កំពង់ធំ៖ ឧត្តមសេនីយ៍ទោ សោម ស៊ុន មេបញ្ជាការ តំបន់ ប្រតិបត្តិការសឹងរងកំពង់ធំ និងមន្រ្តីក្រុមការងារប្រឡង ប្រណាំង​នៃ​បញ្ជាការដ្ឋានតំបន់ប្រតិបត្តិការសឹករងកំពង់ធំ កាលពីថ្ងៃទី៤ ខែមិថុនា បានអញ្ជើញ​ពិនិត្យសកម្មភាព ការងារបង្កបង្កើនផល​ចិញ្ចឹម​សត្វ ដែលបានកំណត់ ក្នុង ចលនាប្រឡងប្រណាំងទាំង ៥ នៅផ្នែកសឹករងស្ទឹងសែន ស្ថិតនៅសង្កាត់អាចារ្យលាក់ ក្រុងស្ទឹងសែន ខេត្តកំពង់ធំ  ។

 លោកវរសេនីយ៍ទោ សៀង ហុកឃាន់ មេបញ្ជាការផ្នែកសឹក រងស្ទឹងសែន នៃបញ្ជាការដ្ឋានតំបន់ប្រតិបត្តិការសឹករង​កំពង់ ធំ បាន​បញ្ជាក់ថាកងកម្លាំងផ្នែកសឹករងស្ទឹងសែន ក្រៅពី ភារកិច្ចស្នូលក្នុងអង្គភាព  ក៏បានចាត់តាំងកម្លាំងចូលរួមក្នុង ការអនុវត្ត គោលនយោបាយភូមិ សង្កាត់ មានសុវត្ថិភាព ហើយថ្មីៗនេះក៏បានចាត់តាំងកម្លាំងមួយចំនួនទៀត  ចូលរួម ក្នុងកិច្ចការពារ ទប់ស្កាត់  និងបង្ក្រាប​បទល្មើស ធនធាន ធម្មជាតិ របស់គណៈបញ្ជាការឯកភាពរដ្ឋបាលខេត្ត កំពង់ធំ ។

ដោយឡែកចំពោះការងារចិញ្ចឹមទ័ព អង្គភាពបានដាំដុះដំណាំ នឹងចិញ្ចឹមសត្វ ដើម្បីលើកស្ទួយជីវភាពរបស់កងទ័ពបង្កើន​បន្ថែម​លើគោលរបបដែលក្រសួងការពារជាតិបានកំណត់។យោធិនមានការហូបចុកជាសមូហភាពបានគ្រប់គ្រាន់។ អង្គភាពមានស្រះ​ចិញ្ចឹមត្រីចំនួនពីរ មានត្រីជាង៣០.០០០ ក្បាល , ចិញ្ចឹមគោចំនួន២៥ក្បាល  និងមាន មាន់ ទា ក្ងានមួយ ចំនួន។ ។  ដោយឡែក​ចំពោះ​យោធិនដែលត្រូវបានក្រសួង ការពារជាតិ ដាក់ឱ្យចូលនិវត្តន៍ ត្រូវបានអង្គភាពប្រគល់មេគោ ពូជជូនមួយក្បាល ដើម្បី​យក​ទៅចិញ្ចឹមសម្រាប់ដោះស្រាយ ជីវភាពក្នងក្រុមគ្រួសារ ។

ក្នុងឱកាសនេះ​ឧត្តមសេនីយ៍ទោ សោម ស៊ុន បានកោត សរសើរចំពោះថ្នាក់ដឹកនាំ នាយទាហាន នាយ ទាហានរង និងពលទាហាន​ទាំងអស់នៅផ្នែកសឹករងស្ទឹងសែន ដែលបានខិតខំបំពេញភារកិច្ច ដែលថ្នាក់លើបានប្រគល់ ជូនទទួលបានជោគជ័យ​គួរជាទីមោទនៈ ។អង្គភាព ផ្នែក សឹករងស្ទឹងសែន ជាអង្គភាពមួយ ដែលមានស្នាដៃល្អក្នុង ការងារចលនាប្រឡង ប្រណាំងទាំង ៥ខ្លឹមសារ ដើម្បី គ្រប់គ្រងកម្លាំង កសាងអង្គភាពរឹងមាំលើគ្រប់វិស័យ និងលើកស្ទួយជីវភាពរស់នៅរបស់កងទ័ព បានយ៉ាង​ល្អប្រសើរ៕
អត្ថបទនិងរូបភាព៖ប៊ុន រដ្ឋា