ស្វាយរៀង៖ឃុំធ្មា និងឃុំកំពង់អំពិល ស្រុករំដួល ខេត្តស្វាយ​រៀង កាលពីព្រឹកថ្ងៃទី១១ ខែកក្កដា ឆ្នាំ២០២៤​បានប្រារព្ធ​វេទិកា​សាធារណៈដើម្បីទទួលសំណូមអំពីសេចក្តីត្រូវការ​ក្នុងជីវភាពប្រចាំថ្ងៃរបស់ប្រជាជននិងដំណោះស្រាយឱ្យទាន់ពេលវេលា។

វេទិកា​នេះមានការអញ្ជើញចូលរួមដោយលោកជំទាវ វី ស្រីពៅ រដ្ឋលេខាធិការក្រសួងអធិការកិច្ច លោកស្រី យ៉ក់ ស៊ីណាត អភិបាលរងបាល​ខេត្តស្វាយរៀង លោក សៅ វណ្ណា ប្រធាន​មន្ទីរ​ទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច លោកហែម ស៊ីណា អភិបាលស្រុករំដួល លោក លោកស្រី ប្រធាន អនុប្រធានមន្ទីរ មន្ត្រីជំនាញ អង្គភាពពាក់ព័ន្ធជុំវិញ​ខេត្ត កងកម្លាំងប្រដាប់​អាវុធ ប្រធាន សមាជិកក្រុមប្រឹក្សា មេឃុំ ប្រធាន អនុប្រធាន សមាជិកភូមិ និងប្រជាពលរដ្ឋចំនួន ២៧៩ នាក់។

វេទិកាសាធារណៈនេះបានប្រព្រឹត្តទៅប្រកបដោយការយកចិត្តទុកដាក់ដោយទទួលបានសំណួរ និងសំណូមពរពីប្រជាពលរដ្ឋ​នៅឃុំធ្មា ចំនួន ១៣ និងនៅឃុំកំពង់អំពិល ចំនួន ៦ ហើយត្រូវ​បានមន្រ្តីជំនាញ អាជ្ញាធរខេត្តដោះស្រាយ និងឆ្លើយបំភ្លឺយ៉ាង​ក្បោះក្បាយ

លោកជំទាវ វី ស្រីពៅ បានថ្លែងថា វេទិកាសាធារណៈថ្ងៃនេះ​រៀបចំឡើងក្នុងគោលបំណង ដើម្បីដោះស្រាយ និងទទួល​សំណូមពរ​ទាក់ទងក្នុងជីវភាពប្រចាំថ្ងៃរបស់ប្រជាជន​ឱ្យទាន់​ពេលវេលា ដើម្បីចូលរួមចំណែកក្នុងការសម្រេចនូវចក្ខុ​វិស័យ​របស់រាជរដ្ឋាភិបាល៕

ដោយ៖នុត នាង