រូបព្រះពុទ្ធបដិមា ដែលខ្ពស់ជាងគេនៅតំបន់អាស៊ី នឹងក្លាយជាតំបន់ទេសចរវប្បធម៌ ដ៏សំខាន់មួយកន្លែងនៅលើឧទ្យាជាតិព្រះមុនីវង្សបូកគោ
ខេត្តកំពត៖ នៅថ្ងៃខាងមុខនេះយើងនឹងយកគោលដៅទេសចរណ៍វប្បធម៌ជាសំខាន់ សម្រាប់ទាក់ទាញភ្ញៀវទេសចរ ពិសេសរូបព្រះពុទ្ធបដិមាដែលមានកម្ពស់ ខ្ពស់ជាងគេនៅ តំបន់អាស៊ី និងតំបន់តាំងសមាធិមួយចំនួនទៀតស្ថិតនៅលើ ឧទ្យាជាតិព្រះមុនីវង្សបូកគោ។នេះបើតាមការលើកឡើងពីសំណាក់ អ្នកឧញ៉ាបណ្ឌិត សុខ គង់ ប្រធានក្រុមហ៊ុនសុខា អូតែល។
ការលើកឡើងពីសំណាក់អ្នកឧញ៉ាបណ្ឌិត សុខ គង់នេះធ្វើឡើងក្នុងពិធីជួបសំណេះសំណាលជាមួយអ្នកសារព័ត៌មានក្នុងពេលក្លិបអ្នកកាសែតកម្ពុជាដឹកនាំមកបំពេញទស្សនកិច្ច”ដើម្បីផ្សព្វផ្សាយទ្រង់ទ្រាយធំពីសក្តានុពលនៃការអភិវឌ្ឍន៍ក្រុងបូកគោ”។
ក្រុមហ៊ុន សុខាអូតែល បានកំពុងសាងសង់ព្រះពុទ្ធបដិមាទ្រង់ព្រះភ្នែនដ៏ធំបំផុតនៅកម្ពុជា និងខ្ពស់បំផុតក្នុងចំណោមព្រះពុទ្ធបដិមានៅទូទាំងអាស៊ីអាគ្នេយ៍ នៅលើខ្នងភ្នំបូកគោ ដែលរហូតមកទល់នឹងពេលនេះ សម្រេចការសាងសង់បានប្រហែល ៣០ភាគរយហើយ។ ការសាងសង់រូបបដិមានេះបន្ទាប់ពីបានទទួលការអនុញ្ញាតពីរាជរដ្ឋាភិបាលកម្ពុជា ក្នុងការសាងសង់ព្រះពុទ្ធប្បដិមាដែលមានកម្ពស់រហូតដល់ ១០៨ម៉ែត្រ។
ទាក់ទិនក្នុងរឿងនេះដែរ លោក ប្រិញ សាវុធ ប្រធានផ្នែកទំនាក់ទំនងនៃក្រុមហ៊ុនសុខាអូតែល បានលើកឡើងថា ក្រុមហ៊ុន បានផ្តល់ឱកាសសម្រាប់សប្បុរសជន ដែលមានសទ្ធាជ្រះថ្លា ចង់ភ្ជាប់និស្ស័យក្នុងការកសាងព្រះពុទ្ធប្បដិមាសម្រាប់អង្គធំ អាចចូលរួមជាបច្ច័យតាមសទ្ធារៀងៗខ្លួន ឬអាចជាវព្រះពុទ្ធរូបអង្គតូចៗ ដើម្បីដាក់តម្កល់នៅតាមជញ្ជាំងខាងក្នុងខឿន ដែលអាចចារឹកឈ្មោះសប្បុរសជនផ្ទាល់ ឬឈ្មោះអ្នកមានគុណនៅខាងមុខបល្ល័ង្ក។
លោក បានបញ្ជាក់ប្រាប់ដែរថា រហូតមកទល់នឹងពេលនេះ មានសប្បុរសជន បានជាវព្រះពុទ្ធរូបតូចៗ សម្រាប់ដាក់តម្កល់លើជញ្ជាំងនៅក្នុងខឿន ប្រមាណជាង ១០០០អង្គហើយ ។
