(ភ្នំពេញ)៖សហព័ន្ធកីឡាទូកកានូ និងរ៉ូអ៊ីងកម្ពុជា នាព្រឹកថ្ងៃទី៨ ខែ មិថុនា ឆ្នាំ២០២៤ ដឹកនាំដោយ លោក វរសេនីយ៍ទោ វ៉ា គ្រី អគ្គលេខាធិការរងសហព័ន្ធកីឡាទូកកានូ និងរ៉ូអ៊ីងកម្ពុជា សរុបប្រតិភូ គ្រូបង្វឹក កីឡាករកីឡាការិនីចំនួន ២៨នាក់ បានចាកចេញពីប្រទេសកម្ពុជាទៅចូលរួមការប្រកួតកីឡាទូកនាគអន្តរជាតិ នៅទីក្រុងម៉ាកាវ សាធារណរដ្ឋប្រជាម៉ានិតចិន ។

ថ្លែងប្រាប់អ្នកយកព័ត៌មានកីឡាមុនចេញដំណើរ លោក គង់ សុភាព គ្រូបង្វឹកជំនួយ បានបញ្ជាក់ឱ្យដឹងថា ការប្រកួតកីឡាទូកនាគអន្តរជាតិដែលប្រព្រឹត្តិទៅនៅទី ក្រុងម៉ាកាវ សាធារណរដ្ឋប្រជាម៉ានិតចិននេះ ដំណើរការប្រកួតចាប់ពីថ្ងៃទី៨ដល់ថ្ងៃទី១០ ខែមិថុនា ឆ្នាំ២០២៤ ។

លោក គង់ សុភាព បានគូសបញ្ជាក់ទៀតថា ការចូលរួមរបស់កម្ពុជាក្នុងព្រឹត្តិការណ៍ប្រកួតមួយនេះ គឺចូលរួមតែមួយវិញ្ញាសាប៉ុណ្ណោះ ជាវិញ្ញាសាប្រកួត OPEN ចម្ងាយ ៥០០ម៉ែត្រចំណុះ២២នាក់ ។

លោក អះអាងថា ការប្រកួតទូកនាគអន្តរជាតិនៅប្រទេសចិននេះ សម្រាប់កីឡាករកីឡាការិនីកម្ពុជាមានក្តីរំពឹងថានឹងមានលទ្ធភាពនាំយកមេដាយបានមកជូនកម្ពុជា ខណៈការចូលរួមដើម្បីដកស្រង់ទាំងបទពិសោធន៍ និងបច្ចេកទេសថ្មីៗមកអភវិឌ្ឍសមត្ថភាពត្រៀមប្រកួតដណ្តើមមេដាយជូនកម្ពុជាពីព្រឹត្តិការណ៍កីឡាស៊ីហ្គេម លើកទី៣៣ នៅប្រទេសថៃក្នុងឆ្នាំ២០២៥ ។

នាឱកាសនោះ លោក គង់ សុភាព គ្រូជំនួយ ក៏បានថ្លែងអំណរគុណចំពោះក្រសួងអប់រំយុវជន និងកីឡា និង ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ប្រធានសហព័ន្ធកីឡាទូកកានូ និងរ៉ូអ៊ីងកម្ពុជា ដែលបានអនុញ្ញាតបញ្ជូនប្រតិភូ គ្រូបង្វឹក កីឡាករកីឡាការិនីចូលរួមការប្រកួតទូកនាគអន្តរជាតិ ។

ចូលរួមក្នុងបេសកម្មប្រជែងដណ្តើមមេដាយនៅចិននេះ កីឡាការិនី សុខា រដ្ឋា និងកីឡាករ លី តូហាត បានប្តេជ្ញាចិត្ត នឹងប្រឹងប្រែងអស់ពីលទ្ធភាព ដើម្បីនាំយកជ័យជំនះនិងមេដាយជូនកម្ពុជា ។

សូមជម្រាប់ថា ការប្រកួតកីឡាទូកនាគអន្តរជាតិ ដែលរៀបចំដោយ សាធារណរដ្ឋប្រជាម៉ានិតចិន នៅទីក្រុង ម៉ាកាវ មានប្រទេសខ្លាំងជាច្រើនចូលរួម ដែលការប្រកួតដំណើរការប្រកួតផ្លូវការពីថ្ងៃទី៨ ដល់ថ្ងៃទី១០ ខែ មិថុនា ឆ្នាំ២០២៤ សម្រាប់សហព័ន្ធកីឡាទូកកានូ និងរ៉ូអ៊ីងកម្ពុជា បញ្ជូនតែវិញ្ញាសាទូកនាគចម្ងាយ៥០០ម៉ែត្រចំណុះ២២នាក់ចូលរួមប៉ុណ្ណោះ។

សូមបញ្ជាក់ដែរថា បន្ទាប់ពីចូលរួមនៅប្រទេសចិន នៅចុងខែ មិថុនា សហព័ន្ធកីឡាទូកានូ និងរ៉ូអ៊ីងកម្ពុជា ក៏បញ្ជូន ប្រតិភូ គ្រូ បង្វឹក ចំនួន១៥រូប ទៅចូលរួមការប្រកួតកីឡាទូកនាគអន្តរជាតិនៅប្រទេសរុស្ស៊ី ចាប់ពីថ្ងៃទី២០ដល់៣០ ខែ មិថុនា ឆ្នាំ២០២៤ ៕

រូប ភាព និង អត្ថបទ ៖ ជាវ ចន្ធូ