ហាណូយ÷ កាសែត VNexpress បានចុះផ្សាយ នៅសប្តាហ៍នេះថា វៀតណាមបាននាំចេញទុរេន បានតម្លៃ ៩១៩លានដុល្លារ ក្នុងរយៈពេល៥ខែដំបូង ឆ្នាំ២០២៤ ពោលគឺចាប់ពីខែមករា ដល់ខែឧសភា កើនឡើង ៧៤% បើធៀបនឹងពេលដូចគ្នា កាលពីឆ្នាំមុន នេះបើតាមទិន្នន័យរបស់នាយករដ្ឋានគយ។

ប្រភពបានឲ្យដឹងដែរថា ការនាំចេញផ្លែឈើ មានក្លិនក្រអូបប្រភេទនេះ មានតម្លៃ៤៥០លានដុល្លារ ក្នុងខែឧសភា កើនឡើងទ្វេដង ធៀបនឹងខែឧសភា ឆ្នាំ២០២៣ ខណៈដែលតម្លៃវិញ កើនឡើង៣៤%។

លោក Dang Phuc Nguyen អគ្គលេខាធិការសមាគមផ្លែឈើ និងបន្លែវៀតណាម បានឱ្យដឹងថា តាមការប៉ាន់ស្មាន ការនាំចេញផ្លែទុរេនវៀតណាម នៅក្នុងខែមិថុនា មានតម្លៃ៦០០លានដុល្លារ។ លោក Dang Phuc Nguyen បានបន្តថា ប្រទេសចិនគឺជាអ្នកនាំចូលទុរេនធំបំផុត របស់វៀតណាម ក្នុងឆ្នាំ២០២៤នេះ៕

ប្រភពពី VNexpress ប្រែសម្រួល៖ សារ៉ាត