លោកថា កន្លែងសមាធិកន្លែងព្រះគម្រោងសាងសង់រូបព្រះពុទ្ធបដិមាស្ថិតនៅលើខ្នងភ្នំបូកគោដែលជាតំបន់ប្រវត្តិសាស្ត្ររបស់កម្ពុជាមានអាយុកាលជាងច្រើនពាន់ឆ្នាំមកនេះក៏មានតំបន់ទេសចរណ៍ជាច្រើនដែលធ្វើឱ្យអ្នកទេសចរណ៍មិនជិនណាយក្នុងទស្សនានៅលើភ្នំបូកគោ។តំបន់ភ្នំបូកគោនេះដែរក៏ជាកន្លែងនៃការទស្សនចម្រុះនៃសាសនាមកស្សនាផងដែរនាពេលខាងមុខ។
គួរបញ្ជាក់ថាព្រះពុទ្ធបដិមាកម្ពស់ ១០៨ ម៉ែត្រនេះ ត្រូវបានចាប់ផ្តើមបញ្ចុះបឋមសិលាសាងសង់ កាលពីខែមករា ឆ្នាំ ២០២៣ និងចំណាយពេលរយៈពេល ៤ឆ្នាំ នៅលើផ្ទៃប្រមាណជាង ៩០ហិកតា ស្ថិតនៅលើខ្នងភ្នំបូកគោ ក្នុងភូមិសាស្ត្រវាលស្រែ ៥០០ នៃឧទ្យានជាតិព្រះមុនីវង្ស «បូកគោ» បែរព្រះភក្ត្រទៅទិសខាងកើត។ ចំពោះខឿនផ្ទាល់ដីមានបណ្តោយ ២៤៨ម៉ែត្រ ទទឹង ១៨៦ម៉ែត្រ មានជណ្តើរធំចំនួន ៤ អមដោយបង្កាន់ដៃនាគ ដែលតំណាងឱ្យទិសធំៗទាំង ៤ យកតាមលំនាំរចនាប័ទ្មអង្គរវត្ដ ក្នុងរជ្ជកាលព្រះបាទសូរ្យវរ្ម័នទី២ សតវត្សរ៍ទី១២។
សូមជម្រាបថាគោលបំណងនៃការសាងសង់ ព្រះពុទ្ធបដិមាដ៏ធំនៅលើភ្នំបូកគោនេះ គឺដើម្បីជាទីសក្ការៈបូជា សម្រាប់ប្រជាពលរដ្ឋខ្មែរក៏ដូចជាឧទ្ទិសនូវសេចក្តីសុខសេចក្តីចម្រើនរុងរឿង និងសុខសន្តិភាពជានិច្ចនិរន្តរ៍ដល់ប្រជាពលរដ្ឋទាំងអស់៕
ដោយ ៖ ម៉ាដេប៉ូ
រូបភាព ៖ ជីម ភារ៉ា
![](https://asset.ams.com.kh/central/media/2024/05/photo_2024-05-30_09-24-21-1024x768.jpg)
![](https://asset.ams.com.kh/central/media/2024/05/photo_2024-05-30_09-24-19-1024x768.jpg)
![](https://asset.ams.com.kh/central/media/2024/05/photo_2024-05-30_09-24-17-768x1024.jpg)
![](https://asset.ams.com.kh/central/media/2024/05/photo_2024-05-30_09-24-15-1024x768.jpg)
![](https://asset.ams.com.kh/central/media/2024/05/photo_2024-05-30_09-24-13-1024x768.jpg)
![](https://asset.ams.com.kh/central/media/2024/05/photo_2024-05-30_09-24-11-1024x768.jpg)
![](https://asset.ams.com.kh/central/media/2024/05/photo_2024-05-30_09-24-09-1024x682.jpg)
![](https://asset.ams.com.kh/central/media/2024/05/photo_2024-05-30_09-24-08-1024x682.jpg)