ម្ចាស់ទូកចម្លងនៅស្រុកប្រាសាទសំបូរ ទទួលការណែនាំបន្ថែមពីរដ្ឋបាលខេត្តបន្ទាប់ពីសិស្សម្នាក់បាត់បង់ជីវិត
កំពង់ធំ៖ម្ចាស់អាជីវកម្មទូកដ នៅភូមិឈូកស្ទឹង ឃុំឈូក ស្រុកប្រាសាទសំបូរ ខេត្តកំពង់ធំ ត្រូវបានទទួលការដាស់តឿនបន្ថែមទៀតពីអភិបាលខេត្តកំពង់ធំ បន្ទាប់ពីទូកចម្លងនៅទីនេះបានជួបឧបទ្ទវហេតុលិចទូកនៅពេលឆ្លងស្ទឹងបណ្ដាលឱ្យក្មេងប្រុសជំទង់ម្នាក់បាត់បង់ជីវិត។
កាលពីព្រឹកថ្ងៃទី១៩ ខែមិថុនា ឆ្នាំ២០២៤ឯកឧត្តម ងួន រតនៈ អភិបាលខេត្តកំពង់ធំក្រុមការងារថ្នាក់ខេត្ត លោក ឃីម សុខឃាង អភិបាលស្រុកប្រាសាទសំបូរ និងលោកមេឃុំបានចុះពិនិត្យទីតាំងទូកដចម្លងដែលបានជួបនូវរឿងរ៉ាវអាក្រក់កាលពីថ្ងៃទី៨ ខែមិថុនា បានបណ្ដាលឱ្យសិស្សសាលាអនុវិទ្យាល័យឈូកម្នាក់ឈ្មោះ អ៊ីន សុភ័ក្រ អាយុ ១៣ឆ្នាំរៀនថ្នាក់ទី៧ មានទីលំនៅភូមិជាំបឹង ឃុំស្រើង ស្រុកប្រាសាទសំបូរ បាត់បង់ជីវិត ។
នៅទីនោះឯកឧត្តម ងួន រតនៈ បានជួបជាមួយនឹងក្មួយៗជាសិស្សានុសិស្ស ។លោកបានណែនាំដល់ក្មួយៗ ថាត្រូវតែមានការប្រុងប្រយ័ត្ននៅពេលឡើងទូក មិនត្រូវប្រឡែងគ្នានៅលើទូក ។ត្រូវពាក់អាវពោងសុវត្ថិភាពឱ្យបានត្រឹមត្រូវ ។សូមឱ្យក្មួយៗត្រូវរៀនហែលទឹកឱ្យបានគ្រប់ៗគ្នា។
សំដៅទៅលើអ្នកទទួលខុសត្រូវឯកឧត្តមអភិបាលខេត្តកំពង់ធំ បានណែនាំដល់ម្ចាស់អាជីវកម្មទូកដត្រូវយកចិត្តទុកដាក់អំពីបញ្ហាសុវត្ថិភាពជាចាំបាច់ ។ ត្រូវពិនិត្យមើលលក្ខណៈបច្ចេកទេសរបស់ទូកឱ្យបានជាប្រចាំ ហើយប្រសិនបើមានបងប្អូនប្រជាពលរដ្ឋមិនពាក់អាវពោងសុវត្ថិភាពគឺមិនត្រូវឱ្យគាត់ឆ្លងឡើយ។ឯកឧត្តមអភិបាលខេត្តកំពង់ធំ បានលើកទឹកចិត្តដល់អាជ្ញាធរមូលដ្ឋាន ត្រូវបង្កើតគណៈកម្មការដើម្បីគ្រប់គ្រង និងថែក្សាទូកឱ្យបានច្បាស់លាស់ ។គណៈកម្មការត្រូវមានភារកិច្ចត្រួតពិនិត្យដំណើរការអាជីវកម្ម និងត្រួតពិនិត្យលើកិច្ចសន្យារបស់ម្ចាស់អាជីវកម្មទាំងអស់ និងត្រួតពិនិត្យការថែរក្សាជួសជុលទូកផងដែរ។
ឯកឧត្តមបានបន្តថា ដោយមើលឃើញពីការលំបាករបស់ប្រជាពលរដ្ឋ ក្មួយៗសិស្សានុសិស្សត្រូវឆ្លងស្ទឹងជារៀងរាល់ថ្ងៃ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់ទូកដមួយគ្រឿងដែលមានលក្ខណៈសម្បត្តិត្រឹមត្រូវ តាមបទដ្ឋានបច្ចេកទេស ទុកសម្រាប់ចម្លងនៅទីនេះផងដែរ។
ឯកឧត្តមក៏បានណែនាំបន្ថែមថា នៅពេលដែលទទួលបានទូកថ្មីមកចម្លង ម្ចាស់អាជីវកម្មទាំងអស់ត្រូវយកចិត្តទុកដាក់ក្នុងការថែរក្សាទូកឱ្យបានល្អដើម្បីជាប្រយោជន៍ដល់ម្ចាស់អាជីវកម្មផង និងដើម្បីសុវត្ថិភាពដល់អ្នកឆ្លងផង៕
អត្ថបទនិងរូបភាព៖ប៊ុន រដ្ឋា