អភិបាលស្រុកស្ទោងជំរុញឱ្យពន្លឿនកិច្ចការឯកសារអត្រានុកូលដ្ឋានជូនប្រជាពលរដ្ឋ
កំពង់ធំ៖លោក សាយ គឹមឡម អភិបាលស្រុកស្ទោង ខេត្តកំពង់ធំនិងលោកស្រី ចាន់ សុផល ប្រធានអង្គការទស្សនៈពិភពលោកប្រចាំតំបន់ស្ទោង២ កាលពីរសៀលថ្ងៃទី២៧ ខែឧសភា ឆ្នាំ២០២៤បានអញ្ជើញជួបសំណេះសំណាលសួរសុខទុក្ខ និង ចែកអំណោយជូនដល់គ្រួសារក្រីក្រនិងងាយរងហានិភ័យ ដែលបានរងគ្រោះដោយសារបម្រែបម្រួលអាកាសធាតុនិងភាពរាំងស្ងួតកាលពីពេលថ្មីៗនៅឃុំចំណាក្រោម។
ក្នុងឱកាសនេះលោក សាយ គឹមឡម បានណែនាំដល់អាជ្ញាធរភូមិ ឃុំ ប៉ុស្តិ៍នគរបាលរដ្ឋបាលបន្តយកចិត្តទុកដាក់ក្នុងការផ្ដល់សេវា ស្វែងយល់ពីសុខទុក្ខនិងតម្រូវការព្រមទាំងឆ្លើយតបឲ្យបានទាន់ពេលវេលានិងមានប្រសិទ្ធភាព។ពិសេសសហការគ្នាក្នុងការផ្ដល់ ឯកសារអត្រានុកូលដ្ឋាន ឯកសារបញ្ជាក់អត្តសញ្ញាណសញ្ជាតិខ្មែរ ឬសៀវភៅគ្រួសារ សៀវភៅស្នាក់នៅដល់ប្រជាពលរដ្ឋឱ្យបានឆាប់រហ័ស និងទាន់ពេលវេលា ជាពិសេសដើម្បីយកមកធ្វើបណ្ណសមធម៌ និងបណ្ណក្រីក្រ។
លោកក៏បានផ្តល់អំណោយដល់ប្រជាពលរដ្ឋទាំង៥០គ្រួសារ។អំណោយជំនួយរបស់ប្រទេសម៉ាឡេស៊ី តាមរយៈអង្គការទស្សនៈពិភពលោកកម្ពុជាប្រចាំស្រុកស្ទោងមាន អង្ករ ទឹកស៊ីអ៊ីវ ទឹកត្រី មី និងទឹកសុទ្ធ៕
ដោយ៖ ប៊ុន រដ្ឋា
