ក្រុមហ៊ុនបច្ចេកវិទ្យា Apple កាលពីថ្ងៃពុធ បានចំណាយពេលយ៉ាងខ្លី ដណ្តើមបានតំណែងជាក្រុមហ៊ុនមានតម្លៃបំផុត នៅក្នុងពិភពលោក ដែលវាស់វែងដោយតម្លៃភាគហ៊ុន នៅផ្សាហ៊ុនអាមេរិក Wall Street ។ ការយកបានតំណែងកំពូលដូច្នេះឡើងវិញ បានកើតមានឡើង ក្រោយពេល ត្រឹមតែ២ ឬ បី ម៉ោងប៉ុណ្ណោះ បន្ទាប់ពីក្រុមហ៊ុន Microsoft បានគ្រងតំណែងមួយនេះ។

ការឈរលើចំណុចកំពូល ជាមួយនឹងតម្លៃក្រុមហ៊ុន ហក់ដល់ ៣.២៦លានលានដុល្លារ បានកើតមានឡើង បន្ទាប់ពី Apple ទើបបានប្រកាសមុខងារ AI យុទ្ធសាស្ត្រ នៅក្នុងសន្និសីទស្តីពីការអភិវឌ្ឍន៍ប្រចាំឆ្នាំ របស់ខ្លួន កាលពីថ្ងៃចន្ទ។ Apple បានបង្ហាញនូវវេទិកា AI ថ្មីមួយ Apple Intelligence ដែលនឹងត្រូវបានបន្ថែម ជាបណ្តើរៗ ទៅក្នុងការអភិវឌ្ឍថ្មី នៃប្រព័ន្ធប្រតិបត្តិការ iOS 18 ។

អ្នកវិភាគជឿជាក់ថា ប្រព័ន្ធប្រតិបត្តិការថ្មីរបស់ iPhone នឹងជំរុញឱ្យអ្នកប្រើប្រាស់របស់ Apple ឈានដល់ ១.៥ ពាន់លាននាក់ ដែលនឹងទាញយកអត្ថប្រយោជន៍ ពីមុខងារ AI ឬ បញ្ញាសិប្បនិម្មិត។

យ៉ាងណាមិញ នៅក្នុងបទសម្ភាសន៍មួយ នាយកប្រតិបត្តិក្រុមហ៊ុន Apple លោក Tim Cook បានពន្យល់ថា ក្រុមហ៊ុនបានទទួលយក យ៉ាងប្រុងប្រយ័ត្ន នូវ AI ជំនាន់ថ្មី ដោយលោកអះអាងថា យើងបានអនុវត្ត តាមរបៀប ដែលមិនឲ្យមានការរំលោភលើ «ភាពឯកជនទិន្នន័យ» របស់អ្នកប្រើប្រាស់៕

ប្រភព AFP ប្រែសម្រួល៖ សារ៉ាត