បរទេស៖ វិមានក្រឹមឡាំង និងប្រព័ន្ធផ្សព្វផ្សាយរដ្ឋកូរ៉េខាងជើង បានឲ្យដឹង កាលពីថ្ងៃចន្ទ ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន នឹងធ្វើទស្សនកិច្ច នៅកូរ៉េខាងជើង នៅថ្ងៃទី១៨-១៩ ខែមិថុនា សម្រាប់ «ដំណើរទស្សនកិច្ចផ្លូវរដ្ឋនិងមិត្តភាព»។

ទស្សនកិច្ចនេះនឹងក្លាយជាដំណើរទស្សនកិច្ចលើកទីមួយ របស់លោក ពូទីន ទៅកាន់ប្រទេសកូរ៉េខាងជើង ចាប់តាំងពីខែកក្កដា ឆ្នាំ២០០០។ ដោយកាលណោះ លោក ពូទីន បានជួបជាមួយលោក គីម ជុងអ៊ីល ដែលជាឪពុករបស់ លោក គីម ជុងអ៊ុន មេដឹកនាំកូរ៉េខាងជើង បច្ចុប្បន្ន។ ប៉ុន្តែ លោក គីម ជុងអ៊ុន ទើបបានទៅបំពេញទស្សនកិច្ចនៅរុស្ស៊ី កាលពីចុងឆ្នាំ២០២៣។

ដំណើរទស្សនកិច្ចនេះបានបង្ហាញពីកិច្ចសហប្រតិបត្តិការយោធា កាន់តែស៊ីជម្រៅ រវាងកូរ៉េខាងជើង និងរុស្ស៊ី ជាពិសេស ចំពេលមានការសង្ស័យថា កូរ៉េខាងជើងបាននិងកំពុងផ្តល់អាវុធដល់រុស្ស៊ី សម្រាប់សង្គ្រាមនៅក្នុងប្រទេសអ៊ុយក្រែន ដើម្បីជាថ្នូរនឹងជំនួយស្បៀងអាហារ និងបច្ចេកវិទ្យាអាវុធទំនើប ដែលមានសក្តានុពល។

វិមានក្រឹមឡាំងបាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា បន្ទាប់ពីបញ្ចប់ទស្សនកិច្ច នៅកូរ៉េខាងជើង លោក ពូទីន នឹងបន្តធ្វើដំណើរទៅកាន់ប្រទេសវៀតណាម សម្រាប់ដំណើរទស្សនកិច្ចរយៈពេលពីរថ្ងៃ ជំរុញភាពជាដៃគូយុទ្ធសាស្ត្រដ៏ទូលំទូលាយ រវាងទីក្រុងម៉ូស្គូ និងទីក្រុងហាណូយ៕

ប្រភពពី AFP ប្រែសម្រួល៖ សារ៉ាត