បរទេស៖ មនុស្សយ៉ាងតិច ចំនួន៤នាក់បានស្លាប់ ខណៈដែលទឹកទន្លេ Manzanares នាភាគខាងកើតប្រទេសវេណេស៊ុយអេឡា បានជន់លិចដងផ្លូវនានា បន្ទាប់ពីព្យុះ Hurricane ឬ ព្យុះសង្ឃរា Beryl វាយប្រហារប្រទេស ស្ថិតក្នុងតំបន់អាមេរិកខាងត្បូងមួយនេះ កាលពីថ្ងៃអង្គារ។

រដ្ឋមន្ត្រីយុត្តិធម៌ និងមហាផ្ទៃ ប្រទេសវេណេស៊ុយអេឡា លោក Remigio Ceballos Ichaso បានប្រកាស នៅលើបណ្តាញសង្គម X ថា ទន្លេមួយនេះ ស្ថិតនៅក្នុងរដ្ឋ Sucre។ គ្រោះទឹកជំនន់កើតឡើង ក្រោយពេលដែលព្យុះ Hurricane បោកបក់ ពាសពេញភាគអាគ្នេយ៍ នៃតំបន់ការ៉ាប៊ីន ដែលជាព្យុះប្រភេទទី ៤ ដោយបានសម្លាប់មនុស្សយ៉ាងហោចណាស់ម្នាក់ នៅក្នុងប្រទេសវេណេហ្ស៊ុយអេឡា។

ព្យុះសង្ឃរា Beryl ក៏បានបោកបក់ឆ្ពោះ ទៅប្រទេស ហ្សាម៉ាអ៊ីក (Jamaica) សម្លាប់មនុស្សយ៉ាងហោចណាស់ ៥ នាក់ និងបណ្តាលឱ្យមានការបំផ្លិចបំផ្លាញ យ៉ាងទូលំទូលាយ ហើយ ហ្សាម៉ាអ៊ីក ក៏ស្ថិតក្នុងភាគអាគ្នេយ៍ ការ៉ាប៊ីន។

មជ្ឈមណ្ឌលព្យុះសង្ឃរាជាតិអាមេរិក ហៅកាត់ NHC បានព្រមានថា ព្យុះសង្ឃរាដ៏កម្រ នៅដើមរដូវកាលនេះ ត្រូវបានបារម្ភខ្លាំងថា នឹងឆ្លងកាត់ក្បែរៗ ប្រទេសហ្សាម៉ាអ៊ីក បន្តទៀត នៅថ្ងៃពុធ ដែលនាំមកនូវខ្យល់បក់ ដែលគំរាមកំហែងដល់អាយុជីវិតមនុស្ស តាមរយៈការធ្លាក់ភ្លៀងខ្លាំងក្លា និងទឹកជំនន់ភ្លាមៗ៕

ប្រភពពី AFP ប្រែសម្រួល៖ សារ៉ាត