ពឺ។
ក្នុងឱកាសនេះ លោក សរ សុពុត្រា បានរំលឹកថា ទិវាជាតិនៃការចងចាំ ២០ឧសភា គឺជាព្រឹត្តិការណ៍ប្រវត្តិសាស្ត្រ ដែលប្រជាជនកម្ពុជាគ្រប់រូប នៅតែ ចងចាំដោយមិនអាចបំភ្លេចបាននូវសម័យកាលដ៏ខ្មៅងងឹត ដ៏សែនកាចសាហាវ និងឃោរឃៅ ដែលបាន កើតឡើងលើទឹកដីកម្ពុជា ក្នុងរយៈពេល ៣ឆ្នាំ៨ខែ២០ថ្ងៃ ក្រោមរបបកម្ពុជាប្រជាធិបតេយ្យ ប្រល័យពូជសាសន៍។ ការប្រារព្ធពិធីគោរពវិញ្ញាណក្ខន្ធ និងពិធីបង្សុកូល នាវេលានេះ គឺដើម្បីរំលឹកដល់ ឧបការៈគុណរបស់បញ្ញវន្ត យុទ្ធជន យុទ្ធនារី អ្នកស្នេហាជាតិ និងប្រជាជនស្លូតត្រង់ ដែលបានបាត់បង់ ជីវិតក្រោមការធ្វើទារុណកម្មយ៉ាងព្រៃផ្សៃបំផុត ។
លោកបន្តថា ក្រោមការដឹកនាំដ៏ត្រឹមត្រូវ និងប្រកបដោយគតិបណ្ឌិត របស់សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានធ្វើឱ្យសង្គមជាតិ មានសុខសន្តិភាពពេញលេញ មានស្ថិរភាពនយោបាយ មានការបង្រួបបង្រួមផ្សះផ្សាជាតិ និងមានការអភិវឌ្ឍលើ គ្រប់វិស័យ។សម្ដេចតេជោបានធ្វើឱ្យប្រទេសជាតិ ស្មើមុខ ស្មើសិទ្ធិជាមួយបណ្តាប្រទេសទាំងក្នុងតំបន់ និងលើសកលលោក។
លោកបន្តថា បច្ចុប្បន្នក្រោមការដឹកនាំប្រកបដោយភាពវាងវៃ ច្បាស់លាស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ប្រទេសជាតិ រឹតមានឧត្តមភាព វឌ្ឍនភាពឆ្ពោះទៅមុខបន្ថែមទៀត។លោកបានអំពាវនាវដល់ប្រជាពលរដ្ឋឱ្យចូលរួមថែរក្សាការពារសន្តិភាពដែលរកបានដោយលំបាក ដើម្បីកម្ពុជាកាន់តែទទួលបាននូវការអភិវឌ្ឍរីកចម្រើនថែមទៀតឈានឆ្ពោះទៅសម្រេចបានចក្ខុវិស័យកម្ពុជា ជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងប្រទេសចំណូលខ្ពស់នៅឆ្នាំ២០៥០៕
អត្ថបទនិងរូបភាព៖ម៉ុន សំអាត