ភ្នំពេញ៖ ដើម្បីលើកទឹកចិត្ត ដល់ការចូលរួមអភិរក្សព្រៃឈើ និង ពិសេសការអប់រំដល់សហគមន៍ដែលរស់នៅក្នុង និងជុំវិញតំបន់ការពារធម្មជាតិ អំពីសារៈសំខាន់នៃកម្មវិធីរេដបូក ទីភ្នាក់ងារជំនួយអាមេរិកUSAID មរតកបៃតង សហការជាមួយអង្គការសមាគមអភិរក្សសត្វព្រៃ (WCS )កម្ពុជា បានចាប់ផ្តើមយុទ្ធនាការលើកកម្ពស់ការយល់ដឹងដល់យុវជនចំនួន ៣០ នាក់នៅខេត្តមណ្ឌលគិរី ចាប់ពីកំលុងចុងឧសភាកន្លងទៅនេះ។

បើតាមទីភ្នាក់ងារជំនួយអាមេរិក USAID មរតកបៃតងនយុទ្ធនាការនេះមានរួមបញ្ចូលការបញ្ចាំងវីដេអូគំនូរជីវចលពន្យល់អំពីកម្មវិធីរេដបូក ដែលជាកម្មវិធីបង្កើតចំណូលឥណទានកាបូនជាថ្នូរនឹងការការពារព្រៃឈើ ការធ្វើលំហាត់ស្តីពីការ «អរគុណព្រៃឈើ!» ដើម្បីលើកទឹកចិត្តអ្នកចូលរួមក្នុងការផ្តល់តម្លៃដល់ព្រៃឈើ និងការលេងល្បែងកម្សាន្ត ឈ្មោះថា «គ្មានព្រៃឈើ ទឹកកាច!» ដើម្បីបង្ហាញពីទំនាក់ទំនងរវាងព្រៃឈើ និងវដ្តទឹក ដែលរួមចំណែកដល់ជីវភាពរស់នៅប្រចាំថ្ងៃរបស់ប្រជាជន។

អ្នកចូលរួមម្នាក់ក្នុងចំណោមអ្នកចូលរួមយ៉ាងសកម្មក្នុងសកម្មភាពនេះ លោកស្រះ ថិត បាននិយាយថា «ខ្ញុំមានភាពរីករាយក្នុងការទស្សនាវីដេអូអំពីកម្មវិធីរេដបូក ការលេងល្បែងកម្សាន្ត «គ្មានព្រៃឈើ ទឹកកាច!» និងសកម្មភាពផ្សេងទៀត។ វានបានធ្វើឱ្យខ្ញុំយល់ដឹងកាន់តែស៊ីជម្រៅអំពីសារៈសំខាន់នៃការការពារបរិស្ថានរបស់យើង»៕ដោយ៖ម៉ាដេប៉ូ