(ភ្នំពេញ)៖ គណៈប្រតិភូព្រះសង្ឃអន្តរជាតិ មកពី១២ប្រទេស និមន្តនិងអញ្ជើញ ដល់ប្រទេសកម្ពុជាហើយ ដើម្បីចូលរួមក្នុងពិធីបុណ្យថ្វាយព្រះភ្លើង សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា នៅថ្ងៃចន្ទទី៣ ខែមិថុនា ឆ្នាំ២០២៤ស្អែកនេះ។

ប្រតិភូព្រះសង្ឃអន្តរជាតិ មកពី១២ប្រទេស ដើម្បីនិមន្តចូលរួមព្រះរាជពិធីបុណ្យទក្ខិណានុប្បទាន ថ្វាយព្រះភ្លើងព្រះបរមសព អភិសេកព្រះបរមអដ្ឋិ និងឆាកមហាបង្សុកូល ខួបគម្រប់១០០ថ្ងៃ សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា មានដូចជា៖

១. គណៈប្រតិភូព្រះសង្ឃខ្មែរសហរដ្ឋអាមេរិកមាន ៦ រូប ។

២. គណៈប្រតិភូប្រទេសឥណ្ឌូណេស៊ីមានចំនួន២រូប ។

៣. គណៈប្រតិភូប្រទេសមីយ៉ាន់ម៉ាមានចំនួន ៤ រូប ។

៤.គណៈប្រតិភូប្រទេសម៉ុងហ្គោលមានចំនួន ២ រូប ។

៥. គណៈប្រតិភូប្រទេសវៀតណាមមានចំនួន ៣ រូប ។

៦. គណៈប្រតិភូប្រទេសស្រីលង្កាមានចំនួន ៣ រូប ។

៧. គណៈប្រតិភូប្រទេសឥណ្ឌាមានចំនួន ១រូប ។

៨. គណៈប្រតិភូប្រទេសឡាវមានចំនួន ៥ រូប ។

៩. គណៈប្រតិភូប្រទេសជប៉ុនមានចំនួន ២៧ រូប ។

១០. គណៈប្រតិភូប្រទេសចិនមានចំនួន ៩ រូប ។

១១. គណៈប្រតិភូប្រទេសកូរ៉េមានចំនួន ៤រូប ។

១២.គណៈប្រតិភូប្រទេសសឹង្ហបុរីមានចំនួន២រូប ។

សូមជម្រាបជូនថា ព្រះរាជពិធីដង្ហែ និងថ្វាយព្រះភ្លើងព្រះបរមសព សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រ កម្ពុជា ដែលនឹងប្រព្រឹត្តទៅនៅថ្ងៃទី០៣ ខែមិថុនា ឆ្នាំ២០២៤ ចាប់ពីម៉ោង ០៦:០០នាទីព្រឹក ដែល ព្រះរាជពិធីដង្ហែនឹងហែចេញពីវត្តឧណ្ណាលោម ស្ថិតក្នុងសង្កាត់ជ័យជំនះ ខណ្ឌដូនពេញ រហូតដល់ទីតាំងព្រះមេរុ និងការថ្វាយព្រះភ្លើង (នៅខាងមុខវត្តបទុមវតី) សង្កាត់ចតុមុខ ខណ្ឌដូនពេញ រាជធានីភ្នំពេញ ៕

ដោយ ៖ ហេង សម្បត្តិ