សម្ដេចធិបតី៖យុវវ័យទាំងអស់ត្រូវក្លាហានចូលរួមសកម្មភាពសង្គម
កំពង់ស្ពឺ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាបាន ផ្ដាំយុវវ័យទាំងអស់ត្រូវក្លាហានចូលរួមសកម្មភាពសង្គ ដើម្បីជាចំណែកក្នុងការអភិវឌ្ឍជាតិឱ្យកាន់តែប្រសើរ។ពោលសូមកុំប្រកួតប្រជែងរឿងកាប់ ហើយកុំក្លាហានជាមួយអំពើខុសច្បាប់ ។
សម្ដេចធិបតីបន្តថា ក្មួយៗយុវជនត្រូវប្រកួតប្រជែងគ្នារឿងការងារសង្គម កុំប្រកួតប្រជែងគ្នារឿងកាប់ដាវ ។សម្ដេចបន្ថែមថាម្សិលមិញសម្ដេចបញ្ជាឱ្យចៅហ្វាយខេត្តតាកែវ រកឱ្យឃើញក្រុមកាប់ដាវ នៅត្រាំកក់ឥលូវរកបាន២-៣នាក់ហើយ តាមរកឱ្យឃើញ ។
![](https://asset.ams.com.kh/central/media/2024/05/photo_2024-05-30_15-24-15-1024x682.jpg)
សម្ដេចធិបតី បានបន្តថា កន្លែងមួយចំនួនលួចលក់ដាវសាម៉ូរ៉ៃ ដែលជាសម្ភារៈក្មេងទំនើងប្រើប្រាស់ ដើម្បីធ្វើសកម្មភាព ខណៈការលក់នូវសម្ភារៈនេះ មិនមានតម្រូវការចាំបាច់ឡើយ ខុសពីសម្ភារៈមួយចំនួន ដែលបម្រើឱ្យការងារកសិកម្ម។ សម្ដេចថា ជាការពិត អាវុធមិនអាចសម្លាប់មនុស្សបានទេ ។មនុស្សទេ ដែលប្រើប្រាស់អាវុធខុសទិសដៅ ។
សម្ដេចធិបតី ក៏បានណែនាំឱ្យខិតខំប្រឹងប្រែងបណ្ដុះឆន្ទៈ និងការអប់រំ ដល់យុវជន យុវតី ដែលជាវ័យមួយកំពុងចង់ឃើញ ,ចង់សាកនូវអ្វីដែលប្លែកៗ ដូច្នេះមិនអាចបណ្ដែតបណ្ដោយ បានឡើយ ត្រូវតែតម្រង់ទិស ដើម្បីរក្សានូវធនធានមនុស្ស និងរក្សាសន្ដិសុខសណ្ដាប់ធ្នាប់ សម្រាប់ប្រជាពលរដ្ឋគ្រប់រូប ។
![](https://asset.ams.com.kh/central/media/2024/05/photo_2024-05-30_15-24-16-2-1024x682.jpg)
សម្ដេចធិបតី ក៏បានអំពាវនាវដល់ស្ថាប័នអយ្យការ និងស្ថាប័នតុលាការ មានវិធានការលើការអនុវត្តច្បាប់ ឱ្យបានម៉ឺងម៉ាត់ ក្នុងការចាត់តាំងលើសំណុំរឿង ពាក់ព័ន្ធករណីក្មេងទំនើងនេះ ប្រកបដោយការយកចិត្តទុកដាក់ និងការទទួលខុសត្រូវខ្ពស់ ដើម្បីលើកកម្ពស់ប្រសិទ្ធភាព នៃការអនុវត្តច្បាប់ ។
គួររំលឹកថា កាលពីសប្ដាហ៍កន្លងទៅនេះ សម្តេចធិបតី ហ៊ុន ម៉ាណែត ទើបតែបានណែនាំដល់អភិបាលរាជធានី-ខេត្តទាំងអស់ រួមជាមួយនឹងសមត្ថកិច្ចពាក់ព័ន្ធ ត្រូវរឹតបន្តឹង និងចាត់វិធានការឲ្យបានម៉ឺងម៉ាត់បំផុតចំពោះក្រុមក្មេងទំនើង ទាំងវិធានការរដ្ឋបាលនិងវិធានការច្បាប់ ក្នុងការបង្ការទប់ស្កាត់ ដោយគ្មានការបន្ធូរបន្ថយ និងគ្មានការលើកលែងនោះឡើយ ដើម្បីការពារសណ្តាប់ធ្នាប់សាធារណៈ និងសន្តិសុខសង្គម ។
![](https://asset.ams.com.kh/central/media/2024/05/photo_2024-05-30_15-24-16-1024x682.jpg)
សូមជម្រាបថា សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានថ្លែងដូច្នេះ ក្នុងឱកាសអញ្ជើញជាអធិបតីក្នុងពិធីសម្ពោធឆ្លងព្រះធម្មចេតិយទី១ តម្កល់ព្រះត្រៃបិដកឆ្លាក់លើថ្មម៉ាបចំនួន ១ ១៧០ ផ្ទាំង, ផ្លូវបេតុង ៩ ខ្សែ , បូជនីយដ្ឋានសមថៈ និង វិបស្សនា ព្រមទាំងសមិទ្ធផលនានា នៅក្នុងមជ្ឈមណ្ឌលវប្បធម៌ព្រះពុទ្ធសាសនាកម្ពុជា នៅលើឧទ្យានជាតិព្រះសុរាម្រិតកុសុមៈគិរីរម្យ ក្នុងខេត្តកំពង់ស្ពឺ នាព្រឹកថ្ងៃទី៣០ ខែឧសភា ឆ្នាំ២០២៤ ៕
![](https://asset.ams.com.kh/central/media/2024/05/photo_2024-05-30_15-24-19-2-1024x682.jpg)
![](https://asset.ams.com.kh/central/media/2024/05/photo_2024-05-30_15-24-19-1024x682.jpg)
![](https://asset.ams.com.kh/central/media/2024/05/photo_2024-05-30_15-24-20-1024x682.jpg)
![](https://asset.ams.com.kh/central/media/2024/05/photo_2024-05-30_15-24-17-2-1024x682.jpg)
![](https://asset.ams.com.kh/central/media/2024/05/photo_2024-05-30_15-24-17-1024x682.jpg)
អត្ថបទ៖វណ្ណលុក
រូបភាព៖វេង លឹមហួត ,សួង ពិសិដ្ឋ