បន្ទាយមានជ័យ៖ គណៈកម្មាធិការគណបក្សប្រជាជនកម្ពុជា​ខេត្ត​បន្ទាយមានជ័យកាលពីថ្ងៃទី៣០ ខែមិថុនា ឆ្នាំ២០២៤​បាន​ប្រារព្ធ​ខួបលើកទី ៧៣ ថ្ងៃបង្កើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២៤) នៅទីស្នាក់ការ​គណបក្សខេត្ត​ក្រោមអធិបតីភាព ឯកឧត្តម កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិការកណ្តាល ប្រធាន​ក្រុមការងារគណបក្សចុះ​មូលដ្ឋាន​ខេត្តបន្ទាយមានជ័យ។

ក្នុងឱកាសនេះ​ឯកឧត្តម កែ គឹមយ៉ាន បានលើកយក​សុន្ទរកថារបស់សម្ដេចតេជោ ហ៊ុន សែន ប្រធានគណបក្ស​ប្រជាជនកម្ពុជា ប្រធានព្រឹទ្ធសភានៃព្រះរាជាណាចក្រកម្ពុជា ដែលបានថ្លែងក្នុងមីទ្ទីងខួបថ្ងៃកំណើតគណបក្សប្រជាជនកម្ពុជា។ឯកឧត្តមបានរំលេចពី គម្រោងព្រែកជីកហ្វូណនតេជោ ដែលជាគំនិតផ្តួចផ្តើមកើតចេញពីមនសិការ និងឆន្ទៈរបស់​កម្ពុជាសុទ្ធសាធ ដែលនឹងផ្តល់ផល​ចំណេញយ៉ាងធំដល់កម្ពុជា ដូចជាការ ចំណេញចម្ងាយផ្លូវដឹកជញ្ជូន, ចំណេញខាងការ​ប្រកួតប្រជែងតម្លៃ, បង្កើនប្រព័ន្ធស្រោចស្រព និងការ រំដោះ​ទឹកជំនន់, ជួយពង្រីកការដាំដុះនៅភាគនិរតី, ទទួលបានផល​នេសាទ និងពីវារីវប្បកម្ម ព្រមទាំង ជំរុញដល់វិស័យ​ទេសចរណ៍​ផងដែរ។ ជាមួយគ្នានេះព្រែកជីកហ្វូណនតេជោ នឹងជួយឱ្យ​កម្ពុជា​ពង្រឹង នូវឯករាជ្យភាពខាងនយោបាយ​លើការ​ដឹកជញ្ជូន​តាមផ្លូវទឹក។ព្រែកជីកនេះ នឹងមិនបង្កផលប៉ះពាល់ដល់ និង​លំហូរទឹកទន្លេមេគង្គនោះឡើយ។

ឯកឧត្តម កែ គឹមយ៉ាន បានក្រើនរំលឹកដល់សមាជិកបក្ស ក៏ដូចប្រជាពលរដ្ឋ រួមគ្នាបន្តថែរក្សាសុខសន្តិភាពឱ្យឋិតស្ថេរ​គង់ វង់ ព្រោះ​សន្តិភាពជាមូលដ្ឋានគ្រឹះ នៃភាពសុខសាន្ត​ប្រជាពលរដ្ឋ និងការអភិវឌ្ឍសង្គម៕
ដោយ៖ គៀនច័ន្ទហ៊ីន