បាត់ដំបង៖ឯកឧត្តមអភិសន្តិបណ្ឌិត ស សុខា ឧបនាយក​រដ្ឋមន្រ្តី រដ្ឋមន្រ្តីក្រសួងមហាផ្ទៃ បានលើកទឹកចិត្ត​ដល់ជន​រងគ្រោះ​ដោយ​សារគ្រឿងញៀនទាំងអស់ដែលបានមកបន្សាប​ព្យាបាលស្ដារនីតិសម្បទាឡើងវិញ​ដោយជោគជ័យ និង បាន​បញ្ចប់​ការសិក្សា។លោកថា នៅពេលត្រឡប់ទៅរួមរស់ជាមួយ​ក្រុមគ្រួសារវិញត្រូវខិតខំយកចំណេះជំនាញដែលបានសិក្សាទៅចាប់ផ្ដើមជីវិតថ្មី​ក្នុងការបង្កើតឬប្រកបមុខរបរចិញ្ចឹមជីវិត​ឱ្យបានប្រសើរឡើង។

ក្នុងឱកាសអញ្ជើញជួបសំណេះសំណាលជាមួយថ្នាក់ដឹកនាំ-បុគ្គលិកនិងជនរងគ្រោះដោយសារគ្រឿងញៀន​ក្នុងពិធីវគ្គ​បណ្ដុះ​បណ្ដាល​ជំនាញវិជ្ជាជីវៈផ្នែកទ្រឹស្ដីនិងអនុវត្តផ្ទាល់ដល់​អ្នកញៀនគ្រឿងញៀនលើកទី៤ នៅក្នុងមជ្ឈមណ្ឌល​បន្សាប​ព្យាបាល​និងស្ដារនីតិសម្បទាអ្នកញៀនគ្រឿងញៀន កែ ស៊ីនួន កាលពីថ្ងៃទី៤ ខែកក្កដា ឯកឧត្តមអភិសន្តិបណ្ឌិត ស សុខា បានចូលរួមអបអរសាទរ​ជាមួយ​ជន​រងគ្រោះដោយសារគ្រឿង​ញៀនទាំងអស់ដែល​បានមកបន្សាបព្យាបាលស្ដារនីតិសម្បទា​ឡើង​វិញ​ដោយ​ជោគជ័យ ជាមួយនឹងការ​បញ្ចប់ការសិក្សាលើមុខវិជ្ជាជីវៈ។ឯកឧត្តមបន្តដោយលើកទឹកចិត្តផង និងជំរុញផងដល់ជន​បន្សាប​គ្រឿងញៀនដោយ​ជោគជ័យ​ទាំងអស់ត្រូវខិតខំយក​ចំណេះជំនាញដែលបានសិក្សាទៅចាប់ផ្ដើមជីវិតថ្មីក្នុងការបង្កើតឬប្រកបមុខរបរចិញ្ចឹមជីវិត​​ចិញ្ចឹមគ្រួសារឱ្យមាន​ជីវភាព​​ប្រសើរឡើង។ ត្រូវចៀសឱ្យឆ្ងាយពីគ្រឿងញៀន និងត្រូវ​បង្កលក្ខណៈឱ្យខ្លួនឯង ក្លាយទៅជាមនុស្ស​ថ្មីក្នុងសង្គម តាមរយៈ ការគោរពច្បាប់ ហើយក៏ត្រូវចៀសឲ្យឆ្ងាយ​និង​ឆ្លើយថាទេចំពោះគ្រឿងញៀន។

ទន្ទឹមនេះឯកឧត្តម ស សុខា ក៏បានណែនាំ ដល់អាជ្ញាធរ​គ្រប់​លំដាប់ថ្នាក់ត្រូវរឹតបន្តឹង,ត្រូវពង្រឹងការបង្រ្កាបនិងទប់ស្កាត់រាល់​ការប្រើប្រាស់ជួញដូរគ្រឿងញៀន និងត្រូវបន្តអនុវត្តន៍នូវបទ​បញ្ជា​លេខ ០១របស់រាជរដ្ឋាភិបាលកម្ពុជា ស្ដីពី៖ការដាក់​ចេញវិធានការម៉ឺងម៉ាត់ ក្នុងការប្រយុទ្ធប្រឆាំង​គ្រឿង​​ញៀនខុសច្បាប់ នៅរដ្ឋបាលថ្នាក់ក្រោមជាតិ។

តំណាងជនរងគ្រោះដោយសារគ្រឿងញៀន បានប្ដេជ្ញាចិត្ត​នឹងខិតខំកែប្រែខ្លួនពួកគេម្នាក់ៗឱ្យក្លាយទៅជាកូនល្អ ពលរដ្ឋល្អ និងខិតខំប្រកបការងារចិញ្ចឹមជីវិតតាមជំនាញ​វិជ្ជាជីវៈដែលខ្លួនបានសិក្សារៀនសូត្រនិងបណ្តុះបណ្តាលនៅក្នុងមជ្ឈមណ្ឌលកន្លងមក។

មជ្ឈមណ្ឌលបន្សាបព្យាបាល និងស្ដារនីតិសម្បទាអ្នក​ញៀនគ្រឿងញៀន កែ ស៊ីនួន ស្ថិតនៅភូមិស្ដៅ ឃុំស្ដៅ ស្រុករតនមណ្ឌល ខេត្តបាត់ដំបង ។លោកវេជ្ជបណ្ឌិត កែ ស៊ីនួន ប្រធានមជ្ឈមណ្ឌលបន្សាបព្យាបាល និងស្ដារនីតិ​សម្បទាអ្នកញៀនគ្រឿងញៀន កែ ស៊ីនួន បានឱ្យដឹងថា ចាប់តាំងពីបើកដំណើរការ ក្នុងឆ្នាំ២០២២ រហូតមកដល់​ពេលនេះមជ្ឈមណ្ឌលបាន​ទទួលអ្នកញៀនគ្រឿង​ញៀន សរុប១ ១១៥នាក់ និងបានបញ្ជូនទៅធ្វើសមាហរណកម្ម​នៅក្នុងគ្រួសារវិញ​ជាង៧០០នាក់ និងកំពុងបន្សាបព្យាបាល​​ស្ដារនីតិសម្បទាជាង៤០០នាក់ ។
លោកបន្តថា ក្រោយពីបញ្ចប់ការបន្សាបព្យាបាលជនរងគ្រោះ​បានចូល​រៀនបំណិនជីវិត រៀនជំនាញវិជ្ជាជីវៈផ្សេងៗដូចជា ជួសជុល​រថយន្ត ម៉ាស៊ីនត្រជាក់ ធ្វើតុ ទូ ជាងភ្លើង ទូរសព្ទ កាត់សក់ ការដាំដុះ និងកុំព្យូទ័រជាដើម៕

       ( អត្ថបទ- រូបភាព៖ អ៊ុក សំអាន បប )