បរទេស៖ ប្រមុខអង្គការសហប្រជាជាតិ ហៅកាត់ UN លោក Antonio Guterres បានព្រមាន ថ្មីៗនេះថា ការប្រយុទ្ធគ្នា រវាងអ៊ីស្រាអែល និងក្រុម Hezbollah ក្នុងប្រទេសលីបង់ អាចនាំឲ្យលីបង់ ក្លាយជាតំបន់ហ្គាហ្សាទី២ ដោយលោកប្រកាសថា ដាច់ខាត កុំឲ្យរឿងនេះ កើតឡើង។

លោក Guterres បានលើកឡើង ពីការកើនឡើងនូវ «វោហាសាស្ត្រដ៏តឹងតែង» ពីភាគីទាំងសងខាង ខណៈដែលពួកគេបាញ់ប្រហារគ្នា ស្ទើរតែរាល់ថ្ងៃ នៅព្រំដែនអ៊ីស្រាអែល-លីបង់ ស្របជាមួយនឹងសង្គ្រាម នៅតំបន់ហ្គាហ្សាស្ទ្រីប។ លោកបាននិយាយថា ភាគីទាំងពីរអាចបង្កមហន្តរាយ «លើសពីការស្មាន»។

អ៊ីស្រាអែលតែងតែគិតថា ពួកសកម្មប្រយុទ្ធ Hezbollah មានអ៊ីរ៉ងគាំទ្រពីក្រោយ ហើយខ្លួនប្តេជ្ញាកំចាត់សត្រូវ តាមរយៈការបាញ់ផ្លោងរ៉ុក្កែត ជាដើម។

អ៊ីស្រាអែល និងក្រុម Hezbollah ដែលចងសម្ព័ន្ធមិត្តជាមួយហាម៉ាស បានបាញ់ផ្លោងដាក់គ្នា ជាប្រចាំ ចាប់តាំងពីការវាយប្រហារថ្ងៃទី៧ ខែតុលា ជាថ្ងៃដែលហាម៉ាស់-ប៉ាឡេស្ទីន វាយប្រហារលើអ៊ីស្រាអែល ហើយបង្កឱ្យមានសង្រ្គាម នៅហ្គាហ្សាស្ទ្រីប ស្លាប់មនុស្សរាប់ម៉ឺននាក់ រហូតមកដល់បច្ចុប្បន្ន។

ការប្រយុទ្ធឆ្លងព្រំដែននេះ បានសម្លាប់មនុស្ស ជិត៥០០នាក់ នៅលីបង់ មានទាំងជនស៊ីវិលដែរ ខណៈអ៊ីស្រាអែល មានស្លាប់ទាហាន និងជនស៊ីវិល ជិត២០នាក់ នាភាគខាងជើង។ កាលពីថ្ងៃព្រហស្បតិ៍ ក្រុម Hezbollah បាននិយាយថា ខ្លួនបានបាញ់រ៉ុក្កែតរាប់សិបគ្រាប់ ទៅកាន់ភាគខាងជើងប្រទេសអ៊ីស្រាអែល ជាការសងសឹកចំពោះការវាយប្រហារដ៏សាហាវ នៅភាគខាងត្បូង ប្រទេសលីបង់ ថ្មីៗនេះ៕

ប្រភពពី AFP ប្រែសម្រួល៖ សារ៉ាត