ពលរដ្ឋចំនួន២៦៣គ្រួសារ នៅស្រុកឱរ៉ាល់ទទួលបានអំពូលសូឡាពីក្រុមហ៊ុនប៉ាណាសូនិច
កំពង់ស្ពឺ៖ក្រុមហ៊ុនប៉ាណាសូនិច(Panasonic)នៃប្រទេសជប៉ុនបានផ្តល់អំណោយជាអំពូលភ្លើងសូឡាដល់ប្រជាពលរដ្ឋ១២ភូមិស្មីនឹង២៦៣គ្រួសារ នៃឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ។ពិធីប្រគល់បានធ្វើឡើងកាលពីថ្ងៃទី៤ ខែមិថុនា ឆ្នាំ២០២៤ នៅបរិវេណវត្តត្រពាំងជោ ឃុំត្រពាំងជោរ ក្រោមវត្តមានលោក ងួន វាសនា អភិបាលស្រុកឱរ៉ាល់។អំពូលភ្លើងទាំងនេះនឹងជួយដល់ការរស់នៅរបស់អ្នកភូមិជនបទចុងកាត់ញកមួយនេះ ខណៈបច្ចុប្បន្នពុំទាន់មានបណ្ដាញអគ្គិសនីទៅដល់នៅឡើយ។
លោកស្រី ថៃ បូណេ នាយិកាប្រតិបត្តិនៃអង្គការជីវិតថ្លៃថ្នូរបាននិយាយក្នុងពិធីនេះថា ដោយមើលឃើញពីតម្រូវការចាំបាច់ប្រជាពលរដ្ឋពិសេសកុមារដែលរស់នៅតាមភូមិដាច់ស្រយាលក្នុងឃុំនេះត្រូវការភ្លើងបំភ្លឺនៅពេលរាត្រីអង្គការជីវិតថ្លៃថ្នូរនិងក្រុមហ៊ុនPanasoniតាមរយៈមូលនិធិចេនឡាប្រទេសជប៉ុន បានសម្រេចផ្តល់ជាអំពូលបំភ្លឺសូឡាដល់គ្រួសារដែលមានជីវភាពខ្សត់ខ្សោយចំនួន២៦៣គ្រួសាររស់នៅក្នុងភូមិទាំង១២ ដោយមួយគ្រួសារទទួលបានអំពូលសូឡាមួយគ្រឿង។
ចំណែកលោក ម៉ៃដា ប្រធានក្រុមហ៊ុនPanasonicប្រចាំកម្ពុជាបាននិយាយថា ដោយមើលឃើញពីការខិតខំប្រឹងប្រែងរបស់ប្រមុខដឹកនាំរាជរដ្ឋាភិបាលកម្ពុជានិងក្រោមទិសស្លោក”នាំពន្លឺទៅកាន់ប្រជាពលរដ្ឋ”ក្រុមហ៊ុនបានរួមចំណែកក្នុងការលើកស្ទួយការរស់នៅរបស់ប្រជាពលរដ្ឋនៅតាមមូលដ្ឋានផងដែរ តាមរយៈការឧបត្ថម្ភជាអំពូលសូឡានិងសម្ភារៈផ្សេងៗដែលជាតម្រូវការចាំបាច់ក្នុងការរស់នៅប្រចាំថ្ងៃ។
លោក ងួន វាសនា អភិបាលស្រុកឱរ៉ាល់បានបង្ហាញនូវការរីករាយចំពោះទឹកចិត្តរបស់អង្គការជីវិតថ្លៃថ្នូរ ,ក្រុមហ៊ុនPanasonic និងប្រជាជនជប៉ុនដែលតែងតែជួយគាំទ្រដល់ការរស់នៅរបស់ប្រជាពលរដ្ឋនៅក្នុងស្រុកឱរ៉ាល់។ការឧបត្ថម្ភអំពូលសូឡាសម្រាប់បំភ្លឺគេហដ្ឋាននេះថ្វីត្បិតតែតិចតួច តែបានជួយសម្រួលការរស់នៅបានច្រើន។
លោក ងួន វាសនា ក៏បានរំលឹកដល់ប្រជាពលរដ្ឋនៅទីនោះឱ្យបញ្ជូនកូនៗដែលគ្រប់អាយុចូលសាលាឱ្យបានគ្រប់ៗគ្នា កុំផ្តេកផ្តួលក្រោមហេតុផលថា ភូមិឆ្ងាយ ពីសាលា ផ្លូវពិបាកធ្វើដំណើរជាដើម៕
ដោយ៖ម៉ុន សំអាត
