ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធាន​គណបក្ស​ប្រជាជនកម្ពុជា និងជាប្រធានព្រឹទ្ធសភា នៃព្រះរាជា​ណា​ចក្រ​កម្ពុជា បានគូសបញ្ជាក់ថា ឆ្លងកាត់កំណាត់ផ្លូវដ៏វែង​រយៈពេលជាង ៤៥ឆ្នាំ មកនេះ បានបង្ហាញយ៉ាងច្បាស់អំពី​សារជាតិ និង​សមត្ថភាពរបស់គណបក្សប្រជាជនកម្ពុជា​ក្នុងការដឹកនាំប្រទេស។ គណបក្សប្រជាជនកម្ពុជា ជាតំណាង​នៃផលប្រយោជន៍​ដ៏បរិសុទ្ធ​របស់ប្រជាជន ជាបង្អែកដ៏​កក់ក្ដៅរបស់ប្រជាជននៅគ្រប់កាលៈទេសៈ និងបានដឹកនាំ​ប្រជា​ជនឆ្លងកាត់ពេល​វេលាដ៏​សែនលំបាកបំផុត ឈានពីជ័យ​ជម្នះមួយទៅកាន់ជ័យជម្នះមួយទៀតឥតឈប់ឈរ ដែលមានអត្ថន័យយ៉ាងធំធេងចំពោះការ ឋិតថេរគង់វង្ស និងការរីក​ចម្រើនរបស់ជាតិ។

ថ្លែងក្នុងមីទ្ទីងអបអរសាទរ ខួបអនុស្សាវរីយ៍លើកទី ៧៣ នៃថ្ងៃបង្កើតគណបក្សប្រជាជនកម្ពុជា ២៨ មិថុនា ១៩៥១- ២៨ មិថុនា ២០២៤ នៅស្នាក់ការកណ្ដាលគណបក្សប្រជា​ជនកម្ពុជាសម្ដេចតេជោហ៊ុន សែន បានបន្តថា ជំនឿទុកចិត្ត​របស់ប្រជាជន គឺជាការ ទទួលខុសត្រូវរបស់គណបក្សក្នុង​ការកសាងប្រវត្តិសាស្ត្រប្រកបដោយមោទនភាពរបស់ជាតិ ដែលមនុស្សគ្រប់រូបក្នុងសង្គមសុទ្ធតែ មានចំណែកចូល​រួមប្រកបដោយមនសិការ ក្នុងគោលបំណងរួមគ្នា ការពារជាតិ ការពារភាពសុខសាន្ដរបស់ប្រជាជនគ្រប់រូប និងសម្រេចនូវវឌ្ឍនភាពសង្គម។

សម្ដេចតេជោ ហ៊ុន សែន បានគូសបញ្ជាក់បន្ថែមថា នៅគ្រប់​កាលៈទេសៈ និងគ្រប់ស្ថានភាព ក្នុងការដឹកនាំត្រូវតែមានភាព​ត្រឹមត្រូវ​ខាងនយោបាយទាំងយុទ្ធសាស្ត្រ និងយុទ្ធវិធី ទើបធានាបាននូវជោគជ័យ។ នយោបាយរបស់គណបក្ស មិនឆ្វេង មិនស្ដាំ មិនបាត់​ម្ចាស់ការ គឺមានភាពប្រាកដ​ជាក់ស្ដែង ទោះត្រូវប្រឈមនឹងស្ថានភាពលំបាកយ៉ាង​ណាក៏ដោយ។ បើគ្មានភាពត្រឹមត្រូវ​ខាង​នយោបាយ ការដឹកនាំនឹងត្រូវបរាជ័យជាមិនខាន។ ដូច្នេះ ជានិច្ចកាល ត្រូវឈរលើឧត្តមគតិស្នេហាជាតិ គួបផ្សំនឹងមាគ៌ា​ប្រជាធិប​តេយ្យសេរី ពហុបក្ស ដើម្បីដាក់ចេញនូវកម្មវិធីនយោបាយ គោលការណ៍ គោលនយោបាយ និងសេចក្ដីសម្រេច​នានាដែលស្រប​ជាមួយនឹងការវិវត្តនៃសភាពការណ៍ជាក់ស្ដែង​ក្នុងប្រទេស និងសភាពការណ៍ក្រៅប្រទេស។

សម្ដេចតេជោ បានបន្តថា ប្រជាជន គឺជាកត្តាសម្រេច នៃជ័យជម្នះរបស់គណបក្សនៅគ្រប់កាលៈទេសៈទាំងក្នុងដំណាក់កាល​តស៊ូរំដោះជាតិ ក៏ដូចនៅក្នុងដំណាក់កាល នៃការកាន់អំណាចដឹកនាំប្រទេសរបស់គណបក្ស។ បើប្រជាជនមិនគាំទ្រ មិនចូលរួម មិនជឿលើការដឹកនាំរបស់​គណបក្សនោះ គឺគ្មានភារកិច្ចណាដែលគណបក្សអាចសម្រេច​បានឡើយ។ ដូច្នេះគ្រប់អង្គការ​ចាត់តាំង​គណបក្សនៅគ្រប់​ថ្នាក់ត្រូវតែផ្សារភ្ជាប់ជាមួយប្រជាជន ធ្វើបង្អែកឱ្យប្រជាជន ដើម្បីដោះស្រាយ នូវសំណូមពរ និងការលំបាក​នានារបស់​ប្រជាជនផង និងបំផុសប្រជាជន ចូលរួមអនុវត្តកម្មវិធី​នយោបាយ របស់គណបក្សផង ៕
ដោយ៖វណ្ណលុក