ភរិយាអភិបាលខេត្តពោធិ៍សាត់ អញ្ជើញចូលរួមពិធីបុណ្យវិសាខបូជានៅវត្តកែវវិជ័យ
ពោធិ៍សាត់៖កាលពីថ្ងៃពុធ១៥កើតខែពិសាខត្រូវនឹងថ្ងៃទី២២ ខែឧសភា ឆ្នាំ២០២៤ដែលជាថ្ងៃប្រារព្ធពិធីបុណ្យវិសាខបូជា លោកជំទាវ អាំង សុជាតា ខូយ រីដា ប្រធានកិត្តិយសសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្តពោធិ៍សាត់ ជាភរិយាឯកឧត្តមអភិបាលខេត្តពោធិសាត់និងសហការី បានអញ្ជើញចូលរួមពិធីបុណ្យវិសាខបូជា ដែលប្រារព្ធធ្វើនៅវត្តកែវវិជ័យ ស្រុកកណ្ដៀង ខេត្តពោធិ៍សាត់។
នៅថ្ងៃបុណ្យវិសាខបូជានេះដែររដ្ឋបាលខេត្តពោធិ៍សាត់បានរៀបចំក្បួនដ៏ធំមួយក្នុងទីរួមខេត្តដោយមានការនិមន្ត ការចូលរួមពីលោកតា លោកយាយ ពុទ្ធសាសនិក យុវជន យុវនារី យ៉ាងច្រើនកុះករក្បួនដង្ហែចែកចេញជាផែនទី១.ផែនព្រះអង្គប្រសូត្រ(ឧទ្យានលុម្ពិនី)ដែលមានព្រះមេគណខេត្តនិងថ្នាក់ដឹកនាំ, ទី២.ជាផែនត្រាស់ដឹង(ពុទ្ធគយា) ដែលអមដង្ហែដោយមន្ទីរ អង្គភាពចម្រុះ និងទី៣ ជាផែនព្រះអង្គបរិនិព្វាន(នគរកុសិនារា) ហែហមពីក្រោយដោយសិស្ស និស្សិត និងយុវជនជាដើម។ ក្បួនដង្ហែមានរថយន្ដហង្ស រថយន្ដមន្ត្រីរាជការ ម៉ូតូកង់បី គោយន្ដ និងម៉ូតូជាច្រើនគ្រឿងទៀត ដោយធ្វើដំណើរចេញវត្តកែវវិជ័យតាមមាត់ស្ទឹង ឆ្ពោះទៅកាន់បុរីវប្បធម៌កោះសំពៅមាស ដង្ហែជុំវិញទីប្រជុំជនខេត្ត រួចហើយទើបត្រឡប់មកកាន់វត្តកែវវិជ័យវិញ ។
សូមជម្រាបថា បុណ្យវិសាខបូជាប្រារព្ធធ្វើឡើង ដើម្បីរំលឹកនឹកដល់អភិលក្ខិតសម័យទាំងបីគឺ៖ ១.ព្រះសម្មាសម្ពុទ្ធបរមគ្រូ ទ្រង់ប្រសូត្រចាកចេញពីព្រះឧទ្ទរព្រះមាតា ។ ២.ព្រះសម្មាសម្ពុទ្ធបរមគ្រូ ទ្រង់បានត្រាស់ដឹងនូវអនុត្តរសម្មាសម្ពោធិញ្ញាណ និង៣.ព្រះសម្មាសម្ពុទ្ធបរមគ្រូ ទ្រង់រម្លត់ក្ខន្ធចូលកាន់ព្រះបរិនិព្វាន៕
ដោយ៖ចេង ពុំ
