កំពង់ធំ៖ ឯកឧត្តម ងួន រតនៈ អភិបាលខេត្តកំពង់ធំ បាន​ណែនាំ​ដល់បញ្ជាការស្រាល និងសមត្ថកិច្ចជំនាញ ដែល​ឈរជើងនៅ​ដែន​ជម្រកសត្វព្រៃ ព្រៃសហគមន៍ និងតំបន់​វាលក្រោម (តំបន់៣) ត្រូវបន្តអនុវត្ត និងធ្វើសកម្មភាព​ប្រតិបត្តិការឱ្យជាប់ជាប្រចាំ ក្នុងការការពារធនធានធម្មជាតិ ក្នុងភូមិសាស្ត្រខេត្តកំពង់ធំ ។

ក្នុងកិច្ចប្រជុំបូកសរុបលទ្ធផលការងារគ្រប់គ្រង ការពារ ធនធានធម្មជាតិ ក្នុងភូមិសាស្ត្រខេត្តកំពង់ធំ កាលពីព្រឹកថ្ងៃទី៤ ខែកក្កដា ឆ្នាំ២០២៤ នៅសាលាប្រជុំសាលាខេត្តកំពង់ធំ ឯកឧត្តម ងួន រតនៈ បានផ្តល់នូវគោលការណ៍សំខាន់ៗ មួយចំនួនក្នុងនោះ អាជ្ញាធរ​ដែនដី និងសមត្ថកិច្ចជំនាញ​គ្រប់លំដាប់ថ្នាក់ ត្រូវចាត់តាំងផ្សព្វផ្សាយជូនប្រជាពល​រដ្ឋឱ្យបានជ្រួតជ្រាប អំពីវិធានការ​ផ្លូវច្បាប់ចំពោះជនទាំង​ឡាយណា ដែលបានឃុបឃិត ចូលរួម និងធ្វើសកម្មភាព​បំផ្លិចបំផ្លាញធនធានធម្មជាតិ។ ត្រូវ​ពង្រឹងតួនាទី​ភារកិច្ច នៅទីបញ្ជាការស្រាល ក្នុងកិច្ចការពារទប់ស្កាត់ និងបង្ក្រាប​រាល់បទល្មើសធនធានធម្មជាតិឱ្យមានប្រសិទ្ធភាព ។ក្តាប់ព័ត៌មាន​បន្ថែមអំពីចលនាអូសទាញប្រជាពលរដ្ឋ ប្រមូលផ្តុំប្រឆាំងតវ៉ា ដើម្បីមានវិធានការទាន់ពេលវេលា ។ ទីបញ្ជាការស្រាល និងសមត្ថកិច្ចជំនាញ មានភារកិច្ច​បន្តស្រាវជ្រាវរកមុខសញ្ញា ពិសេសអ្នកនៅពីក្រោយខ្នង ដោយសហការជាមួយមន្ទីរជំនាញ និងអាជ្ញាធរពាក់ព័ន្ធ។ចាត់វិធានការដកហូតដីដែលបានរកឃើញពីការទន្ទ្រានខុសច្បាប់ និងដីអាស្រ័យផលខុសច្បាប់ ព្រមទាំងកសាង​សំណុំរឿងតាមនីតិវិធី។
ចំណុចចុងក្រោយគឺរៀបចំ​យុទ្ធនា​ការដាំដើមឈើ លើផ្ទៃដី​ដែលបានរកឃើញដោយការកាប់ទន្ទ្រានខុសច្បាប់នាពេលកន្លងទៅ ៕
ដោយ៖ប៊ុន រដ្ឋា