ឆមាសទីមួយ សមត្ថកិច្ចខេត្តកំពង់ឆ្នាំងបង្រ្កាបគ្រឿងញៀនបាន៨០ករណី
កំពង់ឆ្នាំង៖លោកវរសេនីយឯក ហ៊ុល វាសនា ស្នងការរងនគរបាលទទួលបន្ទុកប្រឆាំងបទល្មើសគ្រឿងញៀននៃស្នងការនគរបាលខេត្តកំពង់ឆ្នាំងបានឱ្យដឹងថា រយៈពេលប្រាំខែដើមឆ្នាំ២០២៤នេះ សមត្ថកិច្ចខេត្តកំពង់ឆ្នាំង បង្ក្រាបគ្រឿងញៀនសរុបចំនួន ៨០ករណី ក្នុងនោះកងរាជអាវុធហត្ថបង្ក្រាបបានចំនួនប្រាំករណីឃាត់ខ្លួនជនសង្ស័យចំនួនប្រាំមួយនាក់ (ស្រី ០១នាក់) និងដកហូតវត្ថុតាងរួមមាន ម្សៅក្រាមពណ៌សថ្លាសង្ស័យជាសារធាតុញៀនប្រភេទមេតំហ្វេតាមីន (ICE) ចំនួន ៤៤ កញ្ចប់ ទម្ងន់ចំនួន ១៥៧,០៩ក្រាម ។
ប្រភពដដែលបន្តថា ដោយឡែកសមត្ថកិច្ចនគរបាលបង្ក្រាបបានចំនួន ៧៥ ករណី និងឃាត់ខ្លួនជនសង្ស័យ ចំនួន ១៦៤នាក់ (ស្រី ១២នាក់) និងដកហូតវត្ថុតាងរួមមានៈ” ម្សៅក្រាមពណ៌សថ្លា សង្ស័យជាសារធាតុញៀន ប្រភេទមេតំហ្វេតាមីន (ICE) ចំនួន ៤២៣ កញ្ចប់ ទម្ងន់សរុបចំនួន ១.៧២៦,៩៧ក្រាម ។បើប្រៀបធៀបទៅនឹងរយៈពេលដូចគ្នានាឆ្នាំ២០២៣ មានការថយចុះចំនួន ២០ករណី គឺស្មើ ៧៥លើ៩៥ ករណី។
លោកវរសេនីយឯក ហ៊ុល វាសនា ថ្លែងឱ្យដឹងដូចនេះកាលពីព្រឹកថ្ងៃទី២៥ ខែមិថុនា ឆ្នាំ២០២៤ ក្នុងពិធីទិវាអន្តជាតិប្រយុទ្ធប្រឆាំងគ្រឿងញៀន ក្រោមប្រធានបទ”រួមគ្នាវិនិយោគលើការបង្ការទប់ស្កាត់និងលើកកម្ពស់ការអប់រំដើម្បីសហគមន៍គ្មានគ្រឿងញៀន”។
ពិធីដែលប្រារព្ធក្នុងបរិវេណវិទ្យាល័យក្រុងកំពង់ឆ្នាំង ភូមិទី៨ សង្កាត់ខ្សាម ក្រុងកំពង់ឆ្នាំងមានការអញ្ជើញចូលរួមពីឯកឧត្តម ស៊ីវ រុន ប្រធានក្រុមប្រឹក្សាខេត្ត លោក ស៊្រន សំឬទ្ធី អភិបាលរងខេត្ត លោកស្រី ប៊ន សុភី អភិបាលរងខេត្ត ព្រះរាជអាជ្ញានៃអយ្យការសាលាដំបូងខេត្ត ថ្នាក់ដឹកនាំ មន្រ្តីរាជការនៃមន្ទីរជុំវិញខេត្ត កងម្លាំងប្រដាប់អាវុធលោកគ្រូ អ្នកគ្រូ សិស្សានុសិស្សយ៉ាងច្រើនកុះករ។
លោក ស៊្រន សំឬទ្ធី អភិបាលរងខេត្ត បានលើកឡើងដោយស្រង់នូវពាក្យស្លោកពីអង្គការសហប្រជាជាតិថា “បើសិនជាយើងវិនិយោគចំណាយ១ដុល្លាលើវិធានការបង្ការ វាអាចមានប្រសិទ្ធភាពជាជាងចំណាយ១០ដុល្លារ លើការស៊ើបអង្កេតបង្ក្រាប និងព្យាបាល”។លោកបន្តថា ពាក្យស្លោកនេះស្របទៅនឹងពាក្យស្លោករបស់ខ្មែរយើង”ការពារប្រសើរជាងព្យាបាល” ។
លោកអភិបាលរងខេត្តបានអំពាវនាវរួមគ្នាអនុវត្តការផ្សព្វផ្សាយនិងអប់រំ គ្រប់គ្រងការត្រួតពិនិត្យនូវសារធាតុញៀនឱ្យមានប្រសិទ្ធភាព៕
ដោយ៖សុខ គឹមសៀន
