បរទេស៖ មន្ត្រីបាននិយាយ កាលពីថ្ងៃសុក្រថា ភ្លៀងធ្លាក់ខ្លាំងពាសពេញតំបន់អាមេរិកកណ្តាល បានបណ្តាលឲ្យមនុស្សស្លាប់ យ៉ាងតិច ២៧នាក់ ក្នុងពេលរអិលបាក់ដី និងទឹកជំនន់ រយៈពេលមួយសប្តាហ៍កន្លងមកនេះ ដូចជា នៅប្រទេស El Salvador, ក្វាតេម៉ាឡា (Guatemala) និងប្រទេស ហុងឌុយរ៉ាស់ (Honduras) ផងដែរ។

រដ្ឋមន្ត្រីក្រសួងបរិស្ថានប្រទេស El Salvador និយាយថា ទឹកជំនន់នេះគឺជាលទ្ធផល នៃសម្ពាធទាបលើមហាសមុទ្រប៉ាស៊ីហ្វិក ជាមួយនឹងឥទ្ធិពលដោយប្រយោល ពីព្យុះត្រូពិច Alberto ដែលបានបណ្តាលឱ្យមនុស្ស ៤ នាក់បានស្លាប់ នៅក្នុងប្រទេសម៉ិកស៊ិក។

ផ្នែកការពារស៊ីវិល El Salvador បាននិយាយនៅក្នុងបទសម្ភាសន៍តាមទូរទស្សន៍ថា «ជាអកុសលចំនួនអ្នកស្លាប់ឥឡូវនេះ បានកើនឡើងដល់ ១៩ នាក់ ដែលជាព្រឹត្តិការណ៍ដ៏គួរឱ្យសោកស្ដាយបំផុត» ។

នៅប្រទេសហ្គាតេម៉ាឡា ដែលនៅជិតខាង អាជ្ញាធរបានរាយការណ៍ថា មានមនុស្សស្លាប់ចំនួន ៧ នាក់ត្រូវបានកត់ត្រា ហើយបាននិយាយថា ទឹកជំនន់បានធ្វើឱ្យខូចផ្លូវថ្នល់ និងស្ពាន។

គណៈកម្មាធិការអចិន្ត្រៃយ៍របស់ប្រទេសហុងឌូរ៉ាសវិញ បានរាយការណ៍ថា មានអ្នកស្លាប់ម្នាក់ ហើយមនុស្សចំនួន ៣៥០០នាក់ បានរងផលប៉ះពាល់ និងផ្ទះជាង ២០០ខ្នង បានខូចខាត។

សហគមន៍ជាច្រើនត្រូវបានកាត់ផ្តាច់ ដោយសារតែការកើនឡើងនៃទន្លេ នៅភាគខាងត្បូងប្រទេស ហុងឌូរ៉ាស នៅជិតព្រំដែនជាមួយប្រទេស El Salvador នេះបើយោងតាមអ្នកកាសែត AFP ។ នីការ៉ាហ្គា ពុំទាន់មានសេចក្តីរាយការណ៍អំពីមនុស្សស្លាប់ទេ ប៉ុន្តែ អាជ្ញាធរព្រមានអំពីការកើនឡើងនៃទឹកទន្លេ ជន់លិចផ្ទះ និងការខូចខាតផ្លូវថ្នល់៕

ប្រភពពី AFP ប្រែសម្រួល៖ សារ៉ាត