ខេត្តបាត់ដំបងរម្លឹកពីវីរភាពនិងគុណបំណាច់របស់អតីតយុទ្ធជន
បាត់ដំបង៖មន្រ្តីនៃមន្ទីរសង្គមកិច្ច អតីតយុទ្ធជននិងយុវនីតិសម្បទា ខេត្តបាត់ដំបងបានរំលឹកពីវីរភាពដ៏អង់អាចក្លាហាន និងគុណបំណាច់ដ៏ធំធេងអតីតយុទ្ធជន ចំពោះជាតិមាតុភូមិនិងប្រជាជនតាមរយៈការបូជាសាច់ស្រស់ ឈាមស្រស់ក្នុងបុព្វហេតុរំដោះប្រទេសជាតិឲ្យរួចចេញផុតពីរបបប្រល័យពូជសាសន៍ ប៉ុល ពត និងការនាំមកវិញនូវសុខសន្តិភាពដ៏ពេញលេញ។
![](https://asset.ams.com.kh/central/media/2024/06/photo_2024-06-19_20-44-55-1024x613.jpg)
រំលេចឱ្យឃើញពីឧបការគុណនេះបានធ្វើឡើង កាលពីថ្ងៃទី១៩ ខែមិថុនា ឆ្នាំ២០២៤ ក្នុងឱកាសមន្ទីរសង្គមកិច្ចរួមជាមួយសមាគមអតីតយុទ្ធជនកម្ពុជាខេត្តបានប្រារព្ធពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា” ២១ មិថុនា ២០០៧-២១ មិថុនា ២០២៤” ។
![](https://asset.ams.com.kh/central/media/2024/06/photo_2024-06-19_20-45-00-1024x639.jpg)
លោក ភួង សិទ្ធិ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តបាត់ដំបង បានប្រាប់ទូរទស្សន៍អប្សរាថា ការប្រារព្ធទិវាអតីតយុទ្ធជននេះ ដើម្បីផ្សព្វផ្សាយដល់ប្រជាជននៅទូទាំងប្រទេសនិយាយជារួមនិងនិយាយដោយឡែកប្រជាពលរដ្ឋក្នុងខេត្តបាត់ដំបងយល់ដឹងកាន់ច្បាស់និងកាន់តែទូលំទូលាយអំពីវិរភាពនៃអតីតយុទ្ធជនកម្ពុជា ។តាមរយៈការផ្សព្វផ្សាយនេះនឹងបំផុសនូវចលនាចូលរួមគាំទ្រឲ្យកាន់តែផុលផុសដល់អតីតយុទ្ធជនក្នុងការលើកកម្ពស់តួនាទីរបស់អតីតយុទ្ធជនក្នុងសង្គមនិងជំរុញនូវស្មារតីស្នេហាជាតិ ក្នុងស្រទាប់ប្រជាជននិងកងកម្លាំងប្រដាប់អាវុធ។
![](https://asset.ams.com.kh/central/media/2024/06/photo_2024-06-19_20-45-05-1024x650.jpg)
លោកប្រធានមន្ទីរបានបន្តថា រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងដល់អតីតយុទ្ធជន តាមរយៈការអនុវត្តគោលនយោបាយជាតិចំពោះអតីតយុទ្ធជន និងការគិតគូរដោះស្រាយជីវភាព ទាំងសម្ភារៈ ទាំងថវិកា។
![](https://asset.ams.com.kh/central/media/2024/06/photo_2024-06-19_20-45-16-1024x644.jpg)
បច្ចុប្បន្នខេត្តបាត់ដំបងមានអតីតយុទ្ធជនចំនួន១៤ ០១៦នាក់ ។ក្នុងនោះបានចុះឈ្មោះចូលជាសមាជិកសមាគមអតីតយុទ្ធជនកម្ពុជាខេត្តចំនួន១១ ៦៩៩នាក់និងអ្នកក្នុងបន្ទុកចំនួន ១៩ ៤៣៩នាក់។ពួកគេស្ថិតនៅក្រោមការគ្រប់គ្រង របស់ សាខាមូលនិធិជាតិជំនួយសង្គមខេត្តបាត់ដំបងដោយទទួលរបបគោលនយោបាយពីរដ្ឋ។
![](https://asset.ams.com.kh/central/media/2024/06/photo_2024-06-19_20-45-21-1024x676.jpg)
លោក ផេង សិទ្ធី អភិបាលរងខេត្ត និងជាអនុប្រធានកិត្តិយសសមាគមអតីតយុទ្ធជនកម្ពុជាខេត្តបាត់ដំបងបានណែនាំ ដល់អាជ្ញាធរគ្រប់លំដាប់ថ្នាក់ជាពិសេសមន្រ្តីនគរបាលប៉ុស្តិ៍ត្រូវតាមដាននិងយកចិត្តទុកដាក់ចំពោះសុខទុក្ខរបស់បងប្អូនអតីតយុទ្ធជននៅគ្រប់ពេលពេលវេលា និងគ្រប់កាលៈទេសៈ ដែលស្ថិតក្នុងដែនសមត្ថកិច្ចរបស់ខ្លួន។លោកថា រាជរដ្ឋាភិបាលកម្ពុជាពីមួយអាណត្តិទៅមួយអាណត្តិ តែងតែបានផ្ដល់ការយកចិត្តទុកដាក់ខ្ពស់ចំពោះសុខទុក្ខរបស់បងប្អូនអតីតយុទ្ធជន ។រាជរដ្ឋាភិបាលមិនទុកអតីតយុទ្ធជនណាម្នាក់ចោលនោះឡើយ។
នៅក្នុងឱកាសនេះដែរលោកឧត្តមសេនីយ៍ទោ សាត គឹមសាន ស្នងការនគរបាល និងជាប្រធានសមាគមអតីតយុទ្ធជនកម្ពុជាខេត្តបាត់ដំបង បានអានសារលិខិតសម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងឱកាសខួបលើកទី១៧ ទិវាអតីតយុទ្ធជនកម្ពុជា ២១ មិថុនា ឆ្នាំ២០២៤៕ អត្ថបទ-រូបភាព ៖ អ៊ុក សំអាន បប.