ភ្នំពេញ៖ ក្នុងមីទ្ទីងអបអរសាទរ ខួបអនុស្សាវរីយ៍លើកទី ៧៣ នៃថ្ងៃបង្កើតគណបក្សប្រជាជនកម្ពុជា ២៨ មិថុនា ១៩៥១ – ២៨ មិថុនា ២០២៤ នៅស្នាក់ការកណ្ដាលគណបក្សប្រជាជន​កម្ពុជា សម្ដេចអគ្គមហាសេនាបតីតេជោ ហ៊ុន សែន ប្រធាន​គណបក្សប្រជា​ជនកម្ពុជា និងជាប្រធានព្រឹទ្ធសភា នៃព្រះរាជា​ណាចក្រកម្ពុជា បានស្នើដល់រាជរដ្ឋាភិបាល ឱ្យមានការទូងស្ករ បាញ់កាំជ្រួច នៅគ្រប់​ទី​កន្លែងដែលអាចធ្វើទៅបាន នាថ្ងៃទី៥ ខែសីហា ឆ្នាំ២០២៤ ខាងមុខនេះ ដើម្បីបង្ហាញពីការគាំទ្រ លើកទឹកចិត្តនូវការអនុវត្ត​​គម្រោងព្រែកជីកហ្វូណនតេជោ ។

សម្ដេចតេជោ ហ៊ុន សែន មានប្រសាសន៍ថា ក្នុងស្មារតី​សាមគ្គីភាព​ជាតិ សម្ដេចសូមថ្លែងអំណរគុណចំពោះបងប្អូន​ជនរួមជាតិនៅ​គ្រប់ទិសទីដែលបានគាំទ្រពេញទំហឹងដល់​គម្រោងអភិវឌ្ឍន៍ព្រែកជីកហ្វូណនតេជោ ដែលនឹងត្រូវ​បើក​ការដ្ឋានស្ថាបនានៅក្នុងពេល​ដ៏ខ្លីខាងមុខនេះ។ នេះជាចលនា​ជាតិដ៏ខ្លាំងក្លាមួយទៀតរបស់ប្រជាជនទាំងមូល ដូចទៅនឹង​ចលនាជាតិការពារអធិបតេយ្យ បូរណភាពទឹកដី និងចលនាជាតិការពារខឿនសុខភាពប្រជាជននាពេលកន្លងមក។

សម្ដេចតេជោ បានបន្តថា គម្រោងព្រែកជីក-ហ្វូណនតេជោ គឺជាគំនិតផ្ដួចផ្ដើមកើតចេញពីមនសិការ និងឆន្ទៈរបស់ កម្ពុជាសុទ្ធសាធ ដែលនឹងផ្ដល់ផលចំណេញយ៉ាងធំដល់កម្ពុជា ដូចជា៖ ការចំណេញចម្ងាយផ្លូវដឹកជញ្ជូន, ចំណេញខាងការ​ប្រកួតប្រជែងតម្លៃ, បង្កើនប្រព័ន្ធស្រោចស្រព និងការរំដោះទឹក​ជំនន់, ជួយពង្រីកការដាំដុះនៅភាគនិរតី, ទទួលបានផល​នេសាទ និងពីវារីវប្បកម្ម ព្រមទាំងជំរុញដល់វិស័យទេសចរណ៍​ផងដែរ។ ជាមួយគ្នានេះ ព្រែកជីកហ្វូណនតេជោ នឹងជួយ​ឱ្យកម្ពុជាពង្រឹងនូវឯក-រាជ្យភាពខាងនយោបាយលើការដឹក​ជញ្ជូនតាមផ្លូវទឹក។ ព្រែកជីកនេះ នឹងមិនបង្កផលប៉ះពាល់ដល់​បរិស្ថាន និងរំហូរទឹកទន្លេមេគង្គឡើយ ។

សូមរំលឹកថា សម្តេចធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី៦ ខែមិថុនា ឆ្នាំ២០២៤ ក្នុងពិធីសម្ពោធដាក់​ឱ្យប្រើប្រាស់កំពង់​ផែពហុបំណងកំពត ដែលសាងសង់រួច​រាល់ដំណាក់កាលទី១ តម្លៃប្រមាណ ១៤០លានដុល្លារអាមេរិក មានទីតាំងស្ថិតនៅភូមិ​គីឡូ១២ សង្កាត់កោះតូច និងសង្កាត់​បឹងទូក ក្រុងបូកគោ ខេត្តកំពត បានប្រកាសយក​ថ្ងៃទី៥ ខែសីហា ឆ្នាំ២០២៤ បើកការដ្ឋាន​ព្រែកជីកហ្វូណនតេជោ ដោយនឹងផ្ដល់ផលប្រយោជន៍ដល់ខ្មែរតជំនាន់ ។

