អំណោយសង្គ្រោះបន្ទាន់របស់សម្ដេចធិបតី ហ៊ុន ម៉ាណែត និងលោកជំទាវ ត្រូវបានយកទៅប្រជាពលរដ្ឋរងគ្រោះដោយបាក់ស្រុតដី
កំពង់ឆ្នាំង៖អំណោយសង្រ្គោះបន្ទាន់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានិងលោកជំទាវ មាន អង្ករ មី ទឹកត្រី ទឹក ស៊ីអ៊ីវ ត្រីខ មុង ស័ង្កសីនិងថវិកាមួយចំនួនត្រូវបានយកទៅជូនប្រជាពលរដ្ឋរងគ្រោះបាក់ស្រុតដីចំនួន៩ ខ្នងផ្ទះស្មើនឹង ១២គ្រួសាររស់នៅក្បែរអាងក្រពើចាស់ ភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង កាលព្រឹកថ្ងៃទី១ ខែកក្កដា ឆ្នាំ២០២៤ ។សូមជម្រាបថា ករណីបាក់ស្រុតដីបានកើតឡើងកាលពីរាត្រីថ្ងៃទី២៩ ខែមិថុនា តែមិនបណ្ដាលឱ្យមានគ្រោះថ្នាក់ដល់មនុស្សទេ។
អាន៖ លោក យិន សាវ៉េន អភិបាលរងខេត្តកំពង់ឆ្នាំង ឧត្តមសេនីយ៍ត្រី អ៊ុ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង លោក ហ៊ីង ភ័ព្វមីនា អភិបាលក្រុងកំពង់ឆ្នាំងបានអញ្ជើញសួរសុខទុក្ខនិងជូនអំណោយដល់ប្រជាពលរដ្ឋរងគ្រោះទាំង១២គ្រួសារ។
ក្នុងឱកាសនេះលោកអភិបាលក្រុងកំពង់ឆ្នាំងបញ្ជាក់ថា រដ្ឋបាលក្រុងនឹងរៀបចំបំពាក់អំពូលភ្លើងសូឡា,តចរន្តអគ្គិសនីនិងប្រព័ន្ធទឹកស្អាតជូនដល់ប្រជាពលរដ្ឋរងគ្រោះជាមួយនឹងការរៀបចំលំនៅជាបណ្ដោះអាសន្ននៅទីមានសុវត្ថិភាព។ជាមួយគ្នានេះក្រុមការងារនឹងចុះសិក្សាអំពីស្ថានភាពផ្លូវ ក៏ដូចជាទីតាំងកើតហេតុដើម្បីរៀបចំជួសជុលឬស្ដារស្ថានភាពឡើងវិញ។លោកក៏សំណូមពរ ដល់ពលរដ្ឋកុំចូលទៅរស់ទីតាំងកើតហេតុ ។ពិសេសក្មេងៗចៀសវាងគ្រោះថ្នាក់ជាយថាហេតុមុនពេលអ្នកជំនាញអនុញ្ញាត។
ចំណែកឧត្តមសេនីយ៍ត្រី អ៊ុ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំងបានបញ្ជាក់ថា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានិងជំទាវ បានយកចិត្តទុកដាក់ពីភាពលំបាករបស់បងប្អូនប្រជាពលរដ្ឋរងគ្រោះទើបសម្ដេចបញ្ជូនអំណោយនេះមកចែកជូនដើម្បីជួយរំលែកការលំបាក។
ក្នុងឱកាសនេះដែរ យ៉ែម ច័ន្ទណារុំ ប្រធានក្រុមការងារថ្នាក់កណ្ដាលចុះជួយសង្កាត់ផ្សារឆ្នាំងក៏បានអញ្ជើញសាកសួរសុខទុក្ខនិងពិនិត្យទីតាំងកើតហេតុផងដែរ ៕
អត្ថបទនិងរូបភាព៖សុខ គឹមសៀន
