ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្ស បានអញ្ជើញជាអធិបតីក្នុងពិធីបិទវគ្គ បណ្តុះបណ្តាលថ្នាក់ដឹកនាំវ័យក្មេង​កម្ពុជា-ឡាវ-វៀតណាម នៅវិមាន ៧មករា នារសៀល ថ្ងៃពុធ ៤កើត ខែ​អាសាឍ ឆ្នាំរោង ឆស័ក ព.ស.២៥៦៨ ថ្ងៃទី១០ ខែកក្កដា ឆ្នាំ២០២៤ វិមាន៧មករា ។

ថ្លែងក្នុងពិធីនោះ សម្តេចកិត្តិសង្គហបណ្ឌិតបានមានប្រសាសន៍លើកឡើងថា ឆ្លងកាត់តាមវគ្គបណ្តុះបណ្តាលរយៈពេល ១០ថ្ងៃនេះ សិក្ខាកាមបានយល់​ដឹង​កាន់តែច្បាស់ថែមទៀត អំពីលក្ខណៈពិសេសេជាប្រវត្តិសាស្ត្រមិន អាចខ្វះបាន អំពីទំនាក់ទំនងកម្ពុជា-ឡាវ-វៀតណាម នូវប្រពៃណី សាមគ្គីភាព ភាពជាអ្នក​ជិតខាងល្អ និងការជួយគ្នាទៅវិញទៅមកនៅគ្រប់កាលៈទេសៈ ចាប់តាំងពីបុព្វ​ហេតុតស៊ូរំដោះជាតិឱ្យរួចផុតពីនឹមអាណានិគមនិយម រហូតដណ្តើមបាន ឯករាជ្យ សេរីភាព និងកសាងអភិវឌ្ឍប្រទេសឱ្យមានសុខសន្តិភាព និងការរីក​ចម្រើន​លើគ្រប់វិស័យរហូតដល់បច្ចុប្បន្ន។

សម្តេចកិត្តិសង្គហបណ្ឌិត បានបន្តទៀតថា វគ្គបណ្តុះបណ្តាលនេះ បានក្លាយ​ទៅជាយន្តការសម្រាប់បន្តបង្កើតអនុស្សាវរីយ៍ និងកិច្ចសហប្រតិបត្តិការ ជិត​ស្និទ្ធ​ក្នុងស្រទាប់យុវជនជំនាន់ថ្មី ជាពិសេស ការសម្រេចឱ្យបាន នូវ «ប្រទេស​បី​គោល​ដៅទេសចរណ៍រួមតែមួយ» ដើម្បីការអភិវឌ្ឍ និងវិបុលភាពនៃប្រទេស​នីមួយៗ ក្នុងស្មារតីសាមគ្គីភាព ភាពជាអ្នកជិតខាងល្អ បងប្អូនល្អ និងកិច្ចសហ​ប្រ​តិបត្តិកាគ្រប់ជ្រុងជ្រោយ គង់វង្ស រឹងមាំយូរអង្វែង។ 

សម្តេចកិត្តិសង្គហបណ្ឌិត ក៏បានជូនពរឲ្យទំនាក់ទំនងមិត្តភាព សាមគ្គីភាព​ជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយ រឹងមាំ យូរអង្វែងរវាង ប្រទសទាំង៣ វៀតណាម កម្ពុជា ឡាវ ស្រស់បំព្រង និងរឹងមាំជាអមតៈ៕

ដោយ ៖ ថេត វិចិត្រ