ស្ពានព្រៃក្រាំង ឃុំជ្រៃបាក់លេចចេញជារូបរាង ខណៈត្រូវការថវិកាបន្ថែមដើម្បីបញ្ចប់
កំពង់ឆ្នាំង៖ការសាងសង់ស្ពានព្រៃក្រាំង ក្នុងភូមិបាញ់ឆ្គោល ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំងគិតត្រឹមថ្ងៃទី២ ខែមិថុនា ឆ្នាំ២០២៤សម្រេចកសាងបានប្រមាណ៧០ភាគរយ។ជាស្ពានដែលសាងសង់ឡើងដោយការជួយឧបត្ថម្ភពីក្រុមការងារគ្រប់ថ្នាក់,អាជ្ញាធរមូលដ្ឋាននិងសប្បុរសជនជិតឆ្ងាយ។ខណៈនេះអាជ្ញាធរមូលដ្ឋានអំពាវនាវដល់ស្បុរជនសូមមេត្តាជួយជាថវិកាបន្តទៀត។
លោក តាំង ប៊ុនទត មេឃុំជ្រៃបាក់ បានប្រាប់ថា ស្ពានព្រៃក្រាំងគិតត្រឹមថ្ងៃទី២ ខែមិថុនាបានឈានដល់ការចាក់ធ្នឹមស្ពាន ។លោកមេឃុំបញ្ជាក់ដូច្នេះក្នុងឱកាសទទួលថវិកាឧបត្ថម្ភបន្ថែមរបស់ឯកឧត្តម សឹង សំណាង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការទ័ពអាកាស ។
ស្ពានព្រៃក្រាំងនេះមានសារៈសំខាន់សម្រាប់ប្រជាពលរដ្ឋក្នុងឃុំជ្រៃបាក់ ឃុំរលាប្អៀរ ស្រុករលាប្អៀរឬប្រជាពលរដ្ឋមកពីទី កន្លែងដទៃតែងតែធ្វើដំណើរក៏ដូចជាដឹកកសិផលផ្សេងៗ។តែជាអកុសលដោយសារស្ពានចាស់ដែលមានសភាពទ្រុឌទ្រោម
ផង បានត្រូវទឹកជំនន់កាលពីរដូវវស្សាកន្លងទៅហូរបុកបណ្ដាលឱ្យបាក់ដាច់។ អវត្តមានស្ពានព្រៃក្រាំងក៏ដូចជាការផ្តាច់ផ្លូវធ្វើ
ដំណើរ,ផ្លូវដឹកជញ្ជូនដូច្នោះដែរ។
ក្រោយពេលដាច់ស្ពាន លោក សំ សំណាង មេភូមិបាញ់ឆ្គោល ក៏ដូចជាប្រជាពលរដ្ឋក្នុងមូលដ្ឋានបានមូលមតិគ្នាប្រមូល ថវិកាតាមរយៈធ្វើបុណ្យផ្កាសាមគ្គី និងសប្បុរសជននានាជួយផងបានកសាងស្ពាននេះឡើងវិញជាបន្តបន្ទាប់។ម្តងមួយ ដំណាក់កាលៗ រហូតមកដល់ពេលនេះឈានដល់ការចាក់ធ្នឹម។ការងារនៅសល់ គឺនៅចាក់ប្លង់សេស្ពានមួយសន្លឹក និងបង្កាន់ដៃស្ពានតែប៉ុណ្ណោះ ។ដោយឡែកផ្លូវធ្វើដំណើរចេញពីភូមិបាញ់ឆ្គោល មកកាន់គល់ស្ពាន ព្រៃក្រាំងមានប្រវែង ២៦៤ម៉ែត្រ រួមនិងលូប្រអប់មួយផងបានកសាងដោយថវិកាបដិភាគឃុំជ្រៃបាក់ចំនួនជាង ៥០ លានរៀល។
លោកមេភូមិបាញ់ឆ្គោលបានប្រាប់ថា ធ្នឹមដែលកំពុងចាក់ថ្ងៃនេះមានតម្លៃសរុប១៤,៣ លានរៀល ។ក្នុងនោះមានថ្លៃជាង ៧ ,៥លានរៀល,ថ្លៃដែក ៣,២លានរៀលនិងថ្លៃបេតុង២,៨លានរៀល។ ប៉ុន្តែថវិកាដែលប្រមូលសម្រាប់យកមកចាក់ធ្នឹមព្រឹកនេះ មានតែជាង ៥លានរៀលប៉ុណ្ណោះនៅខ្វះប៉ុន្មានជំពាក់ថ្លៃជាងបណ្ដោះអាសន្នសិន នឹងរៃអង្គាសសប្បុរសជនជាបន្តទៀត។
ក្នុងនាមលោកជាអាជ្ញាធរភូមិបាញ់ឆ្គោល ក៏ដូចជាប្រជាពលរដ្ឋទាំងអស់សូមថ្លែងអំណរគុណយ៉ាងជ្រាលជ្រៅដល់សប្បុសជន ដែលបានជួយឧបត្ថម្ភកន្លងមកនិងសូមអំពាវនាវបន្តដល់ប្រជាពលរដ្ឋ,សប្បុរសជននិងក្រុមការងារទាំងអស់សូមមេត្តាចូលរួមចំណែកកសាងស្ពាននេះឱ្យបានរួចរាល់៕
ដោយ៖សុខ គឹមសៀន