កាអភិវឌ្ឍប្រទេសមួយ ត្រូវការចំបាច់នូវមូលធនមនុស្ស ប្រកបដោយចំណេះដឹង សុខភាពល្អ មានសីលធម៌ គុណធម៌ និងចរិយាធម៌ល្អ
ភ្នំពេញ៖លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត មានប្រសាសន៍ថា ការអភិវឌ្ឍប្រទេសមួយ ត្រូវការចំបាច់នូវមូលធនមនុស្សប្រកបដោយចំណេះដឹង សុខភាពល្អ និងមានសីលធម៌ គុណធម៌ និងចរិយាធម៌ប្រពៃថ្លៃថ្លា ។
![](https://asset.ams.com.kh/central/media/2024/07/photo_2024-07-08_18-32-19-1024x682.jpg)
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានថ្លែងដូច្នេះកាលពីថ្ងៃទី៧ ខែកក្កដា ឆ្នាំ២០២៤ ក្នុងឱកាសអញ្ជើញជាអធិបតី នៃពិធីបិទវគ្គ និងប្រគល់វិញ្ញាបនបត្រ ដល់សិក្ខាកាមក្នុងកម្មវិធីអប់រំសីលធម៌ព្រះពុទ្ធសាសនា បំបួសកុលបុត្រ កុលធីតា វគ្គទី១១ ឆ្នាំទី១១ ចំនួន ៦៣០ អង្គ/នាក់ នាបរិវេណវត្តភ្នៀតសិម្ពលី ស្ថិតនៅក្នុងសង្កាត់ស្នោរ ខណ្ឌកំបូល រាជធានីភ្នំពេញ ដោយមានការនិមន្ត និងអញ្ជើញចូលរួមពីសំណាក់គណៈសង្ឃនាយកនៃព្រះរាជាណាចក្រកម្ពុជា, ថ្នាក់ដឹកនាំក្រសួងធម្មការ និងសាសនា។
![](https://asset.ams.com.kh/central/media/2024/07/photo_2024-07-08_18-32-25-1024x682.jpg)
ជាមួយការអបអរសាទរចំពោះសិក្ខាកាមទាំងអស់ដែលបានចូលរួមកម្មវិធីអប់រំនោះដោយជោគជ័យ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានគូសបញ្ជាក់ថា តាមរយៈការបើកវគ្គអប់រំសីលធម៌ព្រះពុទ្ធសាសនា បំបួសកុលបុត្រ កុលធីតា ដែលរៀបចំដោយព្រះសិរីកោសល សុំ សុខា បានចូលរួមចំណែកដល់ការកសាងសន្តិភាពផ្លូវចិត្ត តាមរយៈការជម្រះនូវទុក្ខកង្វល់ ចេះអប់រំផ្លូវចិត្ត និងផ្តល់នូវក្តីមេត្តាធម៌ ដែលជាផ្នែកមួយនៃការចូលរួមកសាងអភិវឌ្ឍសង្គមជាតិប្រកបដោយគុណភាព ។ លោកជំទាវបណ្ឌិត បានបញ្ជាក់ផងដែរថា ការអភិវឌ្ឍប្រទេសមួយត្រូវការចំបាច់នូវមូលធនមនុស្សប្រកបដោយចំណេះដឹង សុខភាពល្អ និងមានសីលធម៌ គុណធម៌ និងចរិយាធម៌ប្រពៃថ្លៃថ្លា ។
![](https://asset.ams.com.kh/central/media/2024/07/photo_2024-07-08_18-32-28-1024x682.jpg)
ក្នុងពិធីដ៏មហោទ្បារិកនោះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បាននាំយកសទ្ធាជ្រះថ្លារបស់សម្តេចមហាបវរធិបតី ហ៊ុន ម៉ាណែត រួមមានទេយ្យវត្ថុ និងបច្ចេយមួយចំនួន ទៅប្រគេនថ្វាយសម្តេច ព្រះថេរានុថេរៈគ្រប់ព្រះអង្គ តាជី យាយជី សីលវ័ន សីលវតី លោកគ្រូ អ្នកគ្រូ សិស្សានុសិស្ស យុវជនកាយរិទ្ធកម្ពុជា យុវជនកាកបាទក្រហមកម្ពុជា យុវជន អ.ម.ត យុវជនស.ស.យ.ក និងយុវជនសមាគមក្មេងវត្តផងដែរ ។
![](https://asset.ams.com.kh/central/media/2024/07/photo_2024-07-08_18-32-31-734x1024.jpg)
សូមជម្រាបថា កម្មវិធីអប់រំសីលធម៌ព្រះពុទ្ធសាសនា បំបួសកុលបុត្រ កុលធីតា វគ្គទី១១ ឆ្នាំទី១១ បានប្រារព្ធឡើងវិញ បន្ទាប់ពីបានអាក់ខានរយៈពេលបួនឆ្នាំ ដោយសារជំងឺរាតត្បាតសកលកូវីដ-១៩ ដែលប្រារព្ធឡើងក្នុងគោលបំណងផ្សព្វផ្សាយ ការអប់រំសីលធម៌ព្រះពុទ្ធសាសនា អប់រំចិត្តគំនិត និងបដិបត្តិសមាធិ ដោយបានចាប់ផ្តើមពីថ្ងៃទី២៩ ខែមិថុនា ដល់ទី៧ ខែកក្កដា ឆ្នាំ២០២៤ ជាមួយការបំបួសកុលបុត្រ កុលធីតា ចំនួន ៦៣០ អង្គ/នាក់ ក្នុងនោះមានសីលវតីចំនួន ៣៧៦ អង្គ/នាក់ ៕
ដោយ៖វណ្ណលុក
![](https://asset.ams.com.kh/central/media/2024/07/photo_2024-07-08_18-32-34-682x1024.jpg)
![](https://asset.ams.com.kh/central/media/2024/07/photo_2024-07-08_18-32-37-1024x682.jpg)
![](https://asset.ams.com.kh/central/media/2024/07/photo_2024-07-08_18-32-40-1024x682.jpg)