គម្រោងនេះ កម្ពុជា មិនបានខ្ចីលុយអ្នកណាមកកសាងទេ គឺជាគម្រោង​កសាងដោយវិស័យឯកជនក្រោមរូបភាព (BOT) កសាង ប្រតិបត្តការ និងផ្ទេរ, មានន័យថា ពេលវិស័យឯកជនប្រតិបត្តិ​ការ ហើយដល់ពេលវេលាណាមួយតាមកិច្ចព្រមព្រៀង នឹងផ្ទេរមកកាន់រដ្ឋវិញ ។ ជាមួយគ្នានេះ សម្តេចធិបតី ហ៊ុន ម៉ាណែត ក៏អំពាវនាវដល់ឈ្នួញទិញលក់ដី សូមកុំទៅ​ទិញដីនៅតាមបណ្ដោយគម្រោងព្រែកជីកហ្វូណនតេជោ ដែលនាំឱ្យរាជរដ្ឋាភិបាលពិបាក​ក្នុងការ​ដោះស្រាយ នៅពេលអនុវត្តគម្រោងព្រែកជីកហ្វូណនតេជោនេះ ។

សូមជម្រាបថា គម្រោងព្រែកជីកហ្វូណនតេជោ ដែលជា​ព្រែកជីកប្រវត្តិសាស្រ្ត និងជាគំនិតផ្តួចផ្តើមរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភាកម្ពុជា ហើយបច្ចុប្បន្ន សម្តេចធិបតី ហ៊ុន ម៉ាណែត នាយករដ្ឋមន្ត្រី បានបន្តស្នាដៃ និងជំរុញបន្ថែម ក្នុងការអភិវឌ្ឍគម្រោង ព្រែកជីកហ្វូណនតេជោ ឱ្យសម្រេចបាននាពេលអនាគត។ គម្រោងព្រែកជីកហ្វូណនតេជោ បានតភ្ជាប់ផ្លូវទឹក រវាងទន្លេទៅកាន់សមុទ្រកម្ពុជា ដោយឆ្លងកាត់ ខេត្តកណ្តាល តាកែវ កំពត និងខេត្តកែប មានប្រវែង ១៨០គីឡូម៉ែត្រ ។

គម្រោងព្រែកជីកហ្វូណនតេជោ នឹងផ្តល់អត្ថប្រយោជន៍ដ៏មហា​សាលដល់ប្រទេសកម្ពុជា ជាពិសេស វិស័យដឹកជញ្ជូន ដូចជា៖ កាត់បន្ថយតម្លៃដឹកជញ្ជូន កាត់បន្ថយពេលវេលា ចម្ងាយ ការខូចខាតផ្លូវថ្នល់ ការកកស្ទះចរាចរណ៍ គ្រោះថ្នាក់ចរាចរណ៍ ក៏ដូចជា កាត់បន្ថយនីតិវិធីសម្រាប់នាវា និងបែបបទក្នុងការ​ឆ្លងកាត់ទំនិញពីកម្ពុជាទៅសមុទ្រ ការបង្កើតតំបន់ពាណិជ្ជកម្ម តំបន់សេដ្ឋកិច្ចពិសេស ការអភិវឌ្ឍន៍ផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ ជួយរំដោះទឹកជំនន់ក្នុងរដូវវស្សា ជួយបង្កើនផលត្រី​ទឹកសាបនៅតាមព្រែក អចលនទ្រព្យ និងការវិនិយោគផ្សេងៗ។ល។ និយាយជារួម គម្រោងព្រែកជីកហ្វូណនតេជោនេះ គឺជាគម្រោងបម្រើផល ប្រយោជន៍ជាតិដ៏ធំធេង ជាពិសេស ផ្នែកសេដ្ឋកិច្ចសង្គមនៅកម្ពុជា ៕
ដោយ៖វណ្ណលុក