សម្តេចក្រឡាហោម ស ខេង ជំរុញឱ្យមានវិធានការម៉ឺងម៉ាត់ទប់ស្កាត់ កុំឱ្យគ្រឿងញៀនជ្រៀតចូលសាលារៀន
បាត់ដំបង៖ការប្រើប្រាស់និងជួញដូរគ្រឿងញៀននៅក្នុងសាលារៀន គឺជាគ្រោះមហន្តរាយធំណាស់សម្រាប់អនាគតកូនចៅជំនាន់ក្រោយ។ខណៈសិស្សានុសិស្ស គឺជាមុខសញ្ញាធំក្នុងការវាយលុករបស់គ្រឿងញៀន។នេះជាការកត់សម្គាល់និងក្រើនរំលឹករបស់សម្ដេចក្រឡាហោម ស ខេង តំណាងរាស្រ្តមណ្ឌលខេត្តបាត់ដំបងនិងជាសមាជិកឧត្តមក្រុមប្រឹក្សាព្រះមហាក្សត្រ។
![](https://asset.ams.com.kh/central/media/2024/07/photo_2024-07-03_17-35-24.jpg)
ក្នុងឱកាសអញ្ជើញចូលរួមសម្ពោធអគារសិក្សាមួយខ្នងនិងសមិទ្ធផលនានានៅអនុវិទ្យាល័យឈើទាល ភូមិឈើទាល ឃុំឈើទាល ស្រុកបាណន់ ខេត្តបាត់ដំបងកាលពីព្រឹកថ្ងៃទី៣ ខែកក្កដា ឆ្នាំ២០២៤ ដោយផ្តើមចេញពីការកត់សម្គាល់នេះ សម្ដេចក្រឡាហោមស ខេង បានណែនាំដល់អាជ្ញាធរមូលដ្ឋាន សមត្ថកិច្ចកងកម្លាំង លោកគ្រូអ្នកគ្រូ មាតាបិតាសិស្ស ត្រូវចូលរួមជំរុញឱ្យមានវិធានម៉ឺងម៉ាត់នូវក្នុងការទប់ស្កាត់កុំឱ្យគ្រឿងញៀនរីករាលដាលចូលទៅក្នុងសាលារៀន ។
![](https://asset.ams.com.kh/central/media/2024/07/photo_2024-07-03_17-35-27.jpg)
សម្ដេចក្រឡាហោមថាត្រូវមានយន្តការជាក់លាក់ជាប់ជាប្រចាំក្នុងការទប់ស្កាត់ការប្រើប្រាស់ និងជួញដូរគ្រឿងញៀនដើម្បីធានាឱ្យបានសន្តិសុខសុវត្ថិភាពសង្គម។
![](https://asset.ams.com.kh/central/media/2024/07/photo_2024-07-03_17-35-30.jpg)
ទាក់ទងនឹងវិស័យអប់រំ សម្ដេចក្រឡាហោម ស ខេង បានរំលេចថា រាជរដ្ឋាភិបាលកម្ពុជានីតិកាលទី៧ ដឹកនាំដោយសម្ដេចធិបតី ហ៊ុន ម៉ាណែត បានដាក់ចេញវិធានការកំណែទម្រង់ស៊ីជម្រៅលើគុណភាពនៃការអប់រំបណ្ដុះបណ្ដាល សំដៅធានាឱ្យបាននូវធនធានមនុស្សប្រកបដោយគុណភាពខ្ពស់ដើម្បីរួមចំណែកក្នុងការកសាងសង្គមកម្ពុជា ដែលមានប្រជាជនប្រកបដោយចំណេះដឹង ទេពកោសល្យ សមត្ថភាពខ្ពស់ ព្រមទាំងមានលទ្ធភាពការងារខ្ពស់ដែលជាកត្តាកំណត់ នូវ សមត្ថភាព ក្នុងការអភិវឌ្ឍ និងការប្រកួតប្រជែងប្រកបដោយចីរភាព៕
( អត្ថបទ-រូបភាព៖ អ៊ុក សំអាន បប. )
![](https://asset.ams.com.kh/central/media/2024/07/photo_2024-07-03_17-35-34.jpg)
![](https://asset.ams.com.kh/central/media/2024/07/photo_2024-07-03_17-35-37.jpg)
![](https://asset.ams.com.kh/central/media/2024/07/photo_2024-07-03_17-35-40.jpg)