ភ្នំពេញ៖ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុ ប្រធាន ទី១ ក្រុមប្រឹក្សាអភិវឌ្ឍន៍កម្ពុជាបានអញ្ជើញ ទស្សនកិច្ច នៅសហភា​ព​ចាប់ពីថ្ងៃទី៩ ដល់ថ្ងៃទី១៨ ខែមិថុនា ឆ្នាំ២០២៤។ទស្សនកិច្ចរយៈពេលវែងបង្គួរនេះត្រូវបាន ដាក់ ឈ្មោះថា “​ដំណើរបេសកកម្ម​គោះ​ទ្វារ​វិនិយោគនៅសហភាព អឺរ៉ុប”។​

នៅទឹកដីសហភាពអឺរ៉ុបដំបូងកាលពីព្រឹកថ្ងៃចន្ទទី១០ ខែមិថុនាឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានអញ្ជើញ ជួបពិភាក្សាការងារជាមួយ លោកជំទាវ Amparo Lopez Senovilla រដ្ឋលេខាធិការ​ទទួលបន្ទុកពាណិជ្ជកម្ម នៃក្រសួងពាណិជ្ជកម្មព្រះរាជាណាចក្រអេស្ប៉ាញ។ក្នុង ឱកាសនេះប្រទេសអេស៉្បាញ​បានបង្ហាញ​ចំណាប់​វិនិយោគលើវិស័យមួយចំនួននៅកម្ពុជា។

ក្រុមប្រឹក្សាអភិវឌ្ឍន៍កម្ពុជានៅរសៀលថ្ងៃទី១០ ខែមិថុនានេះ បានឱ្យដឹងថា ជាជំនួបពិភាក្សាការងារដំបូង ក្នុងដំណើរបេស កកម្ម​គោះទ្វារវិនិយោគនៅសហភាពអឺរ៉ុបនាឱកាសនេះ ឯកឧត្តមឧបនាយករដ្ឋមន្ត្រី បានជម្រាបជូនលោកជំទាវ រដ្ឋលេខាធិការ​អំពី​សក្តានុពលវិជ្ជមានរបស់ព្រះរាជាណាចក្រ កម្ពុជាមានជាអាទិ៍ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច កម្លាំងពលកម្មកម្ពុជា​ដែលមានភាពវ័យក្មេងប្រកបដោយ ថាមពល និងថាមវន្ត មានរាជរដ្ឋាភិបាលដែល​គាំទ្រដល់ធុរកិច្ច មានរបបវិនិយោគដែល​មានភាពអនុគ្រោះ និងភាពប្រទាក់ ក្រឡានៃហេដ្ឋារចនាសម្ព័ន្ធអន្តរមធ្យោបាយកម្ពុជាដែល​បាន​និងកំពុងផ្ដល់ឱកាសឱ្យ​វិនិយោគិនបណ្ដាក់ទុនវិនិយោគ បាន ផងដែរ។បន្ថែមពីនេះ ឯកឧត្តមឧបនាយករដ្ឋមន្ត្រី បានរំពឹងថា​ព្រះរាជាណាចក្រកម្ពុជា និងព្រះរាជាណាចក្រអេស្ប៉ាញ អាច ពិនិត្យរៀបចំឱ្យមានសន្ធិសញ្ញាវិនិយោគទ្វេភាគី សំដៅបង្កភាព​ងាយស្រួលដល់ការវិនិយោគ និងទំនាក់ទំនងផងដែរ។

ប្រភពដដែលបន្តថា ក្នុងជំនួបនេះ លោកជំទាវ Amparo Lopez Senovilla បានបង្ហាញការស្វាគមន៍ជូនចំពោះ ឯកឧត្តម​ឧបនាយក​រដ្ឋមន្ត្រី និង​គណៈប្រតិភូកម្ពុជា ចំពោះ ដំណើរទស្សនកិច្ចក្នុងប្រទេសអេស្ប៉ាញនាឱកាសនេះ ព្រមទាំងបានបង្ហាញចំណាប់អារម្មណ៍​ដែល​​វិនិយោគិន​អេស្ប៉ាញ អាចវិនិយោគលើវិស័យទេសចរណ៍ ថាមពល កកើតឡើងវិញ ឱសថ វិស័យហេដ្ឋារចនាសម្ព័ន្ធដឹកជញ្ជូន ពិសេសហេដ្ឋារចនាសម្ព័ន្ធប្រព័ន្ធចម្រោះទឹកកខ្វក់ និងវិស័យផ្សេងៗមួយចំនួនទៀតនៅកម្ពុជាផងដែរ។

សូមជម្រាបថា ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជានិងគណៈប្រតិភូ បាន​អញ្ជើញ​បំពេញទស្សនកិច្ច​គោះទ្វារ​វិនិយោគនៅសហភាព អឺរ៉ុប ពីថ្ងៃទី៩ ដល់ថ្ងៃទី១៨ ខែមិថុនា ឆ្នាំ២០២៤៕
ដោយ៖មុនី